હિમાચલ પ્રદેશમાં પાકિસ્તાની ગુબ્બારા દેખાયા? પોલીસે વાયુસેનાનો સંપર્ક કર્યો, સ્થાનિક લોકો ચિંતાનો માહોલ

હિમાચલ પ્રદેશ 17 ડિસેમ્બર 2025: હિમાચલ પ્રદેશમાંથી ચોંકાવનારા સમાચાર સામે આવી રહ્યા છે. છેલ્લા કેટલાક અઠવાડિયાથી રાજ્યના વિવિધ જિલ્લાઓમાં પાકિસ્તાની ગુબ્બારા જોવા મળી રહ્યા છે. આ ગુબ્બારા પર PIA (પાકિસ્તાન ઇન્ટરનેશનલ એરલાઇન્સ) અથવા પાકિસ્તાની ધ્વજ છાપેલા છે. આ ગુબ્બારા જોવા મળતા સ્થાનિક રહેવાસીઓમાં ચિંતા ફેલાઈ ગઈ છે. હિમાચલ પ્રદેશ પોલીસે આ મામલે પંજાબ અને રાજસ્થાન પોલીસનો સંપર્ક કર્યો છે અને આ ગુબ્બારાઓના સ્ત્રોતને શોધવાનો પ્રયાસ કરી રહ્યા છે.

ગુબ્બારા પર શું છાપેલું છે?

તાજેતરમાં, રાજ્યના દૌલતપુરના ચેલેટ ગામમાં, એક વ્યક્તિને તેની છત પર “PIA” લખેલું વિમાન આકારનું બલૂન મળ્યું. ગ્રામજનોએ પોલીસને જાણ કરી. પોલીસે ઘટનાસ્થળે પહોંચીને ગુબ્બારા જપ્ત કર્યા. અગાઉ, 8 ડિસેમ્બરે, ગાગરેટના તાતેહરા ગામમાં ત્રણ એક સમાન ગુબ્બારાઓ મળી આવ્યા હતા. આ ગુબ્બારાઓ પર પાકિસ્તાની ધ્વજ અને “આઈ લવ પાકિસ્તાન” લખેલા શબ્દો હતા. છેલ્લા કેટલાક મહિનામાં હમીરપુર અને કાંગડા જિલ્લામાં પણ આવા જ ગુબ્બારા મળી આવ્યા છે.

પોલીસે વાયુસેનાનો પણ સંપર્ક કર્યો

હિમાચલ પોલીસે રાજ્યના વિવિધ જિલ્લાઓમાં જોવા મળતા ગુબ્બારાઓ અંગે ભારતીય વાયુસેનાના અધિકારીઓનો પણ સંપર્ક કર્યો છે. પોલીસે જણાવ્યું હતું કે, “અત્યાર સુધી, આ ગુબ્બારાઓમાંથી કોઈ શંકાસ્પદ ઉપકરણો, સર્વેલન્સ ડિવાઇસ, ટ્રેકર અથવા અન્ય વસ્તુઓ મળી નથી. અમે પાકિસ્તાનની સરહદે આવેલા સરહદી રાજ્યોમાં અમારા સમકક્ષોનો સંપર્ક કર્યો છે, જ્યાં સમાન ગુબ્બારાઓ મળી આવ્યા હતા”

પોલીસે અન્ય કોઈ શંકાસ્પદ વસ્તુની હાજરીને નકારી કાઢવા માટે આસપાસના વિસ્તારોમાં પણ તપાસ કરી છે.

આ પણ વાંચો: માફી માંગો નહીંતર… હિજાબ વિવાદ પર પાકિસ્તાની ડોને નીતિશ કુમારને આપી ધમકી