T20 World Cup Final: ટીમ ઈન્ડિયાની ફાઈનલમાં જીત માટે આ 3 ટર્નિંગ પોઈન્ટ મહત્ત્વના સાબિત થયા

ICC T-20 World Cup 2026: ભારતે T20 વર્લ્ડ કપ 2026 ની ફાઇનલમાં ન્યુઝીલેન્ડને 96 રનથી હરાવીને સતત બીજી વખત T20 વર્લ્ડ કપ જીત્યો છે. ટીમ ઇન્ડિયાએ એકતરફી રીતે ફાઇનલ જીતી. પહેલા બેટિંગ કરતા, ભારતીય ટીમે 20 ઓવરમાં 5 વિકેટ ગુમાવીને 255 રન બનાવ્યા. જવાબમાં, કિવી ટીમ 19 ઓવરમાં 159 રનમાં ઓલઆઉટ થઈ ગઈ. આ ફાઇનલમાં ટીમ ઇન્ડિયા માટે બધા ખેલાડીઓનું યોગદાન મહત્વપૂર્ણ હતું, પરંતુ અમે તમને ફાઇનલના ત્રણ સૌથી મોટા ટર્નિંગ પોઈન્ટ વિશે જણાવીશું.
અભિષેક શર્માનું ફોર્મમાં વાપસી
આ વર્લ્ડ કપ ફાઇનલ પહેલા, ટીમ ઇન્ડિયાનો ઓપનિંગ બેટ્સમેન અભિષેક શર્મા દરેક રન માટે ઝંખતો હતો. પરંતુ તેણે ફાઇનલ માટે પોતાનું શ્રેષ્ઠ પ્રદર્શન બચાવી લીધું હતું. ફાઇનલ મેચમાં, અભિષેકે શરૂઆતથી જ આક્રમક બેટિંગ કરી અને મેચ ન્યૂઝીલેન્ડથી છીનવી લીધી. તેણે આ મોટી મેચમાં 21 બોલમાં 6 ચોગ્ગા અને 3 છગ્ગાની મદદથી 52 રન બનાવ્યા, જેનો સ્ટ્રાઇક રેટ 247.62 હતો. આ મેચમાં ટીમ ઈન્ડિયા માટે તેનું ફોર્મમાં પાછા ફરવું એ સૌથી મોટી રાહત હતી.
અમારી WhatsApp ચેનલમાં જોડાવા આ લીંક પર ક્લીક કરો
અભિષેક અને સંજુ સેમસનની ભાગીદારી
જ્યારે અભિષેક શર્મા ફાઇનલમાં રન શોધી રહ્યો હતો, ત્યારે બીજી તરફ સંજુ સેમસન છેલ્લી કેટલીક મેચોમાં શાનદાર ફોર્મમાં હતો. આ મેચમાં, તેણે અભિષેક શર્મા સાથે ઇનિંગની શરૂઆત કરી અને શરૂઆતથી જ ઝડપી ગતિએ રન બનાવ્યા. બંનેએ પ્રથમ વિકેટ માટે 98 રનની ભાગીદારી કરી. આ ભાગીદારી પછી, કિવી ટીમ ક્યારેય મેચમાં વાપસી કરી શકી નહીં. સંજુએ 46 બોલમાં 5 ચોગ્ગા અને 8 છગ્ગાની મદદથી 89 રન બનાવ્યા. આ ઇનિંગે ટીમ ઈન્ડિયાને ફાઇનલમાં આટલા ઊંચા સ્કોર સુધી પહોંચવામાં મદદ કરી.
જસપ્રીત બુમરાહની શાર્પ બોલિંગ
ફાઇનલ મેચ માટે અમદાવાદની પિચ બેટ્સમેન માટે ખૂબ સારી હતી. આવી સ્થિતિમાં, 255 રનના લક્ષ્યનો બચાવ કરવા માટે, ટીમ ઈન્ડિયાને શક્ય તેટલી ઝડપથી વિકેટ લેવાની જરૂર હતી. આ મેચમાં ટીમ ઈન્ડિયા માટે જસપ્રીત બુમરાહ શ્રેષ્ઠ બોલર હતો. તેણે પોતાના ચાર ઓવરના સ્પેલમાં માત્ર 15 રન આપીને ચાર મહત્વપૂર્ણ વિકેટ લીધી અને ટીમ ઈન્ડિયાનો વિજય સુનિશ્ચિત કર્યો. બુમરાહે ફાઇનલમાં રચિન રવિન્દ્ર, મિશેલ સેન્ટનર, જેમ્સ નીશમ અને મેટ હેનરીની વિકેટ લીધી. તેના સિવાય અક્ષર પટેલે પણ આ મેચમાં ત્રણ મહત્વપૂર્ણ વિકેટ લીધી.
આ પણ વાંચો: ફાઈનલમાં મેચમાં મેદાન પર થયો મોટો ડખો, સૂર્યાએ મામલો શાંત પાડ્યો












