મહારાષ્ટ્રના રાજકારણમાં મોટો ઉલટફેર થવાના સંકેત? શરદ પવાર અને પ્રફુલ્લ પટેલ વચ્ચે દોઢ કલાકની મુલાકાત

મુંબઈ: મહારાષ્ટ્રના રાજકારણમાં ફરી એકવાર રાષ્ટ્રવાદી કોંગ્રેસ પાર્ટી (NCP)ના બંને જૂથો વચ્ચે સંભવિત સમાધાનની ચર્ચાઓ તેજ બની છે. NCP (શરદચંદ્ર પવાર)ના વડા શરદ પવાર અને અજિત પવાર જૂથના વરિષ્ઠ નેતા પ્રફુલ્લ પટેલ વચ્ચે થયેલી મુલાકાત બાદ રાજકીય અટકળો શરૂ થઈ ગઈ છે. ખાસ વાત એ છે કે આ મુલાકાતનો એક વીડિયો સોશિયલ મીડિયા પર વાયરલ થયો છે, જેમાં શરદ પવાર 10 નવેમ્બર પછી બંને સાથે બેસીને ચર્ચા કરશે તેવું કહેતા સંભળાય છે.

જોકે, આ બેઠકનો ચોક્કસ એજન્ડા શું હશે તે અંગે હજુ કોઈ સ્પષ્ટતા કરવામાં આવી નથી. તેમ છતાં બંને જૂથો વચ્ચે સંભવિત સમાધાન અને મહારાષ્ટ્રની આગામી રાજકીય રણનીતિને લઈને ચર્ચાઓ શરૂ થઈ ગઈ છે.

હોસ્પિટલમાં શરદ પવારને મળવા પહોંચ્યા પ્રફુલ્લ પટેલ

શરદ પવાર હાલમાં મુંબઈની બ્રીચ કેન્ડી હોસ્પિટલમાં સારવાર અને મેડિકલ તપાસ માટે દાખલ છે. આ દરમિયાન અજિત પવારના નેતૃત્વવાળી NCPના રાષ્ટ્રીય કાર્યકારી અધ્યક્ષ પ્રફુલ્લ પટેલ તેમની મુલાકાત લેવા હોસ્પિટલ પહોંચ્યા હતા.

પ્રફુલ્લ પટેલે શરદ પવારના સ્વાસ્થ્યની પૂછપરછ કરી હતી. બંને નેતાઓ વચ્ચે લગભગ દોઢ કલાક સુધી મુલાકાત ચાલી હતી. આ મુલાકાત દરમિયાન સ્વાસ્થ્યની સાથે રાજકીય મુદ્દાઓ પર પણ ચર્ચા થઈ હોવાનું સામે આવ્યું છે.

10 નવેમ્બર પછી સાથે બેસીને ચર્ચા કરવાની વાત

આ મુલાકાતનો વીડિયો સોશિયલ મીડિયા પર વાયરલ થયો છે. વીડિયોમાં શરદ પવાર અને પ્રફુલ્લ પટેલ વચ્ચેની વાતચીત સાંભળવા મળે છે.

શરદ પવાર પ્રફુલ્લ પટેલને કહેતા સંભળાય છે કે, ‘ત્યાં રહેવું પડે છે, એ મને ખબર છે. પરંતુ કેટલા સમય સુધી રહેવાનું છે તે જણાવો. ત્યારબાદ આપણે નક્કી કરીશું.’

તેના જવાબમાં પ્રફુલ્લ પટેલ કહે છે કે, ‘હું 10 તારીખ પછી મુંબઈમાં રહીશ. તમે જણાવો કે ક્યારે બેસીને ચર્ચા કરવાની છે. હું તૈયાર છું.’

શરદ પવારની આ વાતચીત બાદ મહારાષ્ટ્રના રાજકીય વર્તુળોમાં અનેક અટકળો શરૂ થઈ ગઈ છે. ખાસ કરીને NCPના બંને જૂથો ફરી એક થઈ શકે છે કે કેમ તે અંગે ચર્ચાઓ થઈ રહી છે.

શું NCPના બંને જૂથો વચ્ચે થશે સમાધાન?

મહારાષ્ટ્રની રાજનીતિમાં NCPના બંને જૂથો વચ્ચે સમાધાનની શક્યતાને લઈને અગાઉ પણ અનેકવાર ચર્ચાઓ થઈ ચૂકી છે. હવે શરદ પવાર અને પ્રફુલ્લ પટેલ વચ્ચેની મુલાકાતે આ ચર્ચાઓને ફરી વેગ આપ્યો છે.

પ્રફુલ્લ પટેલે પણ મુલાકાત બાદ સ્વીકાર્યું હતું કે શરદ પવાર સાથે રાજકીય મુદ્દાઓ પર વાતચીત થઈ હતી. જોકે, તેમણે ચર્ચાની વિગત જાહેર કરી નહોતી.

તેમણે જણાવ્યું હતું કે તેઓ શરદ પવારના સ્વાસ્થ્યની ખબર પૂછવા માટે હોસ્પિટલ પહોંચ્યા હતા અને તેમની તબિયત સારી છે.

હાલમાં 10 નવેમ્બર પછી બંને નેતાઓ વચ્ચે થનારી સંભવિત બેઠક પર સૌની નજર છે. આ બેઠક માત્ર વ્યક્તિગત સંબંધો પૂરતી મર્યાદિત રહેશે કે પછી મહારાષ્ટ્રના રાજકારણમાં નવા સમીકરણો રચાશે તે જોવું રસપ્રદ રહેશે.

PM મોદીએ પણ ફોન કરીને પૂછ્યા હતા શરદ પવારના ખબરઅંતર

ઉલ્લેખનીય છે કે શરદ પવારને ઉધરસ અને શ્વાસ લેતી વખતે છાતીમાં દુખાવાની ફરિયાદ થતાં 2 નવેમ્બરે પુણેની રૂબી હોલ ક્લિનિકમાં દાખલ કરવામાં આવ્યા હતા.

ત્યાંથી રજા મળ્યાના એક દિવસ બાદ બુધવારે તેમને નિયમિત મેડિકલ તપાસ અને આગળની સારવાર માટે મુંબઈની બ્રીચ કેન્ડી હોસ્પિટલમાં દાખલ કરવામાં આવ્યા હતા.

શરદ પવાર હોસ્પિટલમાં દાખલ થયા બાદ વડાપ્રધાન નરેન્દ્ર મોદીએ પણ ફોન કરીને તેમના ખબરઅંતર પૂછ્યા હતા.

શરદ પવારના નજીકના વ્યક્તિ અને પારિવારિક મિત્ર વિઠ્ઠલ મણિયારના જણાવ્યા અનુસાર, વડાપ્રધાને તેમને આરામ કરવાની અને સ્વાસ્થ્યનું ધ્યાન રાખવાની સલાહ આપી હતી. આ દરમિયાન તેમણે સુપ્રિયા સુળે અને શરદ પવાર બંનેને મળીને દેશ સંભાળવાની વાત પણ કરી હોવાનું જણાવાયું છે.

હવે 10 નવેમ્બર પછીના રાજકીય ઘટનાક્રમ પર નજર

શરદ પવાર અને પ્રફુલ્લ પટેલ વચ્ચેની મુલાકાતે મહારાષ્ટ્રના રાજકારણમાં નવી ચર્ચાઓને જન્મ આપ્યો છે. જો બંને જૂથો વચ્ચે સમાધાન થાય તો રાજ્યના રાજકીય સમીકરણોમાં મોટો ફેરફાર જોવા મળી શકે છે.

જોકે, હજુ સુધી કોઈ સત્તાવાર સમાધાન કે ગઠબંધનની જાહેરાત કરવામાં આવી નથી. તેથી 10 નવેમ્બર પછી બંને નેતાઓ વચ્ચે થનારી ચર્ચા બાદ જ આગામી રાજકીય દિશા સ્પષ્ટ થશે.

આ પણ વાંચો: UPI પેમેન્ટ હંમેશાં મફત નહીં રહે? સુપ્રીમ કોર્ટમાં કેન્દ્ર સરકારનો મોટો ખુલાસો