ગુજરાતમાં 16 જુલાઈથી ફરી વરસાદી માહોલ, અનેક જિલ્લાઓમાં આગાહી
Rainy Weather In Gujarat : ગુજરાતમાં છેલ્લા ત્રણથી ચાર દિવસથી ભારે વરસાદે વિરામ લીધો છે. એકાદ-બે સ્થળોએ હળવા વરસાદી ઝાપટાં સિવાય રાજ્યના મોટાભાગના વિસ્તારોમાં વરસાદ નોંધાયો નથી. જોકે આકાશમાં વાદળછાયું વાતાવરણ યથાવત છે. હવામાન વિભાગના અનુમાન મુજબ 15 જુલાઈ સુધી રાજ્યમાં ભારે વરસાદની શક્યતા નથી, પરંતુ 16 જુલાઈથી ફરી વરસાદી સિસ્ટમ સક્રિય થતાં અનેક જિલ્લાઓમાં હળવાથી મધ્યમ વરસાદ પડી શકે છે.
13 અને 14 જુલાઈએ ક્યાં વરસી શકે વરસાદ?
હવામાન વિભાગ અનુસાર જૂનાગઢ, ગીર સોમનાથ, અમરેલી, ભાવનગર, ભરૂચ, વડોદરા, છોટા ઉદેપુર, નર્મદા, સુરત, તાપી, ડાંગ, નવસારી અને વલસાડ જિલ્લામાં છૂટાછવાયા સ્થળોએ હળવાથી મધ્યમ વરસાદની શક્યતા છે. જ્યારે અમદાવાદ, ગાંધીનગર, રાજકોટ, મહેસાણા સહિતના મોટા ભાગના જિલ્લાઓમાં વરસાદની શક્યતા ઓછી છે.
15થી 18 જુલાઈ દરમિયાન વરસાદી માહોલ પરત ફરશે
15થી 18 જુલાઈ દરમિયાન દેવભૂમિ દ્વારકા, પોરબંદર, રાજકોટ, જૂનાગઢ, ગીર સોમનાથ, અમરેલી, ભાવનગર, બોટાદ, સુરેન્દ્રનગર, અમદાવાદ, ગાંધીનગર, સાબરકાંઠા, અરવલ્લી, મહીસાગર, ખેડા, આણંદ, પંચમહાલ, દાહોદ, વડોદરા, ભરૂચ, નર્મદા, સુરત, તાપી, નવસારી, ડાંગ અને વલસાડ જિલ્લામાં હળવાથી મધ્યમ વરસાદની આગાહી કરવામાં આવી છે.
19થી 22 જુલાઈ દરમિયાન વધુ વિસ્તારોમાં વરસાદની સંભાવના
નેશનલ સેન્ટર ફોર મીડિયમ રેન્જ વેધર ફોરકાસ્ટિંગ (NCMRWF) અનુસાર 19થી 22 જુલાઈ દરમિયાન કચ્છ, જામનગર, દેવભૂમિ દ્વારકા, પોરબંદર, બનાસકાંઠા, મોરબી, રાજકોટ, ગીર સોમનાથ, જૂનાગઢ, અમરેલી, ભાવનગર, ભરૂચ, નર્મદા, વડોદરા, આણંદ, ખેડા, છોટા ઉદેપુર, પંચમહાલ, દાહોદ, મહીસાગર, ગાંધીનગર, અરવલ્લી, સાબરકાંઠા, સુરત, નવસારી, વલસાડ, ડાંગ અને તાપી જિલ્લામાં છૂટાછવાયા સ્થળોએ વરસાદ થઈ શકે છે. જોકે હાલ ભારે વરસાદની કોઈ સંભાવના વ્યક્ત કરવામાં આવી નથી.
અમદાવાદ સહિતના શહેરોમાં કેવું રહેશે હવામાન?
- અમદાવાદ: વાદળછાયું વાતાવરણ રહેશે. મહત્તમ તાપમાન 38°C અને લઘુત્તમ 28°C રહેવાની શક્યતા.
- રાજકોટ: વાદળછાયા વાતાવરણ વચ્ચે હળવા વરસાદની સંભાવના. મહત્તમ 36°C, લઘુત્તમ 27°C.
- સુરત: વાદળછાયું વાતાવરણ સાથે છૂટાછવાયા હળવા વરસાદની શક્યતા. મહત્તમ 33°C, લઘુત્તમ 28°C.
- વડોદરા: વાદળછાયું વાતાવરણ અને હળવા વરસાદની સંભાવના. મહત્તમ 36°C, લઘુત્તમ 28°C.
માછીમારો માટે મહત્વની ચેતવણી
હવામાન વિભાગે 16 જુલાઈ સુધી ગુજરાતના દરિયાકાંઠે 45થી 55 કિમી પ્રતિ કલાક અને ઝાટકામાં 65 કિમી પ્રતિ કલાક સુધી પવન ફૂંકાવાની શક્યતા વ્યક્ત કરી છે. જખૌ, માંડવી, મુંદ્રા, ન્યૂ કંડલા, નવલખી, સલાયા, ઓખા, બેડી, સિક્કા અને પોરબંદર સહિતના દરિયાકાંઠા વિસ્તારોમાં સમુદ્ર ઉગ્ર બની શકે છે.
દેવભૂમિ દ્વારકા, ગીર સોમનાથ, જૂનાગઢ, કચ્છ અને પોરબંદરના દરિયામાં ઊંચા મોજાં ઉછળવાની સંભાવના હોવાથી માછીમારોને આગામી સૂચના સુધી દરિયો ન ખેડવાની સલાહ આપવામાં આવી છે.
હાલ ભારે વરસાદની શક્યતા નહીં
હવામાન વિભાગના હાલના અનુમાન મુજબ આગામી થોડા દિવસો દરમિયાન રાજ્યમાં ભારે વરસાદની શક્યતા ઓછી છે. જોકે 16 જુલાઈ બાદ વરસાદી માહોલ ફરી સક્રિય બનતાં અનેક જિલ્લાઓમાં હળવાથી મધ્યમ વરસાદ નોંધાઈ શકે છે. લોકો અને ખેડૂતોને હવામાન વિભાગના તાજા અપડેટ પર સતત નજર રાખવાની સલાહ આપવામાં આવી છે.
