એપ્સટિન વિવાદ ફરી ગરમાયો, DOJ વેબસાઇટ પરથી 16 ફાઈલ અચાનક ગાયબ, અમેરિકામાં હોબાળો
જેફરી એપ્સટિનને લગતો વિવાદ ફરી એકવાર અમેરિકામાં ગરમાયો છે. આ વખતનો વિવાદ યુએસ ડિપાર્ટમેન્ટ ઓફ જસ્ટિસ (DOJ)ની સત્તાવાર વેબસાઇટને લઈને ઊભો થયો છે, જ્યાંથી એપ્સટિન કેસ સંબંધિત કેટલાક મહત્વપૂર્ણ દસ્તાવેજો અચાનક ગાયબ કરી દેવામાં આવ્યા છે. આ ઘટનાએ અનેક પ્રશ્નો ઊભા કર્યા છે—શું આ માત્ર કોઈ ટેકનિકલ ખામી હતી કે પછી કોઈ મહત્વપૂર્ણ સત્ય છુપાવવાનો પ્રયાસ?
અહેવાલો મુજબ, આ દસ્તાવેજો માત્ર એક દિવસ પહેલાં જ DOJની જાહેર વેબસાઇટ પર અપલોડ કરવામાં આવ્યા હતા, પરંતુ બીજા જ દિવસે તે ગાયબ થઈ ગયા. સૌથી વધુ ચર્ચામાં આવેલી બાબત એ છે કે આ ગાયબ થયેલા રેકોર્ડ્સમાં ડોનાલ્ડ ટ્રમ્પનો એક ફોટોગ્રાફ પણ સામેલ હતો.
કયા રેકોર્ડ દૂર કરવામાં આવ્યા?
જાહેર પોર્ટલ પરથી દૂર કરવામાં આવેલા દસ્તાવેજોમાં ઘણા ફોટોગ્રાફ્સ અને ફાઇલો હતી જે એપ્સટિનની અંગત સંપત્તિ સાથે સંબંધિત હોવાનું કહેવાય છે. આમાં તેમના ઘરમાં રહેલા આર્ટવર્ક, ફર્નિચર અને ખાનગી ડ્રોઅરમાંથી મળેલી વસ્તુઓના ફોટા હતા. કેટલાક ફોટોગ્રાફ્સ વાંધાજનક હોવાનો દાવો કરવામાં આવ્યો છે. આ ફાઇલોમાં એક એવો ફોટો પણ હતો જેમાં ડોનાલ્ડ ટ્રમ્પ, તેમની પત્ની મેલાનિયા ટ્રમ્પ અને ઘિસ્લેન મેક્સવેલ જેફરી એપ્સટિન સાથે દેખાય છે. આ ફોટો સમગ્ર મામલાને વધુ સંવેદનશીલ બનાવી રહ્યો છે.
ન્યાય વિભાગનું મૌન શંકાઓ ઉભી કરે છે
જ્યારે ફાઇલો અચાનક ગાયબ થઈ ગયા પછી ન્યાય વિભાગ સમક્ષ પ્રશ્નો ઉઠાવવામાં આવ્યા, ત્યારે કોઈ સ્પષ્ટ જવાબ મળ્યો ન હતો. વિભાગે સ્પષ્ટતા કરી ન હતી કે દસ્તાવેજો ભૂલથી હટાવી લેવાયા કે જાણી જોઈને વેબસાઇટ પરથી દૂર કરવામાં આવ્યા. આ મૌનને કારણે સોશિયલ મીડિયા અને રાજકીય વર્તુળોમાં અટકળો તેજ બની છે. ઘણા લોકો પ્રશ્ન કરી રહ્યા છે કે શું જાહેર જનતાથી કોઈ મહત્વપૂર્ણ માહિતી છુપાવવામાં આવી રહી છે?
વિપક્ષી સાંસદોના પારદર્શિતા પર સવાલ
ઘણા ડેમોક્રેટિક સાંસદોએ જાહેરમાં આ મુદ્દો ઉઠાવ્યો છે. તેઓ કહે છે કે જ્યારે મામલો આટલો ગંભીર અને હાઇ-પ્રોફાઇલ છે, ત્યારે દસ્તાવેજો ગાયબ થવાથી લોકશાહી અને પારદર્શિતા બંને પર પ્રશ્નો ઉભા થાય છે. ખાસ કરીને ટ્રમ્પને દર્શાવતા ફોટોગ્રાફના હટાવાને લઈને વધુ શંકા વ્યક્ત કરવામાં આવી રહી છે, જે હવે જાહેરમાં ઉપલબ્ધ નથી.
દસ્તાવેજોમાં ક્લિન્ટનનું નામ દેખાય છે, પરંતુ ટ્રમ્પ કેમ ગાયબ?
અત્યાર સુધી જે રેકોર્ડ જાહેર કરવામાં આવ્યા છે તેમાં ભૂતપૂર્વ રાષ્ટ્રપતિ બિલ ક્લિન્ટન અને અન્ય પ્રભાવશાળી વ્યક્તિઓનો ઉલ્લેખ છે. પરંતુ ડોનાલ્ડ ટ્રમ્પનું નામ લેખિત રેકોર્ડમાં ન દેખાવું અનેક સવાલો ઊભા કરે છે. કારણ કે અગાઉ બહાર આવેલા કેટલાક દસ્તાવેજો, જેમ કે એપ્સટિનના ખાનગી ફ્લાઇટ લોગ્સમાં ટ્રમ્પનું નામ જોવા મળ્યું હતું. જોકે, ટ્રમ્પે અગાઉ સ્પષ્ટતા કરી છે કે એપ્સટિનના ગુનાહિત મામલાઓમાં તેમનો કોઈ સંબંધ નથી અને તેમની સામે કોઈ આરોપ બાકી નથી.
આ પણ વાંચો: પત્નીને જેલમાં ખેંચી લઈ જવામાં આવી, ઈમરાન ખાને જેલમાંથી ચીસો પાડીને શાહિદ આફ્રિદીને મોકલ્યો ગુપ્ત સંદેશ?
