‘જરૂર મુજબ જ તેલ-ગેસનો ઉપયોગ કરો’, મધ્ય પૂર્વમાં તણાવ વચ્ચે PM મોદીનું મોટું નિવેદન
Narendra Modi: પ્રધાનમંત્રી નરેન્દ્ર મોદીએએ રવિવારે (10 મે, 2026) પશ્ચિમ એશિયામાં ચાલી રહેલા સંકટ વચ્ચે દેશના નાગરિકોને પેટ્રોલિયમ ઉત્પાદનોનો સંયમપૂર્વક ઉપયોગ કરવાની અપીલ કરી છે. તેમણે કહ્યું કે ભારત મોટા પાયે ઈંધણનું આયાત કરે છે, તેથી પેટ્રોલ, ડીઝલ અને ગેસનો સમજદારીપૂર્વક ઉપયોગ કરવો જરૂરી છે.
હૈદરાબાદમાં 9,377 કરોડ રૂપિયાના વિકાસ પ્રોજેક્ટ્સનું ઉદ્ઘાટન કર્યા બાદ પીએમ મોદીએ જણાવ્યું કે આજનો સમય પેટ્રોલ-ડીઝલ અને ગેસ જેવી વસ્તુઓનો સંયમથી ઉપયોગ કરવાની માંગ કરે છે. તેમણે કહ્યું કે આયાતી પેટ્રોલિયમ ઉત્પાદનોનો ઉપયોગ માત્ર જરૂર મુજબ જ કરવો જોઈએ, જેથી વિદેશી ચલણની બચત થાય અને વૈશ્વિક સંકટની અસર પણ ઓછી થાય.
ભારત રિન્યુએબલ ઊર્જામાં આગળ વધી રહ્યું છે- PM મોદી
પીએમ મોદીએ જણાવ્યું કે ભારત નવીનીકરણીય અને વૈકલ્પિક ઊર્જાના ક્ષેત્રમાં ઝડપથી આગળ વધી રહ્યું છે. સોલર ઊર્જા ઉત્પાદનમાં ભારત વિશ્વના ટોચના દેશોમાં સામેલ છે. સાથે જ પેટ્રોલમાં ઇથેનોલ મિશ્રણને પ્રોત્સાહન આપી આયાત પરની નિર્ભરતા ઘટાડવામાં મહત્વપૂર્ણ પ્રગતિ થઈ રહી છે.
ઊર્જા વ્યૂહરચના પર ભાર
તેમણે કહ્યું કે સરકારનું પહેલું લક્ષ્ય દરેક ઘર સુધી LPG પહોંચાડવાનું હતું, અને હવે સસ્તા PNG ગેસ સપ્લાયનું વિસ્તરણ ઝડપથી થઈ રહ્યું છે. સાથે જ CNG આધારિત ઇકોસિસ્ટમને પણ પ્રોત્સાહન આપવામાં આવી રહ્યું છે, જેથી ઊર્જા સ્ત્રોતોમાં વિવિધતા લાવી શકાય.
વિકાસ પ્રોજેક્ટ્સનું ઉદ્ઘાટન
તેલંગાણામાં પીએમ મોદીએ અનેક મહત્વપૂર્ણ ઇન્ફ્રાસ્ટ્રક્ચર પ્રોજેક્ટ્સનું ઉદ્ઘાટન કર્યું. તેમાં હૈદરાબાદ-પણજી ઇકોનોમિક કોરિડોર હેઠળ રાષ્ટ્રીય ધોરીમાર્ગ 167ને ચાર લેન બનાવવાનો પ્રોજેક્ટ, ઝહીરાબાદ ઔદ્યોગિક વિસ્તારનો વિકાસ, કાઝીપેટ-વિજયવાડા રેલવે મલ્ટી-ટ્રેકિંગ પ્રોજેક્ટના ભાગો, ગ્રીનફિલ્ડ POL ટર્મિનલ, કાઝીપેટ રેલ બાયપાસ અને વારંગલનો કાકતીયા મેગા ટેક્સટાઇલ પાર્ક સામેલ છે.
PM MITRA પાર્ક
આ ટેક્સટાઇલ પાર્ક લગભગ 1,700 કરોડ રૂપિયાના ખર્ચે તૈયાર થયો છે અને ભારતનો પહેલો સંપૂર્ણ રીતે કાર્યરત PM MITRA પાર્ક છે. તે કેન્દ્ર સરકારના ‘5F વિઝન’ (Farm to Fibre to Factory to Fashion to Foreign) હેઠળ વિકસાવવામાં આવ્યો છે, જેનો હેતુ ટેક્સટાઇલ વેલ્યુ ચેઇનને મજબૂત બનાવી નિકાસ વધારવાનો છે.
આ પણ વાંચો: એર ઇન્ડિયાએ ત્રણ વર્ષમાં 1,000થી વધુ કર્મચારીઓને કાઢી મૂક્યા, CEOએ જણાવ્યું કારણ
