NIA Drone Case : દિલ્હીની કોર્ટે નેશનલ ઇન્વેસ્ટિગેશન એજન્સી (NIA)ની તપાસ હેઠળ રહેલા અમેરિકન નાગરિક મેથ્યુ એરોન વેનડાઇક (Matthew Aaron VanDyke) સહિત કુલ સાત વિદેશી નાગરિકોને એક મહિના માટે ભારત છોડીને પોતાના દેશ પરત જવાની મંજૂરી આપી છે. વેનડાઇક શુક્રવારે સાંજે અમેરિકા જવા રવાના થયો હતો, જ્યારે તેની સાથે છ યુક્રેનિયન નાગરિકોને પણ ભારત છોડવાની પરવાનગી મળી છે.

આ કેસમાં NIA દ્વારા યુનલો (UAPA) હેઠળ તપાસ કરવામાં આવી રહી છે. તપાસનો મુખ્ય મુદ્દો મ્યાનમારમાં ડ્રોન વોરફેર (Drone Warfare) અને ડ્રોન સંબંધિત ટેકનિકની તાલીમ તથા ત્યાંના સશસ્ત્ર વંશીય સંગઠનો સાથેના કથિત સંબંધો છે. જોકે, કોર્ટ સમક્ષ NIAએ એવું જણાવ્યું નહોતું કે તપાસ પૂર્ણ થાય ત્યાં સુધી આરોપીઓની ભારતમાં ભૌતિક હાજરી જરૂરી છે.

વેનડાઇક અમેરિકા રવાના, 21 ઓક્ટોબરે પરત આવવાની તૈયારી

કોર્ટની મંજૂરી મળ્યા બાદ મેથ્યુ વેનડાઇક શુક્રવારે સાંજે વોશિંગ્ટન જવા રવાના થયો હતો. અહેવાલ મુજબ તેણે 21 ઓક્ટોબરે ભારત પરત આવવાની ફ્લાઇટ પણ બુક કરી છે.

NIA તરફથી કોર્ટમાં હાજર થયેલા વિશેષ સરકારી વકીલ રાહુલ ત્યાગીએ જણાવ્યું હતું કે UAPA સંબંધિત તપાસ પૂર્ણ થવામાં હજુ સમય લાગી શકે છે. તપાસ દરમિયાન આરોપીઓ પાસેથી તેમના રહેઠાણનું સરનામું, ફોન નંબર, ઈ-મેલ અને અન્ય સંપર્ક વિગતો લેવામાં આવી શકે છે. જરૂર પડે ત્યારે સાતેય આરોપીઓને વીડિયો કોન્ફરન્સિંગ (Video Conferencing) મારફતે તપાસમાં જોડાવું પડશે.

મ્યાનમારમાં ડ્રોન તાલીમ આપવાનો આરોપ

NIAનો આરોપ છે કે વેનડાઇક અને અન્ય છ વિદેશી નાગરિકોએ મ્યાનમારમાં આશરે ત્રણ મહિના સુધી કેટલાક વંશીય સશસ્ત્ર સંગઠનોના સભ્યોને ડ્રોન સંબંધિત તાલીમ આપી હતી. આ તાલીમમાં ડ્રોન ઓપરેશન, ડ્રોન એસેમ્બલી, ડ્રોન વોરફેર અને જૅમિંગ ટેકનિકનો સમાવેશ થતો હોવાનો એજન્સીનો દાવો છે. NIAએ આ સંગઠનોમાં ચિન નેશનલ ફ્રન્ટ (CNF) અને કાચિન ઇન્ડિપેન્ડન્સ આર્મી (KIA)નો ઉલ્લેખ કર્યો છે.

એજન્સીનો એવો પણ આરોપ છે કે વેનડાઇક અને અન્ય લોકોને CNF સાથે જોડાયેલા લોકો તરફથી લોજિસ્ટિક મદદ મળી હતી. કથિત મિશન માટે મ્યાનમારમાં સક્રિય એક સશસ્ત્ર સંગઠનના કમાન્ડર દ્વારા એકત્ર કરવામાં આવેલા નાણાંનો ઉપયોગ થયો હોવાનો પણ તપાસ એજન્સીનો દાવો છે.

મ્યાનમારથી પુરાવા એકત્ર કરવામાં મુશ્કેલી

આ કેસમાં કથિત પ્રવૃત્તિઓ મ્યાનમારમાં થઈ હોવાથી ત્યાંથી પુરાવા એકત્ર કરવાનું NIA માટે પડકારરૂપ બની શકે છે. તપાસ સાથે જોડાયેલા અધિકારીઓના જણાવ્યા અનુસાર, મ્યાનમારથી જરૂરી પુરાવા મેળવ્યા વિના સમગ્ર કથિત કાવતરાને સાબિત કરવું મુશ્કેલ બની શકે છે.

આ જ કારણસર UAPA હેઠળની તપાસ પૂર્ણ કરવા માટે ચોક્કસ સમયમર્યાદા નક્કી કરવી મુશ્કેલ હોવાનું પણ જણાવાયું છે.

ઇમિગ્રેશન કેસમાં ચાર્જશીટ બાદ ડિસ્ચાર્જ

NIAએ 8 સપ્ટેમ્બરે આરોપીઓ સામે ઇમિગ્રેશન એન્ડ ફોરેનર્સ એક્ટ હેઠળ ચાર્જશીટ દાખલ કરી હતી. ફોરેનર્સ રિજનલ રજિસ્ટ્રેશન ઓફિસ (FRRO) દ્વારા દરેક આરોપી પર રૂ.5.5 લાખનો દંડ ફટકારવામાં આવ્યો હતો અને સંબંધિત કાર્યવાહી પૂર્ણ કરવામાં આવી હતી. ત્યારબાદ કોર્ટે આરોપીઓને ઇમિગ્રેશન એન્ડ ફોરેનર્સ એક્ટ હેઠળના કેસમાંથી ડિસ્ચાર્જ કર્યા હતા. તેમને ડિફોલ્ટ જામીન (Default Bail) પણ આપવામાં આવ્યા હતા. ગુરુવારે રાત્રે તિહાર જેલમાંથી મુક્ત થયા બાદ ભારત છોડવા માટે જરૂરી પ્રક્રિયા શરૂ કરવામાં આવી હતી. તેમાં FRRO પાસેથી એક્ઝિટ પરમિટ (Exit Permit) મેળવવાની પ્રક્રિયાનો પણ સમાવેશ થતો હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

વેનડાઇક સહિત સાતની માર્ચમાં ધરપકડ

મેથ્યુ વેનડાઇકની ધરપકડ માર્ચમાં કોલકાતા એરપોર્ટ પરથી કરવામાં આવી હતી. તેની સાથે છ યુક્રેનિયન નાગરિકોની પણ દિલ્હી અને લખનૌ એરપોર્ટ પરથી ધરપકડ કરવામાં આવી હતી.

આ છ લોકોના નામ હુર્બા પેટ્રો, તારાસ સ્લિવિયાક, ઇવાન સુખમાનોવ્સ્કી, મારિયાન સ્ટેફાનકિવ, મેક્સિમ હોન્ચારુક અને વિક્ટર કામિન્સ્કી છે.

NIAનો અગાઉનો આરોપ હતો કે આ સાતેય લોકો મિઝોરમના રસ્તે મ્યાનમારમાં ગેરકાયદેસર રીતે પ્રવેશ્યા હતા અને ત્યાં સૈન્ય સરકાર સામે સક્રિય વંશીય સશસ્ત્ર સંગઠનો માટે ડ્રોન સંબંધિત તાલીમના કાર્યક્રમમાં સામેલ થયા હતા.

ભારત છોડવાની મંજૂરી છતાં તપાસ ચાલુ

કોર્ટના આદેશથી સાતેય વિદેશી નાગરિકોને એક મહિના માટે પોતાના દેશ પરત જવાની મંજૂરી મળી છે. જોકે, આ મંજૂરીનો અર્થ એ નથી કે કેસની તપાસ પૂરી થઈ ગઈ છે. NIAની તપાસ હજુ ચાલુ છે. જરૂર પડે ત્યારે આરોપીઓને વીડિયો કોન્ફરન્સિંગ દ્વારા તપાસમાં જોડાવું પડશે અને એજન્સીને તેમની સંપર્ક વિગતો ઉપલબ્ધ કરાવવી પડશે. આ કેસમાં આગળની કાર્યવાહી તપાસ દરમિયાન સામે આવતા પુરાવા અને કોર્ટના આગામી આદેશો પર આધારિત રહેશે.

આ પણ વાંચો : રામ મંદિર ચઢાવા ચોરી કેસમાં ચંપત રાય સહિત ત્રણ સાક્ષી, 8 સામે ચાર્જશીટ