સિંદરી બળી પણ વળ નહીં જાય! ભારત સાથે વાત કરવા પાકિસ્તાન રઘવાયું પણ ટણી મુકતું નથી

નવી દિલ્હી, 30 ઓગસ્ટ 2025: પહેલગામ હુમલા પછી ભારતે અપનાવેલા આક્રમક વલણથી પાકિસ્તાન બેચેન થઈ ગયું છે. તે વિચારી રહ્યું છે કે કોઈક રીતે ભારત સાથે વાતચીત ફરી શરૂ કરવી જોઈએ. જોકે, શરમના ડરને કારણે, પાકિસ્તાન ખુલ્લેઆમ વાતચીતનો પ્રસ્તાવ મૂકી શકતું નથી. પાકિસ્તાનના વિદેશ પ્રધાન અને નાયબ વડા પ્રધાન ઇશાક ડારે કહ્યું કે તેઓ ભારત સાથે સન્માનપૂર્વક વાત કરવા તૈયાર છે. તેમણે એમ પણ કહ્યું કે, ‘પાકિસ્તાન વાતચીતની ભીખ નહીં માંગે.’

પાકિસ્તાન કાશ્મીર મુદ્દો છોડતું નથી

ભારતે સ્પષ્ટપણે કહ્યું છે કે જો હવે પાકિસ્તાન સાથે કોઈ વાતચીત થશે તો તે POK પરત મેળવવા પર થશે. મીડિયા સાથે વાત કરતા ઇશાક ડારે કહ્યું કે, પાકિસ્તાન ભારત સાથે સન્માનજનક રીતે સંયુક્ત વાતચીત શરૂ કરવા તૈયાર છે. તેમણે કહ્યું કે, તેઓ કાશ્મીર સહિતના વણઉકેલાયેલા મુદ્દાઓ પર વાત કરવા માંગે છે. અહીં ઉલ્લેખનિય છે કે, ભારત અને પાકિસ્તાન વચ્ચે સંયુક્ત વાતચીત 2003 માં જનરલ પરવેઝ મુશર્રફના સમયમાં શરૂ થઈ હતી. 2008 માં મુંબઈમાં થયેલા આતંકવાદી હુમલા પછી આ વાતચીત બંધ થઈ ગઈ હતી.

પોતાની પીઠ થપથપાવતા પાકિસ્તાની વિદેશ મંત્રીએ કહ્યું કે ભારત સાથેના તાજેતરના તણાવ વચ્ચે દુનિયાએ તેમનું સાંભળ્યું છે અને તેમનો પક્ષ સ્વીકાર્યો છે. અહીં ઉલ્લેખનિય છે કે, પહેલગામમાં થયેલા આતંકવાદી હુમલા બાદ ભારતે 7 મેના રોજ પાકિસ્તાનમાં આતંકવાદી ઠેકાણાઓને નિશાન બનાવ્યા હતા. તેને ‘ઓપરેશન સિંદૂર’ નામ આપવામાં આવ્યું હતું. બીજી તરફ, આતંકવાદી ઠેકાણાઓના વિનાશ પછી, પાકિસ્તાન ગભરાઈ ગયું અને હુમલાઓ શરૂ કરી દીધા.

એક પ્રશ્નના જવાબમાં ડારે કહ્યું કે પાકિસ્તાની સેનાએ ભારત સાથેના સંઘર્ષમાં હવા અને જમીન પર પોતાની તાકાત સાબિત કરી. તેમણે ચેતવણી આપી હતી કે “કોઈપણ ઉશ્કેરણી”નો સંપૂર્ણ જવાબ આપવામાં આવશે.

આ પણ વાંચો: VIDEO: દિગ્વેશ રાઠીએ ફરી મેદાન પર ઝઘડો કર્યો, નીતિશ રાણાએ બરાબરનો જવાબ આપી દીધો