કલ્યાણ બેનર્જી પર હુમલા મામલે મમતા બેનર્જી ભડક્યા, કહ્યું- ‘BJP લોકશાહીની હત્યા કરી રહી છે’

Kalyan Banerjee Attack: પશ્ચિમ બંગાળના પૂર્વ મુખ્યમંત્રી અને તૃણમૂલ કોંગ્રેસ (TMC)ના પ્રમુખ મમતા બેનર્જીએ પાર્ટીના નેતાઓ પર થયેલા કથિત હુમલાઓને લઈને ભારતીય જનતા પાર્ટી (BJP) પર આકરા પ્રહાર કર્યા છે. તેમણે આરોપ લગાવ્યો કે TMCના વરિષ્ઠ નેતા અને સાંસદ અભિષેક બેનર્જી અને કલ્યાણ બેનર્જી પર આયોજનબદ્ધ રીતે હુમલો કરવામાં આવ્યો હતો. રવિવારે (31 મે, 2026) સોશિયલ મીડિયા પ્લેટફોર્મ X (પૂર્વે ટ્વિટર) પર પોસ્ટ કરીને મમતા બેનર્જીએ લખ્યું કે BJP સમર્થકોએ ગઈકાલે લોકસભામાં TMCના ફ્લોર લીડર અભિષેક બેનર્જી પર નિર્દયતાપૂર્વક હુમલો કર્યો હતો અને તેમને લિંચ કરવાનો પ્રયાસ કર્યો હતો. તેમણે દાવો કર્યો કે આ ઘટનાના ભયાનક વીડિયો જાહેરમાં ઉપલબ્ધ છે.

મમતાએ વધુમાં જણાવ્યું કે આજે કલ્યાણ બેનર્જી પણ BJP દ્વારા કરવામાં આવેલા આયોજનબદ્ધ હુમલાનો શિકાર બન્યા છે. તેમણે આરોપ લગાવ્યો કે BJP લોકશાહીની હત્યા કરી રહી છે.

Yesterday, BJP supporters brutally attacked and lynched @AITCofficial Lok Sabha Floor Leader @abhishekaitc. The terrifying videos are in the public domain.
Today, our Chief Whip in Lok Sabha, @KBanerjee_AITC was also a victim of a planned BJP attack.

BJP murdering democracy. https://t.co/HF1dmQIZSX

— Mamata Banerjee (@MamataOfficial) May 31, 2026

દક્ષિણ 24 પરગણા જિલ્લાના સોનારપુરમાં શનિવારે (30 મે, 2026) TMCના રાષ્ટ્રીય મહાસચિવ અને સાંસદ અભિષેક બેનર્જીને વિરોધ પ્રદર્શનનો સામનો કરવો પડ્યો હતો. આ દરમિયાન તેમની વિરુદ્ધ નારેબાજી કરવામાં આવી હતી અને તેમની સાથે ધક્કામુક્કી તેમજ હુમલો કરાયો હોવાના આરોપો પણ લાગ્યા હતા. ઘટના બાદ તેમને તબીબી તપાસ માટે હોસ્પિટલમાં પણ લઈ જવામાં આવ્યા હતા. ત્યારબાદ રવિવારે (31 મે, 2026) હુગલી જિલ્લાના ચંદિતાલા વિસ્તારમાં TMCના સાંસદ કલ્યાણ બેનર્જી સાથે પણ હોબાળો થયો હોવાના અહેવાલો સામે આવ્યા હતા.

માહિતી મુજબ, ફરિયાદ નોંધાવવા માટે પોલીસ સ્ટેશન જઈ રહેલા કલ્યાણ બેનર્જીને પ્રદર્શનકારીઓએ ઘેરી લીધા હતા, તેમને કાળા ઝંડા બતાવવામાં આવ્યા હતા અને તેમની સામે વિરોધ પ્રદર્શન કરવામાં આવ્યું હતું. ઘટના દરમિયાન તેમની સાથે ધક્કામુક્કી પણ થઈ હોવાનો આરોપ છે.

પશ્ચિમ બંગાળની રાજનીતિમાં ગરમાયો માહોલ

પશ્ચિમ બંગાળની રાજનીતિમાં તાજેતરની ઘટનાઓ બાદ આરોપ-પ્રત્યારોપનો દોર વધુ તેજ બન્યો છે. TMC એક તરફ BJP પર રાજકીય હિંસાને પ્રોત્સાહન આપવાનો આરોપ મૂકી રહી છે, જ્યારે બીજી તરફ આ આરોપો અંગે BJPની સત્તાવાર પ્રતિક્રિયાની રાહ જોવામાં આવી રહી છે.

મમતા બેનર્જીના નિવેદન બાદ રાજ્યમાં રાજકીય તણાવ વધુ વધવાની શક્યતા વ્યક્ત કરવામાં આવી રહી છે. અભિષેક બેનર્જી અને કલ્યાણ બેનર્જી સાથે જોડાયેલી બંને ઘટનાઓને લઈને વિવિધ રાજકીય પક્ષો અને નેતાઓની પ્રતિક્રિયાઓ પણ સામે આવી રહી છે. આ સમગ્ર મામલો હવે માત્ર વિરોધ પ્રદર્શન પૂરતો મર્યાદિત રહ્યો નથી, પરંતુ પશ્ચિમ બંગાળના રાજકીય વાતાવરણમાં નવી ચર્ચા અને વિવાદનું કારણ બન્યો છે.

આ પણ વાંચો: મુઝફ્ફરનગરમાં હૃદયદ્રાવક ઘટના: ભાઈએ બહેનનું ચાકૂથી ગળું કાપી નાખ્યું, આરોપી ફરાર