અગ્નિવીરો માટે કેન્દ્ર સરકારની મોટી તૈયારી! 4 વર્ષ બાદ મળશે 2 વર્ષનું એક્સ્ટેન્શન, લગ્ન કરવાની મંજૂરી આપવા પર પણ વિચારણા
નવી દિલ્હી: કેન્દ્ર સરકાર અગ્નિપથ યોજનામાં મોટા ફેરફારો કરવાની તૈયારી કરી રહી છે. અગ્નિવીરોની સેવા અને ભવિષ્યને ધ્યાનમાં રાખીને સરકાર ચાર વર્ષનો કાર્યકાળ પૂર્ણ થયા બાદ વધુ બે વર્ષનું સર્વિસ એક્સ્ટેન્શન આપવાની દરખાસ્ત પર વિચાર કરી રહી છે. આ દરમિયાન અગ્નિવીરોને ભારતીય સેના, નૌકાદળ અને વાયુસેનામાં પોતાની સેવાઓ ચાલુ રાખવાની તક મળી શકે છે. એટલું જ નહીં, વધારાના બે વર્ષના કાર્યકાળ દરમિયાન અગ્નિવીરોને લગ્ન કરવાની મંજૂરી આપવા અંગે પણ વિચારણા ચાલી રહી છે.
રક્ષા સચિવ રાજેશ કુમાર સિંહે અગ્નિવીર યોજનામાં સંભવિત ફેરફારો અંગે મહત્વની માહિતી આપી છે. આ ફેરફાર લાગુ કરવામાં આવે તો અગ્નિવીરોને પોતાની ક્ષમતા સાબિત કરવા માટે વધુ સમય મળશે અને સેનાને પણ અનુભવી તથા તાલીમબદ્ધ જવાનોને પોતાની સાથે જાળવી રાખવાની તક મળશે.
અગ્નિવીરોનું પ્રદર્શન સારું રહ્યું: રક્ષા સચિવ
રક્ષા સચિવ રાજેશ કુમાર સિંહે અગ્નિપથ યોજનાને સેના અને અગ્નિવીરો બંને માટે ‘વિન-વિન સોલ્યુશન’ ગણાવી હતી.
તેમણે જણાવ્યું કે યોજના શરૂ કરવામાં આવી ત્યારે જ નક્કી કરવામાં આવ્યું હતું કે ચાર વર્ષ પૂર્ણ થયા બાદ તેની સમીક્ષા કરવામાં આવશે. આ સમીક્ષા દરમિયાન અગ્નિવીરોનું પ્રદર્શન સારું જોવા મળ્યું છે. વિવિધ સૈન્ય અભિયાનોમાં પણ તેમનું યોગદાન સકારાત્મક રહ્યું હોવાનું જણાવાયું છે.
આ જ બાબતોને ધ્યાનમાં રાખીને ચાર વર્ષનો કાર્યકાળ પૂર્ણ થયા બાદ વધુ બે વર્ષનું સર્વિસ એક્સ્ટેન્શન આપવાનો વિચાર કરવામાં આવી રહ્યો છે.
બે વર્ષનું એક્સ્ટેન્શન પૂરું થયા બાદ કાયમી ભરતીની તક
રક્ષા સચિવના જણાવ્યા અનુસાર, બે વર્ષનું વધારાનું એક્સ્ટેન્શન પૂર્ણ થયા બાદ જે અગ્નિવીરો કાયમી સૈન્ય સેવામાં જોડાવા ઇચ્છતા હશે, તેમને તક મળી શકે છે.
જોકે, આ માટે તેમણે નિર્ધારિત લાયકાત, વ્યક્તિગત સંમતિ અને ઓપરેશનલ માપદંડો પૂર્ણ કરવા પડશે. યોગ્યતા ધરાવતા અગ્નિવીરોને નિયમિત સૈન્ય સેવામાં સામેલ થવાની તક આપવામાં આવશે.
એટલે કે, અગ્નિવીરોને પોતાની કામગીરી અને ક્ષમતાના આધારે કાયમી સૈન્ય સેવામાં જોડાવા માટે વધુ એક તક મળી શકે છે.
લગ્ન કરવાની મંજૂરી આપવા પર પણ વિચારણા
આ સંભવિત ફેરફારમાં સૌથી મહત્વની બાબત એ છે કે વધારાના બે વર્ષના કાર્યકાળ દરમિયાન અગ્નિવીરોને લગ્ન કરવાની મંજૂરી આપવા અંગે પણ સરકાર વિચાર કરી રહી છે.
હાલમાં અગ્નિપથ યોજના હેઠળ ચાર વર્ષના કાર્યકાળ દરમિયાન અગ્નિવીરો માટે લગ્ન સંબંધિત નિયંત્રણો છે. હવે વધારાના બે વર્ષના એક્સ્ટેન્શન દરમિયાન આ નિયમોમાં રાહત આપવાની સંભાવના અંગે ચર્ચા થઈ રહી છે.
જોકે, આ અંગે અંતિમ નિર્ણય અને સત્તાવાર નિયમોની જાહેરાત થવાની બાકી છે.
CDSએ પણ બે વર્ષના એક્સ્ટેન્શન અંગે કરી હતી જાહેરાત
ઉલ્લેખનીય છે કે 4 નવેમ્બરના રોજ ચીફ ઓફ ડિફેન્સ સ્ટાફ (CDS) જનરલ એન.એસ. રાજા સુબ્રમણીએ પણ અગ્નિપથ યોજનામાં સંભવિત ફેરફારો અંગે મહત્વની જાહેરાત કરી હતી.
તેમણે જણાવ્યું હતું કે ચાર વર્ષનો કાર્યકાળ પૂર્ણ કરી રહેલા અગ્નિવીરોને બે વર્ષનું વધારાનું સર્વિસ એક્સ્ટેન્શન આપવાની જોગવાઈ કરવામાં આવશે. ત્યારબાદ નિર્ધારિત લાયકાત પૂર્ણ કરનારા અને કાયમી સેવામાં જોડાવા સંમતિ આપનારા અગ્નિવીરોને નિયમિત ભરતીની તક આપવામાં આવશે.
અગ્નિવીરો માટે શું બદલાઈ શકે છે?
જો સરકાર આ પ્રસ્તાવને મંજૂરી આપે તો અગ્નિવીરોની સેવા વ્યવસ્થામાં નીચે મુજબના ફેરફારો થઈ શકે છે:
- ચાર વર્ષનો કાર્યકાળ પૂર્ણ થયા બાદ વધુ બે વર્ષ સેવા કરવાની તક.
- વધારાના બે વર્ષ દરમિયાન સેના, નૌકાદળ અને વાયુસેનામાં સેવા ચાલુ રાખી શકાશે.
- એક્સ્ટેન્શન દરમિયાન લગ્ન કરવાની મંજૂરી આપવા અંગે વિચારણા.
- બે વર્ષ પૂર્ણ થયા બાદ લાયકાત ધરાવતા અગ્નિવીરોને કાયમી ભરતીની તક.
- સેનાને વધુ સમય સુધી તાલીમબદ્ધ અને અનુભવી જવાનોની સેવાઓ મળી શકશે.
આ પણ વાંચો: મહારાષ્ટ્રના રાજકારણમાં મોટો ઉલટફેર થવાના સંકેત? શરદ પવાર અને પ્રફુલ્લ પટેલ વચ્ચે દોઢ કલાકની મુલાકાત
