‘નીરવ મોદી ભારતની જેલમાં હોવો જોઈએ’: પ્રીતી પટેલનું મોટું નિવેદન
Priti Patel’s big statement : બ્રિટનની પૂર્વ ગૃહમંત્રી અને કન્ઝર્વેટિવ પાર્ટીની શેડો વિદેશ સચિવ પ્રીતી પટેલે ફરાર હીરા વેપારી નીરવ મોદીના ભારત પ્રત્યર્પણમાં થઈ રહેલા વિલંબ પર કડક પ્રતિક્રિયા આપી છે. તેમણે સ્પષ્ટ શબ્દોમાં કહ્યું કે નીરવ મોદી બ્રિટનમાં નહીં પરંતુ ભારતની જેલમાં હોવો જોઈએ. તેમણે આ સમગ્ર મામલાને બ્રિટિશ ન્યાય પ્રણાલીના દુરુપયોગ તરીકે ગણાવ્યો.
‘ધ ટેલિગ્રાફ’ના પોડકાસ્ટ ‘ધ ડાયમન્ડ કિંગ’ દરમિયાન પ્રીતી પટેલે જણાવ્યું કે નીરવ મોદીના પ્રત્યર્પણમાં લાંબા સમયથી થઈ રહેલા વિલંબને કારણે ભારત સરકાર બ્રિટન સાથેના સહકારથી નિરાશ હતી. તેમના જણાવ્યા મુજબ, જ્યાં સુધી ફરાર આરોપીઓ સામે કાર્યવાહી ન થાય ત્યાં સુધી ભારતે ગેરકાયદે પ્રવાસીઓ અને નિષ્ફળ આશ્રય અરજદારોને પરત મોકલવા જેવા મુદ્દાઓ પર સહકાર આપવામાં અનિચ્છા દર્શાવી હતી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
બ્રિટિશ ન્યાય પ્રણાલી પર સવાલ
પ્રીતી પટેલે પોતાના 2019થી 2022ના કાર્યકાળને યાદ કરતાં કહ્યું કે નીરવ મોદી અને અન્ય એક હાઈ-પ્રોફાઇલ કેસને કારણે ભારતે બ્રિટન પર સતત રાજદ્વારી દબાણ જાળવી રાખ્યું હતું. ભારતનો સ્પષ્ટ અભિગમ હતો કે જ્યાં સુધી ફરાર આરોપીઓ સામે કાર્યવાહી નહીં થાય ત્યાં સુધી અન્ય મુદ્દાઓ પર સહકાર સરળ નહીં બને.
તેમણે વધુમાં જણાવ્યું કે નીરવ મોદીનું વર્ષો સુધી બ્રિટનમાં રહેવું બ્રિટિશ ન્યાય પ્રણાલીનો ખુલ્લેઆમ દુરુપયોગ છે અને તે બ્રિટિશ કરદાતાઓનું પણ અપમાન છે. તેમણે ભારપૂર્વક કહ્યું કે કાયદેસરની પ્રક્રિયા પૂર્ણ કરીને નીરવ મોદીને ભારત મોકલવો જોઈએ જેથી તે અહીં પોતાના કેસનો સામનો કરી શકે.
પ્રત્યર્પણમાં વિલંબનું કારણ શું?
55 વર્ષીય નીરવ મોદી લગભગ 2 અબજ ડોલરના પંજાબ નેશનલ બેંક (PNB) કૌભાંડ અને મની લોન્ડરિંગ કેસમાં લંડનની પેન્ટનવિલ જેલમાં બંધ છે. ભારતની તપાસ એજન્સીઓ તેને ત્રણ અલગ-અલગ કેસોમાં શોધી રહી છે, જેમાં મની લોન્ડરિંગ, PNB કૌભાંડ અને તપાસ દરમિયાન પુરાવા સાથે ચેડાં તથા સાક્ષીઓને પ્રભાવિત કરવાનો આરોપ સામેલ છે.
બ્રિટનની અદાલતોએ પૂરતા પુરાવા હોવાના આધારે તેના પ્રત્યર્પણને મંજૂરી આપી હતી અને એપ્રિલ 2021માં સંબંધિત આદેશ પર હસ્તાક્ષર પણ થયા હતા. જોકે, માનવાધિકારના મુદ્દાઓને આધારે કરવામાં આવેલી કાનૂની અપીલો અને ગુપ્ત આશ્રય અરજીને કારણે પ્રક્રિયા લાંબી ખેંચાઈ.
તાજેતરમાં તેની આશ્રય અરજી નકારાયા બાદ નીરવ મોદીએ પ્રત્યર્પણ કેસ ફરીથી ખોલવાનો પ્રયાસ કર્યો હતો, જેને આ વર્ષે માર્ચમાં ઇંગ્લેન્ડની હાઈ કોર્ટે ફગાવી દીધો હતો. ઉપરાંત, ફ્રાન્સ સ્થિત યુરોપિયન માનવાધિકાર અદાલતમાં કરાયેલી તેની અંતિમ અપીલ પણ નિષ્ફળ રહી છે. હવે કાનૂની રીતે તેના ભારત પ્રત્યર્પણનો માર્ગ વધુ સ્પષ્ટ બન્યો હોવાનું માનવામાં આવી રહ્યું છે.
આ પણ વાંચો : આજનું હવામાન: બંગાળની ખાડીમાં ડિપ્રેશનની અસર, ગુજરાતમાં આજે ક્યાં ક્યાં વરસાદ થશે?
