ઈરાને આજે ફરી કુવૈત, દુબઈ અને ઇઝરાયેલમાં કર્યો મોટો હુમલો, રડાર સિસ્ટમને ભારે નુકસાન

Iran Israel Conflict: શનિવારે ઈરાને મિડલ ઈસ્ટમાં તણાવ વધારી દીધો. ઈરાની સેનાએ કુવૈત આંતરરાષ્ટ્રીય એરપોર્ટ પર ડ્રોન હુમલા કર્યા. ત્યારબાદ કુવૈત નાગરિક ઉડ્ડયન સત્તામંડળે જણાવ્યું કે આ હુમલામાં એરપોર્ટની રડાર સિસ્ટમને ભારે નુકસાન થયું છે. ઈરાન અહીં અટક્યું નહીં. આજે ઈરાની સેનાએ દાવો કર્યો કે તેણે સંયુક્ત આરબ અમીરાતમાં સ્થિત યુક્રેનની એન્ટી-ડ્રોન સિસ્ટમના ડિપોને નિશાન બનાવ્યું, જેનો ઉપયોગ અમેરિકી સેનાને મદદ કરવા માટે થતો હતો.

ઈરાનની સેન્ટ્રલ મિલિટરી ઓપરેશન્સ કમાન્ડ ખાતમ અલ-અંબિયાએ રાજ્ય ટીવી પર પ્રસારિત એક નિવેદનમાં જણાવ્યું હતું કે દુબઈમાં અમેરિકી કમાન્ડરો અને સૈનિકોના ઠેકાણાઓ સાથે સાથે યુક્રેનની એન્ટી-ડ્રોન સિસ્ટમ ડિપોને પણ નિશાન બનાવી નષ્ટ કરવામાં આવ્યો છે. આ પહેલા, શનિવારે જવોલોડીમીર ઝેલેન્સકીએ અચાનક યુએઈની મુલાકાત દરમિયાન કહ્યું હતું કે બંને દેશો રક્ષા ક્ષેત્રમાં સહકાર વધારવા માટે સંમત થયા છે.

ઇઝરાયેલ પર હુમલો

દરમિયાન, ઈરાન સમર્થિત હુતી બળવાખોરોએ શનિવારે વહેલી સવારે ઇઝરાયલ તરફ મિસાઇલ છોડવાનો દાવો કર્યો. મધ્ય પૂર્વમાં યુદ્ધ શરૂ થયા પછી આ તેમનો પહેલો હુમલો હોવાનું કહેવાય છે. જોકે, ઇઝરાયેલી સેનાએ જણાવ્યું કે મિસાઇલને વચ્ચે જ રોકી દેવામાં આવી હતી. શુક્રવારે ઈરાન સામે પોતાની કાર્યવાહી વધુ તેજ અને વિસ્તૃત કરવાની ધમકી આપ્યા પછી, ઇઝરાયલે ઈરાનના પરમાણુ પ્લાન્ટ્સ પર હુમલો કર્યો હતો.

દુબઈ પર હુમલો

ઈરાને શનિવારે દાવો કર્યો કે પશ્ચિમ એશિયામાં ચાલી રહેલા સંઘર્ષ વચ્ચે તેણે દુબઈમાં અમેરિકી સેનાના બે છુપાયેલા ઠેકાણાઓ પર હુમલો કર્યો છે. આ માહિતી ફાર્સ ન્યૂઝ એજન્સી દ્વારા આપવામાં આવી હતી. સમાચાર એજન્સી મુજબ, હઝરત ખાતમ અલ-અંબિયાના કેન્દ્રીય મુખ્યાલયના પ્રવક્તાએ દાવો કર્યો હતો કે આ પ્રદેશમાં અમેરિકી ઠેકાણાઓ પર ઈરાની હુમલાઓ બાદ અમેરિકી લશ્કરી કર્મચારીઓ આ ઠેકાણાઓમાં ગયા હતા. પ્રવક્તાના જણાવ્યા અનુસાર, આ બંને સ્થળોએ કુલ 500થી વધુ અમેરિકી સૈનિકો હાજર હતા, જેમાં પહેલા ઠેકાણામાં આશરે 400 અને બીજા ઠેકાણામાં 100 હતા.

ફાર્સ ન્યૂઝ એજન્સી દ્વારા પ્રકાશિત પ્રવક્તાના દાવા અનુસાર, IRGC એ આ સ્થળોને ઓળખી કાઢ્યા હતા અને ચોક્કસ મિસાઈલ અને ડ્રોન હુમલા કર્યા હતા, જેના કારણે ભારે નુકસાન થયું હતું. પ્રવક્તાએ આગળ કહ્યું કે ટ્રમ્પ અને અમેરિકી સેનાના કમાન્ડરોને હવે સમજાઈ ગયું હશે કે આ વિસ્તાર અમેરિકી સૈનિકો માટે કબ્રસ્તાન બની શકે છે, અને તેમને બહાદુર યોદ્ધાઓ સામે આત્મસમર્પણ કરવું પડશે.

આ પણ વાંચો: ઈરાનના પરમાણુ પ્લાન્ટ પર ઇઝરાયલ હુમલો નિષ્ફળ ગયો? IAEAએ આપી મહત્ત્વની જાણકારી