Nana Patekar Death: બોલિવૂડના દિગ્ગજ અભિનેતા નાના પાટેકરનું ગુરુવાર, 8 ઓક્ટોબર, 2026ના રોજ 75 વર્ષની વયે નિધન થયું છે. ગોવાના ડોના પાઉલામાં આવેલા નિવાસસ્થાને તેમની તબિયત અચાનક બગડતાં તેમને મણિપાલ હોસ્પિટલ લઈ જવામાં આવ્યા હતા. તબીબોએ તેમને બચાવવાના પ્રયાસ કર્યા હતા, પરંતુ સવારે 5:20 વાગ્યે મૃત જાહેર કરવામાં આવ્યા હતા. પ્રાથમિક અહેવાલોમાં કાર્ડિયાક અરેસ્ટને મૃત્યુનું કારણ જણાવાયું છે. તેમના નિધનથી ફિલ્મજગતમાં શોકની લાગણી છવાઈ ગઈ છે.

નાના પાટેકરના નિધન બાદ બોલિવૂડની અનેક હસ્તીઓ તેમને શ્રદ્ધાંજલિ આપી રહી છે. આ વચ્ચે સૌની નજર અભિનેત્રી તનુશ્રી દત્તાની પ્રતિક્રિયા પર પણ હતી. કારણ કે વર્ષ 2018માં તનુશ્રીએ નાના પાટેકર સામે જાતીય સતામણીના ગંભીર આરોપો લગાવ્યા હતા. આ ઘટના ભારતના MeToo અભિયાનની સૌથી વધુ ચર્ચાયેલી ઘટનાઓમાંની એક બની હતી. હવે નાના પાટેકરના નિધન બાદ તનુશ્રીએ સોશિયલ મીડિયા પર પોતાની પ્રતિક્રિયા આપી છે, જેમાં તેમણે એક તરફ પરિવાર પ્રત્યે સંવેદના વ્યક્ત કરી છે, તો બીજી તરફ તેમના શબ્દોએ નવો વિવાદ ઊભો કર્યો છે.

નાના પાટેકરના નિધન પર તનુશ્રીએ શું કહ્યું?

નાના પાટેકરના નિધનના સમાચાર સામે આવ્યા બાદ તનુશ્રી દત્તાએ ઇન્સ્ટાગ્રામ સ્ટોરી પર એક વીડિયો શેર કર્યો હતો. તેમાં તેણે જણાવ્યું કે તેને નાના પાટેકરના નિધનની માહિતી મળી છે, પરંતુ તેઓ હાલમાં પોતાના કામ પર ધ્યાન કેન્દ્રિત કરવા માંગે છે. તનુશ્રીએ કહ્યું કે તે એક મહત્ત્વપૂર્ણ કાર્યક્રમ માટે લખનઉ જઈ રહ્યા છે. આ કાર્યક્રમ અગાઉથી નક્કી હોવાથી તે તેના પર ધ્યાન આપવા ઇચ્છે છે. તેણે એવો પણ સંકેત આપ્યો કે નાના પાટેકરના નિધનના સમાચારને કારણે મીડિયાનું ધ્યાન તેના કામ પરથી હટી શકે છે. તનુશ્રીએ જણાવ્યું કે યોગ્ય પ્રતિક્રિયા શું આપવી તે અંગે વિચાર્યા બાદ તે વધુ વાત કરશે. હાલ માટે તેણે નાના પાટેકરના પરિવાર પ્રત્યે સંવેદના વ્યક્ત કરી હતી.

Evil Dead શબ્દોથી ફરી ચર્ચામાં આવી તનુશ્રી

તનુશ્રી દત્તાની ઇન્સ્ટાગ્રામ સ્ટોરીનો એક ભાગ વિશેષ ચર્ચાનો વિષય બન્યો છે. વિવિધ મીડિયા અહેવાલો મુજબ, તેમણે પોતાની પ્રતિક્રિયામાં Evil Dead શબ્દોનો ઉપયોગ કર્યો હતો. તેણે એવી ચિંતા વ્યક્ત કરી હતી કે મીડિયાનું સમગ્ર ધ્યાન હવે આ નિધનના સમાચાર પર જ કેન્દ્રિત થઈ જશે અને તેઓ જે મહત્ત્વપૂર્ણ કાર્યક્રમ માટે જઈ રહ્યા છે તે પાછળ રહી જશે. જોકે તનુશ્રીએ નાના પાટેકરના પરિવાર પ્રત્યે સંવેદના પણ વ્યક્ત કરી હતી. તેમના આ નિવેદનને વર્ષો જૂના MeToo વિવાદ સાથે જોડીને જોવામાં આવી રહ્યું છે.

વર્ષ 2008માં આખરે શું બન્યું હતું?

નાના પાટેકર અને તનુશ્રી દત્તા વચ્ચેના વિવાદની શરૂઆત વર્ષ 2008માં ફિલ્મ હોર્ન ઓકે પ્લીઝના શૂટિંગ દરમિયાન થઈ હતી. તનુશ્રી દત્તાનો આરોપ હતો કે મુંબઈના ગોરેગાંવ વિસ્તારમાં આવેલા એક સ્ટુડિયોમાં ફિલ્મના ગીતનું શૂટિંગ ચાલી રહ્યું હતું ત્યારે નાના પાટેકરે તેમની સાથે અયોગ્ય વર્તન કર્યું હતું. તનુશ્રીના કહેવા મુજબ નાના પાટેકર ગીતના ડાન્સ સ્ટેપ શીખવવાના બહાને તેમની નજીક આવ્યા હતા અને તેમને અયોગ્ય રીતે સ્પર્શ કર્યો હતો. તેમણે એવો પણ આક્ષેપ કર્યો હતો કે તેમની સંમતિ વિના ગીતમાં કેટલાક નિકટતાવાળા ડાન્સ સ્ટેપ ઉમેરવામાં આવ્યા હતા. આ ઘટનાથી નારાજ થઈને તનુશ્રી શૂટિંગ છોડીને પોતાની વેનિટી વેનમાં જતી રહી હતી. ત્યારબાદ શૂટિંગના સ્થળે ભારે વિવાદ સર્જાયો હતો. નાના પાટેકરે શરૂઆતથી જ આ આરોપોનો ઇનકાર કર્યો હતો.

શૂટિંગ સેટ પર વિવાદ બાદ કાર પર હુમલાનો આરોપ

તનુશ્રી દત્તાએ તે સમયે એવો પણ આરોપ લગાવ્યો હતો કે શૂટિંગ છોડીને જતી વખતે તેમની કાર પર કેટલાક લોકોએ હુમલો કર્યો હતો. આ મામલે વર્ષ 2008માં પોલીસ ફરિયાદ નોંધાઈ હતી. જોકે તે સમયની FIRમાં કાર પર થયેલા હુમલા અને તોડફોડનો ઉલ્લેખ હતો, નાના પાટેકર દ્વારા જાતીય સતામણીના આક્ષેપનો નહીં. તનુશ્રીએ આ ઘટના બાદ ફિલ્મનું શૂટિંગ છોડી દીધું હતું. વિવાદના કારણે તેમની કારકિર્દી પર પણ અસર પડી હોવાનું તેમણે વિવિધ ઇન્ટરવ્યૂમાં જણાવ્યું હતું.

10 વર્ષ બાદ ફરી ઊઠ્યો વિવાદ, બોલિવૂડમાં MeTooની શરૂઆત

વર્ષ 2008ની ઘટના લગભગ દસ વર્ષ બાદ સપ્ટેમ્બર 2018માં ફરી ચર્ચામાં આવી હતી. તનુશ્રી દત્તાએ એક ઇન્ટરવ્યૂમાં નાના પાટેકર સામેના આરોપો ફરી જાહેર કર્યા હતા. આ વખતે તેમના નિવેદનોએ સમગ્ર બોલિવૂડમાં ભારે ચર્ચા જગાવી હતી. સોશિયલ મીડિયા પર MeToo અભિયાનને વેગ મળ્યો અને ફિલ્મજગતની અનેક મહિલાઓએ પોતાની સાથે થયેલા કથિત જાતીય સતામણીના અનુભવો જાહેર કરવાનું શરૂ કર્યું હતું. તનુશ્રીના આક્ષેપો બાદ નાના પાટેકર ઉપરાંત કોરિયોગ્રાફર ગણેશ આચાર્ય, નિર્દેશક રાકેશ સારંગ અને નિર્માતા સમી સિદ્દીકીના નામ પણ વિવાદમાં આવ્યા હતા. તનુશ્રીએ પોલીસ અને ફિલ્મ ઉદ્યોગની સંસ્થાઓ સમક્ષ ફરિયાદો કરી હતી. બીજી તરફ નાના પાટેકરે તમામ આરોપોને ખોટા ગણાવ્યા હતા.

વર્ષ 2018માં તનુશ્રી દત્તાની ફરિયાદના આધારે નાના પાટેકર અને અન્ય લોકો સામે પોલીસ કાર્યવાહી શરૂ કરવામાં આવી હતી. તપાસ દરમિયાન મુંબઈ પોલીસે 13 સાક્ષીઓનાં નિવેદનો નોંધ્યાં હતાં. જોકે પોલીસના જણાવ્યા મુજબ કોઈ સાક્ષીએ તનુશ્રી દ્વારા લગાવવામાં આવેલા જાતીય સતામણીના આરોપોને સમર્થન આપ્યું નહોતું. જૂન 2019માં મુંબઈ પોલીસે પૂરતા પુરાવાના અભાવે કોર્ટમાં ક્લોઝર રિપોર્ટ રજૂ કર્યો હતો. તનુશ્રીએ પોલીસની આ કાર્યવાહી સામે વાંધો ઉઠાવ્યો હતો અને તપાસની પદ્ધતિ પર પણ સવાલો કર્યા હતા.

2025માં કોર્ટે તનુશ્રીની અરજી ફગાવી

નાના પાટેકર અને તનુશ્રી દત્તા વચ્ચેનો કાનૂની વિવાદ વર્ષો સુધી ચર્ચામાં રહ્યો હતો. 7 માર્ચ, 2025ના રોજ મુંબઈની મેજિસ્ટ્રેટ કોર્ટે પોલીસના ક્લોઝર રિપોર્ટ સામે તનુશ્રીએ કરેલી વિરોધ અરજી ફગાવી દીધી હતી. કોર્ટે વર્ષ 2008ની ઘટનાના આક્ષેપો અંગે કાનૂની સમયમર્યાદાનો મુદ્દો નોંધ્યો હતો. ઉપલબ્ધ પુરાવાના આધારે નાના પાટેકર સામે કાનૂની કાર્યવાહી આગળ વધારવા માટે પૂરતો આધાર મળ્યો નહોતો. જોકે તનુશ્રી દત્તા પોતાના આરોપો પર અડગ રહ્યાં હતાં અને તેમણે અગાઉ પોલીસ તપાસ સામે અસંતોષ વ્યક્ત કર્યો હતો.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

નાના પાટેકરે આરોપો વિશે શું કહ્યું હતું?

વર્ષ 2024માં એક ઇન્ટરવ્યૂ દરમિયાન નાના પાટેકરે ફરી એકવાર તનુશ્રી દત્તાના આરોપોનો ઇનકાર કર્યો હતો. તેમણે કહ્યું હતું કે જે વાત ખોટી છે તે ખોટી જ છે અને તેમને શરૂઆતથી જ ખબર હતી કે આરોપોમાં સત્ય નથી. તેમણે પોતાની સામેના આક્ષેપોને કારણે ગુસ્સો આવ્યો ન હોવાનું પણ જણાવ્યું હતું. નાના પાટેકરનું કહેવું હતું કે ઘટનાના સમયે શૂટિંગ સેટ પર અનેક લોકો હાજર હતા. તેથી તનુશ્રીના આરોપોને તેઓ સ્વીકારતા નહોતા.

નિધન બાદ ફરી ચર્ચામાં આવ્યો MeToo વિવાદ

નાના પાટેકરના નિધન સાથે તેમની પાંચ દાયકાની અભિનય સફરનો અંત આવ્યો છે. જોકે તેમના જીવન સાથે જોડાયેલા સૌથી ચર્ચાસ્પદ વિવાદોમાં તનુશ્રી દત્તાનો MeToo કેસ પણ સામેલ રહ્યો હતો. આ વિવાદે માત્ર બે કલાકારો વચ્ચેના મતભેદ પૂરતી ચર્ચા ઊભી કરી નહોતી, પરંતુ ફિલ્મ ઉદ્યોગમાં મહિલાઓની સુરક્ષા, જાતીય સતામણીના આરોપોની તપાસ અને પીડિતોની ફરિયાદ સાંભળવાની વ્યવસ્થા જેવા મુદ્દાઓને પણ રાષ્ટ્રીય સ્તરે ચર્ચામાં લાવ્યા હતા. હવે નાના પાટેકરના નિધન પર તનુશ્રી દત્તાએ પરિવાર પ્રત્યે સંવેદના વ્યક્ત કરી છે, પરંતુ તેમણે પોતાની સંપૂર્ણ પ્રતિક્રિયા પાછળથી આપવાનું જણાવ્યું છે. તેમના નિવેદનમાં વપરાયેલા ‘Evil Dead’ શબ્દોએ ફરી આ જૂના વિવાદને ચર્ચામાં લાવી દીધો છે.

આ પણ વાંચોઃ પ્રેમાનંદ મહારાજના આશ્રમમાં સુરક્ષા વધારવાની માંગ, શિષ્યના મોત બાદ વિવાદ વકર્યો, પોલીસને લખાયો પત્ર