Hardeep Singh Puri Nomination Controversy: મધ્યપ્રદેશમાં યોજાનારી રાજ્યસભાની પેટાચૂંટણી માટે ઉમેદવારી પત્રોની ચકાસણી ટાણે જ મોટો રાજકીય વિવાદ સામે આવ્યો છે. મધ્યપ્રદેશ કોંગ્રેસના અટેર વિધાનસભા મતવિસ્તારના ધારાસભ્ય હેમંત કટારેએ ભાજપના ઉમેદવાર અને કેન્દ્રીય મંત્રી હરદીપ સિંહ પુરીના નામાંકન પત્ર સામે ગંભીર સવાલો ઉઠાવીને રિટર્નિંગ ઓફિસર સમક્ષ સત્તાવાર વાંધો નોંધાવ્યો છે. મધ્યપ્રદેશ કોંગ્રેસ પ્રમુખ જીતુ પટવારીએ ઇ-મેઇલ મારફતે આ અંગે માહિતી આપતા જણાવ્યું હતું કે ભાજપના ઉમેદવાર દ્વારા રજૂ કરવામાં આવેલા ચૂંટણી સોગંદનામામાં અનેક ગંભીર વિસંગતતાઓ અને ક્ષતિઓ રહી ગઈ છે, જેના કારણે તેમની ઉમેદવારી રદ થવા યોગ્ય છે.

સોગંદનામામાં વિગતો છુપાવવાનો ગંભીર આરોપ

જીતુ પટવારીના જણાવ્યા મુજબ, ધારાસભ્ય હેમંત કટારે દ્વારા રિટર્નિંગ ઓફિસર સમક્ષ દાખલ કરવામાં આવેલા સત્તાવાર વાંધામાં જણાવાયું છે કે હરદીપ સિંહ પુરીએ પોતાના ચૂંટણી સોગંદનામામાં તેમની પત્નીના નામ અને તેમની માલિકીની સંપત્તિની વિગતો દર્શાવી નથી. આ ઉપરાંત, તેમના જીનીવા સ્થિત એપાર્ટમેન્ટ અને વિદેશી બેંક ખાતાઓની કિંમતી મિલકતોના સાચા મૂલ્યાંકન અંગે પણ અનેક શંકાસ્પદ પ્રશ્નો ઊભા થયા છે. કોંગ્રેસે નોમિનેશન સોગંદનામાના નોટરાઇઝેશનની કાયદેસરતા અને પ્રક્રિયા પર પણ સવાલો ઉઠાવ્યા છે.

ભાજપની નીતિ અને ચૂંટણી પંચની નિષ્પક્ષતા સામે કોંગ્રેસના પ્રહારો

મધ્યપ્રદેશ કોંગ્રેસ પ્રમુખે ભાજપ પર આકરા પ્રહારો કરતા સવાલ કર્યો હતો કે નૈતિકતા અને પારદર્શિતાની વાતો કરતી ભાજપ પોતાના ઉમેદવારના સોગંદનામામાં આવી ગંભીર ભૂલો સામે શું સ્પષ્ટતા આપશે? શું ભાજપ પોતાની સત્તાની તાકાતનો ઉપયોગ કરીને આ સમગ્ર મામલાને દબાવવાનો પ્રયાસ કરશે? કોંગ્રેસે ચૂંટણી પંચ પાસે ભારપૂર્વક માંગ કરી છે કે તમામ નિયમો દરેક ઉમેદવાર માટે સમાન હોવાથી આ વાંધાઓની તટસ્થ, કડક અને ગંભીર તપાસ કરવામાં આવે જેથી ચૂંટણી પ્રક્રિયાની પારદર્શિતા જળવાઈ રહે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

12 નવેમ્બરે યોજાશે રાજ્યસભાની ચૂંટણી

ઉલ્લેખનીય છે કે મધ્યપ્રદેશમાં રાજ્યસભાની આ ખાલી પડેલી સીટ માટે આગામી 12 નવેમ્બરના રોજ મતદાન યોજાનાર છે. ભાજપે ગત 28 ઓક્ટોબરના રોજ હરદીપ સિંહ પુરીની ઉમેદવારીની જાહેરાત કરી હતી, જે બાદ તેમણે 31 ઓક્ટોબરના રોજ પોતાનું ઉમેદવારીપત્ર દાખલ કર્યું હતું. આ બેઠક કેન્દ્રીય સંસદીય બાબતોના રાજ્યમંત્રી એલ. મુરુગનના રાજીનામા બાદ ખાલી પડી હતી. ઉમેદવારીપત્રો ભરવાની છેલ્લી તારીખ 2 નવેમ્બર, 2026 ના રોજ પૂર્ણ થઈ હતી, જ્યારે ફોર્મની ચકાસણી આજે, 3 નવેમ્બર, 2026 ના રોજ હાથ ધરવામાં આવી રહી છે. ઉમેદવારો આગામી 5 નવેમ્બર, 2026 સુધી પોતાના ઉમેદવારીપત્રો પાછા ખેંચી શકશે.

આ પણ વાંચો: ‘સત્તાની લાલસામાં દેશને બાળવા તૈયાર છે વિપક્ષના નેતા’, ભાજપના રાહુલ ગાંધી પર આકરા પ્રહારો