માયોપિયાનું જોખમ: માત્ર સ્ક્રીન ટાઈમ જ નહીં, ઓછી રોશનીમાં કામ કરવું પણ છે જોખમી; નવી રિસર્ચમાં થયો ખુલાસો
નવી દિલ્હીઃ 20 ફેબ્રુઆરી, 2026: તાજેતરના એક સંશોધન મુજબ, આંખોની સામાન્ય ગણાતી બીમારી માયોપિયા (Myopia) પાછળ માત્ર મોબાઈલ કે કોમ્પ્યુટરનો વધુ પડતો વપરાશ જ જવાબદાર નથી, પરંતુ ઓછી રોશનીમાં કામ કરવાની આદત પણ મુખ્ય કારણ છે. SUNY College of Optometry ના વૈજ્ઞાનિકો દ્વારા કરવામાં આવેલ આ સંશોધન ‘સેલ રિપોર્ટ્સ’માં પ્રકાશિત થયું છે.
શું કહે છે લેટેસ્ટ રિસર્ચ?
રિસર્ચ અનુસાર, જ્યારે તમે ઓછા પ્રકાશમાં મોબાઈલ, લેપટોપ વાપરો છો અથવા પુસ્તક વાંચો છો, ત્યારે આંખોના રેટિનાને પૂરતી રોશની મળતી નથી. આ સ્થિતિમાં રેટિના પર વધુ દબાણ આવે છે, જે લાંબા ગાળે માયોપિયાના જોખમને વધારે છે. સંશોધક જોસ મેન્યુઅલના જણાવ્યા મુજબ, વિશ્વભરમાં માયોપિયાના કેસ ઝડપથી વધી રહ્યા છે અને તેનું એક મોટું કારણ પૂરતા પ્રકાશનો અભાવ છે. તેથી, હંમેશા પર્યાપ્ત રોશનીમાં જ ડિજિટલ ઉપકરણોનો ઉપયોગ કરવાની સલાહ આપવામાં આવે છે.
વૈશ્વિક સ્થિતિ અને જોખમ
* અમેરિકા અને યુરોપ: લગભગ 50% યુવાનો માયોપિયાથી પીડિત છે.
* પૂર્વ એશિયા: અહીં આ આંકડો 90% સુધી પહોંચી ગયો છે.
અન્ય કારણો: નિષ્ણાતો માને છે કે ખરાબ લાઈફસ્ટાઈલ અને ખાનપાનની ખોટી આદતો પણ આ માટે જવાબદાર છે. જો સમયસર ધ્યાન ન આપવામાં આવે તો આ બીમારી ગંભીર સ્વરૂપ ધારણ કરી શકે છે, ખાસ કરીને બાળકોમાં આ સમસ્યા વધુ જોવા મળી રહી છે.
માયોપિયાના મુખ્ય લક્ષણો
* દૂરની વસ્તુઓ સ્પષ્ટ ન દેખાવી.
* વારંવાર માથામાં દુખાવો થવો.
* આંખોમાં સતત દુખાવો કે ખેંચાણ અનુભવવું.
* વસ્તુઓ ધૂંધળી દેખાવી.
બચાવ માટે આટલું કરો (20-20 Rule)
* 20-20-20 નિયમ: દર 20 મિનિટે 20 સેકન્ડ માટે 20 ફૂટ દૂર જુઓ.
* પૂરતો પ્રકાશ: હંમેશા યોગ્ય લાઈટિંગમાં જ વાંચન કે કામ કરો.
* કસરત: રોજ ઓછામાં ઓછી અડધો કલાક શારીરિક કસરત કરો.
* યોગ્ય અંતર: સ્ક્રીન અને આંખો વચ્ચે યોગ્ય અંતર જાળવો.
