સ્ટીવ સ્મિથ અને બાબર આઝમ વચ્ચે મેદાન પર થઈ હતી તકરાર? સ્મિથે મૌન તોડીને વિવાદ પર આપ્યો જવાબ

નવી દિલ્હીઃ 18 જાન્યુઆરી, 2026: ઓસ્ટ્રેલિયાના દિગ્ગજ બેટ્સમેન સ્ટીવ સ્મિથે પાકિસ્તાનના પૂર્વ કેપ્ટન બાબર આઝમ સાથેના તેના સંબંધો અંગે ચાલી રહેલી તમામ અટકળો પર પૂર્ણવિરામ મૂકી દીધું છે. બિગ બેશ લીગ (BBL) 2025-26માં સિડની સિક્સર્સ અને સિડની થંડર વચ્ચેની મેચ બાદ બંને ખેલાડીઓ વચ્ચે અણબનાવના સમાચાર સોશિયલ મીડિયા પર વાયરલ થયા હતા.

શું હતી સમગ્ર ઘટના?

ઘટનાની શરૂઆત ત્યારે થઈ જ્યારે 16 જાન્યુઆરીએ રમાયેલી મેચમાં સ્ટીવ સ્મિથે બાબર આઝમને સિંગલ લેવાની ના પાડી દીધી હતી. ત્યારબાદ જ્યારે બાબર આઉટ થઈને પેવેલિયન પરત ફરી રહ્યો હતો, ત્યારે તેના ચહેરા પર નિરાશા જોવા મળી હતી અને તેણે બાઉન્ડ્રી રોપ પર બેટ પણ પછાડ્યું હતું. આ દ્રશ્યો કેમેરામાં કેદ થયા બાદ વિવાદ વકર્યો હતો.

‘માત્ર એક ગેરસમજ હતી‘: સ્ટીવ સ્મિથ

બ્રિસ્બેન હીટ સામેની મેચ પહેલા કોમેન્ટેટર ઈસા ગુહાએ જ્યારે સ્મિથને આ અંગે પૂછ્યું, ત્યારે સ્મિથે સ્પષ્ટતા કરી કે તેમની વચ્ચે કોઈ મનદુઃખ નથી. સ્મિથે હસતા હસતા કહ્યું, “બધું બરાબર છે. અમે ફક્ત ગોલ્ફ અને ગત મેચની ઇનિંગ્સ વિશે વાત કરી રહ્યા હતા. બાબર એક શાનદાર ખેલાડી છે અને અમારી ભાગીદારી પણ સારી રહી હતી.”

વ્યૂહરચનાના ભાગરૂપે સિંગલ ન લીધો

સ્મિથે સિંગલ ન લેવા પાછળનું ટેકનિકલ કારણ સમજાવતા કહ્યું કે, “અમે 10મી ઓવરમાં જ ચર્ચા કરી હતી. મેં બાબરને કહ્યું હતું કે એક ઓવર થોભી જા, હું નાની બાઉન્ડ્રીનો ફાયદો ઉઠાવીને વધુ રન લેવા માંગુ છું.” સ્મિથનો આ નિર્ણય સાચો સાબિત થયો હતો કારણ કે તેણે તે ઓવરમાં 4 સિક્સર ફટકારીને 32 રન બનાવ્યા હતા. સ્મિથે સ્વીકાર્યું કે કદાચ બાબર તે સમયે સિંગલ ન મળવાને કારણે થોડો નાખુશ હતો, પણ તે ટીમની રણનીતિ હતી.

ડ્રેસિંગ રૂમનો વિવાદ અને સ્પષ્ટતા

અગાઉ અહેવાલો આવ્યા હતા કે બાબર મેચ બાદ પ્રેઝન્ટેશનમાં સામેલ થયો ન હતો અને ડ્રેસિંગ રૂમમાં જ રહ્યો હતો. જોકે, ટ્રેનિંગ સેશન દરમિયાન બંને ખેલાડીઓને હળવા મૂડમાં વાતચીત કરતા જોઈને ચાહકોએ હવે રાહતનો શ્વાસ લીધો છે. સ્મિથના નિવેદને સાબિત કરી દીધું છે કે મેદાન પરની ગરમાગરમી મેદાન પર જ રહી ગઈ છે અને બંને વચ્ચેના સંબંધો મધુર છે.