Operation Firewall-2026: આંધ્ર પ્રદેશ કાઉન્ટર ઈન્ટેલિજન્સ સેલ (AP CI Cell)એ પાકિસ્તાની ગુપ્તચર એજન્ટો સાથે કથિત સંપર્ક અને જાસૂસી પ્રવૃત્તિઓના મામલે મોટી કાર્યવાહી કરી છે. ‘ઓપરેશન ફાયરવોલ-2026’ હેઠળ 13 નૌસેના કર્મચારીઓ સહિત કુલ 18 શંકાસ્પદ લોકોના કથિત જાસૂસી મોડ્યુલની તપાસ કરવામાં આવી છે. આ કાર્યવાહી દરમિયાન બે લોકોની ધરપકડ કરવામાં આવી છે, જેમાં એક નૌસેના કર્મચારીનો સમાવેશ થાય છે.

બંને આરોપીઓને 14 ઓક્ટોબર સુધી ન્યાયિક રિમાન્ડ પર મોકલવામાં આવ્યા છે.

10 રાજ્યોમાં એકસાથે ઓપરેશન

AP CI Cellના જણાવ્યા અનુસાર 1 ઓક્ટોબરે દેશના 10 રાજ્યો અને કેન્દ્રશાસિત પ્રદેશોમાં એકસાથે કાર્યવાહી હાથ ધરવામાં આવી હતી.

તપાસ એજન્સીનો આરોપ છે કે શંકાસ્પદોએ વિશાખાપટ્ટણમ સહિતના વ્યૂહાત્મક સ્થળો અને સંરક્ષણ પ્રતિષ્ઠાનો સાથે જોડાયેલી સંવેદનશીલ તથા ગુપ્ત માહિતી એન્ક્રિપ્ટેડ કમ્યુનિકેશન માધ્યમો દ્વારા કથિત રીતે પાકિસ્તાની ગુપ્તચર એજન્ટો સુધી પહોંચાડી હતી.

આ મામલે 2 સપ્ટેમ્બર 2026ના રોજ વિજયવાડા સ્થિત કાઉન્ટર ઈન્ટેલિજન્સ પોલીસ સ્ટેશનમાં કેસ નોંધવામાં આવ્યો હતો.

12 ટીમોએ હાથ ધરી તપાસ

તપાસ માટે AP CI Cellની 12 ટીમો આંધ્ર પ્રદેશ, કેરળ, મહારાષ્ટ્ર, કર્ણાટક, ગુજરાત, ગોવા, દિલ્હી, તમિલનાડુ, છત્તીસગઢ અને બિહારમાં તૈનાત કરવામાં આવી હતી.

રાજ્ય ATS, નૌસેના અધિકારીઓ અને સ્થાનિક પોલીસના સહયોગથી 18 શંકાસ્પદોની ભૂમિકાની તપાસ કરવામાં આવી હતી. તપાસ દરમિયાન તેમના ઈલેક્ટ્રોનિક ઉપકરણો પણ જપ્ત કરવામાં આવ્યા હતા.

પ્રાથમિક તપાસમાં બે શંકાસ્પદોની ભૂમિકા સામે આવ્યા બાદ તેમની ધરપકડ કરવામાં આવી છે, જ્યારે અન્ય લોકો અંગે તપાસ હજુ ચાલુ છે.

વિશાખાપટ્ટણમથી સાઈ વરપ્રસાદ ઝડપાયો

ધરપકડ કરાયેલા બે આરોપીઓમાં અન્નમ સાઈ વરપ્રસાદનો સમાવેશ થાય છે. તે નૌસેના અધિકારીઓ માટે સિવિલ કોન્ટ્રાક્ટ ડ્રાઈવર તરીકે કામ કરતો હતો અને તેની વિશાખાપટ્ટણમથી ધરપકડ કરવામાં આવી છે.

તપાસ એજન્સીના આરોપ મુજબ સાઈ વરપ્રસાદે પાકિસ્તાની ગુપ્તચર એજન્ટ સાથે નૌસેના તથા સંરક્ષણ પ્રતિષ્ઠાનો સાથે જોડાયેલી સંવેદનશીલ માહિતી શેર કરી હતી અને તેના બદલામાં પૈસા લીધા હતા.

કોઈમ્બતુરથી પ્રદીપ મુખર્જીની ધરપકડ

બીજા આરોપી પ્રદીપ મુખર્જીની તમિલનાડુના કોઈમ્બતુરથી ધરપકડ કરવામાં આવી છે. તે વિશાખાપટ્ટણમ નૌસેના બેઝમાં કર્મચારી તરીકે કામ કરતો હોવાનું જણાવાયું છે.

આરોપ મુજબ પ્રદીપ મુખર્જીએ પાકિસ્તાની ગુપ્તચર ઓપરેટિવ માટે WhatsApp એકાઉન્ટ એક્ટિવેટ કરવા માટે OTP ઉપલબ્ધ કરાવ્યો હતો. તેના પર ઓપરેટિવ સાથે સંપર્કમાં રહેવા અને નૌસેના તથા સંરક્ષણ પ્રતિષ્ઠાનો સાથે જોડાયેલી સંવેદનશીલ માહિતી શેર કરવાનો પણ આરોપ છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

પાકિસ્તાન સાથે કથિત જાસૂસી કનેક્શનની તપાસ તેજ

આ કાર્યવાહી એવા સમયે થઈ છે જ્યારે તાજેતરમાં આસામમાં પણ પાકિસ્તાની ગુપ્તચર તંત્ર સાથે કથિત સંપર્કના આરોપમાં બે લોકોની ધરપકડ કરવામાં આવી હતી. તેમાં એક નિવૃત્ત સેનાકર્મીનો પણ સમાવેશ થતો હોવાનું જણાવાયું હતું.

આંધ્ર પ્રદેશમાં ચાલી રહેલા ‘ઓપરેશન ફાયરવોલ-2026’માં હવે અન્ય શંકાસ્પદોની ભૂમિકા અને કથિત જાસૂસી નેટવર્ક સાથેના તેમના સંપર્કોની તપાસ કરવામાં આવી રહી છે. તપાસમાં વધુ માહિતી સામે આવે તેવી શક્યતા છે.

આ પણ વાંચો: મકરબા ઓવરબ્રિજની ભૂલથી તંત્રએ લીધો બોધપાઠ, બંધ કરાયેલું રેલવે ક્રોસીંગ અંતે ખોલવું પડયું