Surat News: ‘ડાયમંડ સિટી’ તરીકે ઓળખાતા સુરત શહેરમાં રસ્તા પર અકસ્માતોની હારમાળા અટકવાનું નામ નથી લઈ રહી. શહેરના રાંદેર વિસ્તારમાં આજે એક ગમખ્વાર અકસ્માત સર્જાતા અફરાતફરી મચી ગઈ હતી. મોરા ભાગળ સર્કલ પાસે પૂરપાટ ઝડપે આવી રહેલી એક ખાનગી લક્ઝરી બસ અને આલીશાન કાર વચ્ચે જોરદાર ટક્કર થઈ હતી. જોકે, સદનસીબે આ અકસ્માતમાં કોઈ જાનહાનિ થઈ નથી.
ધડાકાભેર ટક્કર અને કારનો કચ્ચરઘાણ
પ્રાપ્ત વિગતો અનુસાર, મોરા ભાગળ સર્કલ જેવા ભરચક વિસ્તારમાં પૂરપાટ ઝડપે આવી રહેલી એક ખાનગી લક્ઝરી બસે કારને અડફેટે લીધી હતી. ટક્કર એટલી પ્રચંડ હતી કે કારના આગળના ભાગનો એટલે કે બોનેટ અને એન્જિનનો કચ્ચરઘાણ વળી ગયો હતો. અકસ્માતનો અવાજ સાંભળીને આસપાસના સ્થાનિક લોકો અને રાહદારીઓ તાત્કાલિક મદદ માટે દોડી આવ્યા હતા.
આ અકસ્માત એટલો ભીષણ હતો કે કારને જોતા જ એમ લાગે કે અંદર સવાર લોકોને ગંભીર ઈજા થઈ હશે. પરંતુ, કારમાં રહેલી ‘એરબેગ્સ’ સમયસર ખુલી જવાને કારણે અને કુદરતની મહેરબાનીથી કારમાં સવાર તમામ મુસાફરોનો આબાદ બચાવ થયો છે. તમામ લોકોને સામાન્ય ઈજાઓ સિવાય કોઈ મોટી હોનારત સર્જાઈ નથી, જે એક ખૂબ જ રાહતના સમાચાર છે.
ટ્રાફિક જામ અને પોલીસ કાર્યવાહી
ભરચક વિસ્તારમાં અને મુખ્ય માર્ગ પર અકસ્માત સર્જાવાને કારણે થોડીવાર માટે રસ્તા પર વાહનોની લાંબી લાઈનો લાગી હતી અને ટ્રાફિક જામના દ્રશ્યો સર્જાયા હતા. સ્થાનિક લોકોએ તાત્કાલિક પોલીસને જાણ કરતા રાંદેર પોલીસનો કાફલો ઘટનાસ્થળે પહોંચી ગયો હતો. પોલીસે ક્રેનની મદદથી અકસ્માતગ્રસ્ત વાહનોને સાઈડમાં ખસેડીને ટ્રાફિક હળવો કરાવ્યો હતો.
અમારી WhatsApp ચેનલમાં જોડાવા આ લિંક પર ક્લીક કરો
આ પણ વાંચો: Hair Care : વાળ મૂળમાંથી થશે મજબૂત, અઠવાડિયામાં ફક્ત 2 વાર કરો આ કામ, વાળ ખરવાનું થશે બંધ
