માર્ક્સ સ્ટોઈનિસે ધ હંડ્રેડ મેચમાં સુરેશ રૈના જેવું કામ કર્યું, બોલિંગમાં આ સિદ્ધિ પ્રાપ્ત કરી

The Hundred: હાલમાં ઈંગ્લેન્ડમાં ધ હન્ડ્રેડનો રોમાંચ જોવા મળી રહ્યો છે. 10 ઓગસ્ટના રોજ, ચાલુ સીઝનની આઠમી મેચ ટ્રેન્ટ બ્રિજ, નોટિંગહામ ખાતે ટ્રેન્ટ રોકેટ્સ અને નોર્ધન સુપરચાર્જર્સ વચ્ચે રમાઈ હતી. આ મેચમાં ટ્રેન્ટ રોકેટ્સના સ્ટાર ઓલરાઉન્ડર માર્કસ સ્ટોઈનિસે એક અદ્ભુત પરાક્રમ કર્યું છે. તેણે આ મેચમાં શાનદાર બોલિંગ કરી હતી. સ્ટોઈનિસ આ મેચમાં કોઈ રન આપ્યા વિના 5 બોલમાં બે વિકેટ લેવામાં સફળ રહ્યો હતો.

સ્ટોઇનિસે ઇમાદ વસીમ અને હેરી બ્રુકને પેવેલિયન મોકલ્યા હતા

નોર્ધન સુપરચાર્જર્સ સામેની મેચમાં, સ્ટોઇનિસે હેરી બ્રુક અને ઇમાદ વસીમને સતત બે બોલ પર આઉટ કર્યા હતા. આ મેચમાં તેની પાસે હેટ્રિક લેવાની તક હતી. પરંતુ તે તેમ કરી શક્યો નહીં. અહીં ઉલ્લેખનિય છે કે, ઘણા બોલરો T20 ક્રિકેટમાં પોતાના સ્પેલમાં એક પણ રન આપ્યા વિના વિકેટ લેવાનો રેકોર્ડ ધરાવે છે. જેમાં ભૂતપૂર્વ ભારતીય ઓલરાઉન્ડર સુરેશ રૈના, ભૂતપૂર્વ દક્ષિણ આફ્રિકાના અનુભવી લેગ-સ્પિનર ઇમરાન તાહિરનું નામ શામેલ છે.

સુરેશ રૈનાએ IPL 2011 માં રાજસ્થાન રોયલ્સ સામેની મેચમાં ત્રણ બોલના સ્પેલમાં કોઈ રન આપ્યા વિના બે વિકેટ લીધી હતી. તે જ સમયે, દક્ષિણ આફ્રિકાના ભૂતપૂર્વ લેગ-સ્પિનર ઇમરાન તાહિરે CPL 2021 માં જમૈકા તલ્લાવાહ સામે 2 ઓવરના સ્પેલમાં કોઈ રન આપ્યા વિના બે વિકેટ લીધી હતી. ન્યુઝીલેન્ડના ફાસ્ટ બોલર લોકી ફર્ગ્યુસન T20 વર્લ્ડ કપ 2024 માં પાપુઆ ન્યુ ગિની સામેની મેચમાં તેના ચાર ઓવરના સ્પેલમાં કોઈ રન આપ્યા વિના 3 વિકેટ લેવામાં સફળ રહ્યો હતો.

ટ્રેન્ટ રોકેટ્સે સરળ જીત નોંધાવી

આ મેચમાં, ટ્રેન્ટ રોકેટ્સે સુપરચાર્જર્સને 5 વિકેટથી હરાવ્યું. પ્રથમ બેટિંગ કરતા, નોર્ધન સુપરચાર્જર્સની ટીમે 100 બોલમાં 9 વિકેટ ગુમાવીને 124 રન બનાવ્યા હતા. હેરી બ્રુકે ટીમ માટે 30 બોલમાં સૌથી વધુ 45 રન બનાવ્યા હતા. આ દરમિયાન, તે પાંચ ચોગ્ગા અને બે છગ્ગા ફટકારવામાં સફળ રહ્યો. તેના સિવાય, ગ્રેહામ ક્લાર્કે 22 બોલમાં 36 રનની ઇનિંગ રમી હતી.

ટ્રેન્ટ રોકેટ્સે આ લક્ષ્યાંક 96 બોલમાં 5 વિકેટ ગુમાવીને હાંસલ કરી લીધો. ટીમના ટોચના ક્રમના બેટ્સમેનોએ સારી બેટિંગ કરી. ટોમ બેન્ટન 37, જો રૂટ 20 અને રેહાન અહેમદે 31 રનનું યોગદાન આપ્યું હતું. ટોમ એલ્સોપે 9 બોલમાં 15 રન બનાવ્યા હતા. સુપરચાર્જર્સ તરફથી ઇમાદ વસીમે સૌથી વધુ 3 વિકેટ લીધી. આદિલ રશીદે બે વિકેટ લીધી હતી.

આ પણ વાંચો: દિલ્હીમાં સાંસદો માટે બનેલા બહુમાળીય 184 ફ્લેટનું પીએમ મોદી આજે ઉદ્ધાટન કરશે