ટ્રેન્ડિંગસ્પોર્ટ્સ

એશિયા કપની સેમિફાઈનલ હારી જતાં પાકિસ્તાની કપ્તાન ફાતિમા રડવા લાગી

Pakistan vs Sri Lanka Womens Asia Cup 2026: વુમન્સ એશિયા કપ 2026ની સેમિફાઈનલમાં પાકિસ્તાનની કેપ્ટન ફાતિમા સનાએ બેટ અને બોલ બંનેથી શાનદાર પ્રદર્શન કર્યું, છતાં પોતાની ટીમને ફાઈનલ સુધી પહોંચાડી શકી નહીં. દુબઈ ઈન્ટરનેશનલ ક્રિકેટ સ્ટેડિયમમાં રમાયેલી રોમાંચક સેમિફાઈનલમાં શ્રીલંકાએ પાકિસ્તાનને 4 વિકેટે હરાવી ફાઈનલમાં પ્રવેશ કર્યો. મેચ પૂરી થયા બાદ ફાતિમા પોતાની લાગણીઓ પર કાબૂ રાખી શકી નહોતી અને તેની આંખોમાં આંસુ આવી ગયા હતા.

ફાતિમાની કપ્તાની પારીથી પાકિસ્તાન 130 સુધી પહોંચ્યું

ટોસ હારીને પ્રથમ બેટિંગ કરવા ઉતરેલી પાકિસ્તાન ટીમની શરૂઆત સારી રહી નહોતી. સતત વિકેટો પડતાં ટીમ દબાણમાં આવી ગઈ હતી. આવા સમયે કેપ્ટન ફાતિમા સનાએ જવાબદારી સંભાળી હતી.

ફાતિમાએ 36 બોલમાં અણનમ 47 રનની મહત્વપૂર્ણ પારી રમી હતી. ભારે ગરમી વચ્ચે તેને ક્રેમ્પ્સની સમસ્યા થઈ હોવા છતાં તે અંત સુધી ક્રીઝ પર ટકી રહી હતી. તુબા હસન સાથે મળીને તેણે છેલ્લી ચાર ઓવરમાં ઝડપથી રન બનાવતાં પાકિસ્તાનને 6 વિકેટે 130 રન સુધી પહોંચાડ્યું હતું.

બોલિંગમાં પણ ફાતિમાનું તોફાન

131 રનના લક્ષ્યનો બચાવ કરવા ઉતરેલા પાકિસ્તાનને ફાતિમાએ બોલિંગમાં પણ જબરદસ્ત શરૂઆત અપાવી હતી. પોતાની પ્રથમ જ ઓવરમાં તેણે સતત બોલ પર શ્રીલંકાની કેપ્ટન ચમારી અટાપટ્ટુ અને સંજના કવિંદીને આઉટ કરી દીધી હતી. એક સમયે શ્રીલંકાનો સ્કોર 33 રનમાં 4 વિકેટ હતો અને મેચ પાકિસ્તાન તરફ ઝૂકતી દેખાઈ રહી હતી.

હર્ષિતા-કવિશાની ભાગીદારીએ મેચ ફેરવી

શ્રીલંકા મુશ્કેલીમાં હતું ત્યારે હર્ષિતા સમરવિક્રમા અને કવિશા દિલહારીએ મેચની દિશા બદલી નાખી.

હર્ષિતાએ 36 અને કવિશાએ 33 રન બનાવ્યા હતા. બંનેએ મળીને 67 રનની મહત્વપૂર્ણ ભાગીદારી નોંધાવી અને શ્રીલંકાને જીતની નજીક પહોંચાડ્યું.

ફાતિમા સનાએ ફરી મેચમાં પાકિસ્તાનની વાપસી કરાવવાનો પ્રયાસ કર્યો. તેણે હર્ષિતા અને કવિશા બંનેને આઉટ કરીને પોતાના ચાર વિકેટ પૂર્ણ કર્યા.

અંતિમ ઓવરોમાં શ્રીલંકાએ છીનવી જીત

મેચનો અંતિમ તબક્કો ભારે રોમાંચક રહ્યો. કૌશાની નુત્યંગના અને નીલાક્ષિકા સિલ્વાએ અંતિમ જવાબદારી સંભાળી હતી.

નુત્યંગનાએ ફાતિમાની બોલિંગ પર પોતાના આંતરરાષ્ટ્રીય કરિયરનો પ્રથમ છગ્ગો ફટકાર્યો, જ્યારે સિલ્વાએ મહત્વપૂર્ણ ચોગ્ગો મારી શ્રીલંકાને ફાઈનલમાં પહોંચાડ્યું.

શ્રીલંકાએ 4 વિકેટે મેચ જીતી લીધી અને પાકિસ્તાનની ફાઈનલમાં પહોંચવાની આશા તૂટી ગઈ.

47 રન અને 4 વિકેટ, છતાં આંખોમાં આંસુ

ફાતિમા સનાએ મેચમાં અણનમ 47 રન બનાવ્યા અને બોલિંગમાં 4 વિકેટ ઝડપી હતી. તેના શાનદાર ઓલરાઉન્ડ પ્રદર્શન બદલ તેને પ્લેયર ઓફ ધ મેચ જાહેર કરવામાં આવી હતી.

પરંતુ વ્યક્તિગત સફળતા પણ ટીમની હારનું દુઃખ ઓછું કરી શકી નહીં. મેચ બાદ ફાતિમા રડી પડી હતી. ટીમને ફાઈનલમાં પહોંચાડવા માટે તેણે છેલ્લી ક્ષણ સુધી પ્રયાસ કર્યો હોવા છતાં જીત હાથમાંથી સરકી ગઈ હતી.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ફિલ્ડિંગની ભૂલો પડી ભારે

મેચ બાદ ફાતિમાએ સ્વીકાર્યું કે પાકિસ્તાનની ફિલ્ડિંગમાં થયેલી ભૂલો ટીમને ભારે પડી હતી. તેના મતે 130 રનનો સ્કોર બચાવી શકાય તેવો હતો, પરંતુ ટીમને બેટિંગમાં પણ વધુ સુધારો કરવાની જરૂર છે.

શ્રીલંકાની આ પાકિસ્તાન સામે વુમન્સ એશિયા કપની સેમિફાઈનલમાં સતત ત્રીજી જીત છે.

હવે 13 સપ્ટેમ્બરે ફાઈનલમાં શ્રીલંકાનો મુકાબલો ભારત સામે થશે, જ્યાં એશિયન ચેમ્પિયન બનવા માટે બંને ટીમો આમને-સામને રહેશે.

આ પણ વાંચો: BRICS summit: ભારત માટે ગ્લોબલ સાઉથનો અવાજ બનવાનો મોકો, શું ભારત આ તક ઝડપી શકશે?

Back to top button