ITR ફાઈલિંગ 2026: નવી ડેડલાઇન જાહેર, જાણો 31 જુલાઈ કે 31 ઓગસ્ટ?
ITR Filing 2026: વિત્ત વર્ષ 2025-26 માટે ઇન્કમ ટેક્સ રિટર્ન (ITR) ફાઈલ કરવા જઈ રહેલા કરદાતાઓ માટે આ વખતે કેટલાક મહત્વપૂર્ણ ફેરફારો કરવામાં આવ્યા છે. નિર્મલા સીતારામણ દ્વારા રજૂ કરાયેલા બજેટ 2026 મુજબ અલગ-અલગ કેટેગરી માટે ITR ફાઈલ કરવાની સમયમર્યાદા બદલાઈ ગઈ છે. સમયસર રિટર્ન ન ભરવામાં આવે તો દંડ અને વ્યાજ બંને ચૂકવવું પડી શકે છે.
સેલેરીડ વર્ગ માટે 31 જુલાઈ ડેડલાઇન
જો તમે સેલેરીડ કર્મચારી છો અથવા તમારી આવક પેન્શન અને ઈન્વેસ્ટમેન્ટમાંથી આવે છે, તો તમારી માટે ITR ફાઈલ કરવાની છેલ્લી તારીખ 31 જુલાઈ, 2026 નક્કી કરવામાં આવી છે. ITR-1 અને ITR-2 ભરનારા કરદાતાઓ માટે આ સમયમર્યાદા ફરજિયાત છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
ફ્રીલાન્સર્સ અને નાના વ્યવસાય માટે રાહત
જે લોકો ફ્રીલાન્સિંગ કરે છે અથવા નાના વ્યવસાય સાથે જોડાયેલા છે અને જેમના એકાઉન્ટ્સ માટે ઓડિટ જરૂરી નથી, તેમના માટે ડેડલાઇન 31 ઓગસ્ટ, 2026 રાખવામાં આવી છે. આ વર્ગને એક મહિના વધુ સમય આપવામાં આવ્યો છે જેથી તેઓ સરળતાથી રિટર્ન ફાઈલ કરી શકે.
ઓડિટ કેસ માટે 31 ઓક્ટોબર સુધી સમય
જેઓના બિઝનેસ માટે ટેક્સ ઓડિટ ફરજિયાત છે, તેમને 31 ઓક્ટોબર, 2026 સુધી ITR ફાઈલ કરવાની છૂટ આપવામાં આવી છે. આ સમયગાળા દરમિયાન ઓડિટ પ્રક્રિયા પૂર્ણ કરી શકાય છે.
મોડું ફાઈલ કરશો તો શું થશે?
જો તમે સમયમર્યાદા ચૂકી જશો, તો 31 ડિસેમ્બર, 2026 સુધી ‘Belated Return’ ફાઈલ કરી શકો છો. પરંતુ તેમાં દંડ અને બાકી ટેક્સ પર વ્યાજ ચૂકવવું ફરજિયાત રહેશે.
રિવાઈઝ અને અપડેટેડ રિટર્નની સુવિધા
જો રિટર્નમાં કોઈ ભૂલ રહી જાય, તો તેને 31 ડિસેમ્બર, 2026 સુધી ‘Revised Return’ તરીકે સુધારી શકાય છે. ઉપરાંત જૂના વર્ષોની આવક જાહેર કરવા માટે ITR-U (Updated Return) નો વિકલ્પ 31 માર્ચ, 2031 સુધી ઉપલબ્ધ રહેશે.
નવા કાયદા ક્યારે લાગુ થશે?
ધ્યાનમાં રાખવા જેવી બાબત એ છે કે FY 2025-26 માટેના રિટર્ન હજી Income Tax Act 1961 હેઠળ જ ફાઈલ કરવાના રહેશે. જોકે, 1 એપ્રિલ 2027થી નવો Income Tax Act 2025 અમલમાં આવશે, જેમાં નવા નિયમો અને ફોર્મ્સ રજૂ કરવામાં આવશે.
કરદાતાઓ માટે સલાહ
નિષ્ણાતોનું માનવું છે કે કરદાતાઓએ છેલ્લી ઘડીએ દોડધામ ટાળવા માટે સમયસર ITR ફાઈલ કરવું જોઈએ. યોગ્ય દસ્તાવેજો તૈયાર રાખીને સમયમર્યાદા પહેલાં રિટર્ન ભરવું વધુ ફાયદાકારક છે.
