લખીમપુર ખીરી: ઉત્તર પ્રદેશના લખીમપુર ખીરી જિલ્લામાં એક ખાનગી સ્કૂલની અંદર શિક્ષિકાની ગોળી મારી હત્યા કરવાની ચકચારી ઘટના સામે આવી છે. પોલીસે મૃતક શિક્ષિકાની ઓળખ 26 વર્ષીય નિશાત ફાતિમા અને આરોપીની ઓળખ 28 વર્ષીય સઉદ અન્સારી તરીકે કરી છે. શિક્ષિકાને ગોળી માર્યા બાદ આરોપીએ પણ પોતાને ગોળી મારી હતી અને બંનેનાં ઘટનાસ્થળે મોત થયાં હોવાનું પોલીસે જણાવ્યું છે.

સ્કૂલમાં ઘૂસ્યો હતો સઉદ અન્સારી

ઘટના 21 સપ્ટેમ્બર, 2026ના રોજ સદર કોતવાલી પોલીસ સ્ટેશન વિસ્તારના શાહપુરા કોઠી ખાતે આવેલી ચિલ્ડ્રન્સ એકેડમી સ્કૂલમાં બની હતી. પોલીસને સવારે આશરે 11.30 વાગ્યે ફાયરિંગની જાણ થઈ હતી. તે સમયે સ્કૂલમાં મોટી સંખ્યામાં બાળકો અને સ્ટાફ હાજર હતા.

પોલીસના જણાવ્યા અનુસાર સઉદ અન્સારી નિશાત ફાતિમાને મળવા માટે સ્કૂલમાં આવ્યો હતો. ત્યારબાદ તે શિક્ષિકાને ક્લાસમાંથી બહાર લઈ ગયો હતો. બંને વચ્ચે વાતચીત દરમિયાન સઉદે તેની પાસે રહેલા દેશી હથિયારથી નિશાત પર ગોળીબાર કર્યો હોવાનું પ્રાથમિક તપાસમાં સામે આવ્યું છે.

CCTV ફૂટેજ આવ્યું સામે

ઘટના સાથે જોડાયેલ CCTV ફૂટેજ પણ સામે આવ્યું છે. તેમાં સઉદ અન્સારી નિશાત ફાતિમાને પકડીને સ્કૂલના અન્ય ભાગ તરફ લઈ જતો દેખાય છે. પોલીસ હવે CCTV ફૂટેજના આધારે આરોપી સ્કૂલમાં કેવી રીતે પ્રવેશ્યો, ઘટના પહેલાં શું બન્યું અને સમગ્ર ઘટનાક્રમ શું હતો તેની તપાસ કરી રહી છે.

ગોળીબારથી વિદ્યાર્થીઓમાં ફફડાટ

સ્કૂલ પરિસરમાં અચાનક ગોળીબારનો અવાજ સંભળાતા વિદ્યાર્થીઓ અને સ્ટાફમાં ભારે ગભરાટ ફેલાયો હતો. ઘટનાની જાણ થતાં પોલીસ અને ફોરેન્સિક ટીમ ઘટનાસ્થળે પહોંચી હતી. વિસ્તારને કોર્ડન કરીને પુરાવા એકત્ર કરવામાં આવ્યા હતા અને સ્કૂલ સ્ટાફની પણ પૂછપરછ શરૂ કરવામાં આવી હતી.

બંને વચ્ચેના સંબંધોની તપાસ

પોલીસના પ્રાથમિક નિવેદન મુજબ નિશાત ફાતિમા અને સઉદ અન્સારી એકબીજાને લાંબા સમયથી ઓળખતા હતા. કેટલાક અહેવાલોમાં બંને વચ્ચે વ્યક્તિગત સંબંધ અને વિવાદ હોવાનો દાવો કરવામાં આવ્યો છે, પરંતુ ઘટનાના ચોક્કસ કારણ અંગે પોલીસ તપાસ હજુ ચાલુ છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

સ્કૂલની સુરક્ષા વ્યવસ્થા પણ તપાસના ઘેરામાં

ઘટના બાદ સૌથી મોટો સવાલ એ ઊભો થયો છે કે હથિયાર લઈને એક વ્યક્તિ સ્કૂલની અંદર કેવી રીતે પ્રવેશી શક્યો. લખીમપુર ખીરી પોલીસ સ્કૂલની સુરક્ષા વ્યવસ્થા, CCTV કવરેજ અને મુલાકાતીઓના પ્રવેશ માટે અમલમાં રહેલી વ્યવસ્થાની પણ તપાસ કરી રહી છે.

આ ઘટનાથી વિદ્યાર્થીઓના વાલીઓમાં પણ ચિંતા જોવા મળી છે. પોલીસે સમગ્ર ઘટનાક્રમ અને તેની પાછળના કારણો સ્પષ્ટ કરવા માટે પુરાવા અને CCTV ફૂટેજના આધારે વધુ તપાસ હાથ ધરી છે.

આ પણ વાંચો: રાજ્યસભા ચૂંટણીની તારીખ જાહેર થઈ, 16 ઓક્ટોબરે થશે મતદાન