શ્રીલંકા ટેસ્ટ પહેલાં ટીમ ઈન્ડિયાને મોટો ઝટકો, વોશિંગ્ટન સુંદર પ્રથમ મેચમાંથી બહાર

IND Vs SL : ભારતીય ટીમ ઓગસ્ટમાં બે મેચની ટેસ્ટ શ્રેણી માટે શ્રીલંકાનો પ્રવાસ કરશે. આ ટેસ્ટ શ્રેણી પહેલા, ટીમ ઈન્ડિયા અનેક ઇજાઓનો સામનો કરી રહી છે. સ્ટાર ઓલરાઉન્ડર વોશિંગ્ટન સુંદર 15 ઓગસ્ટથી ગાલેમાં શરૂ થનારી શ્રીલંકા સામેની પહેલી ટેસ્ટ રમી શકશે નહીં. નીતિશ કુમાર રેડ્ડી અને ફાસ્ટ બોલર હર્ષિત રાણાને થયેલી ઇજાઓને કારણે બંને ટેસ્ટમાં રમવું મુશ્કેલ બની રહ્યું છે.

BCCI સૂત્રએ સુંદર અને બુમરાહને લઈને આપ્યું મોટું અપડેટ

BCCI ના એક સૂત્રએ જણાવ્યું છે કે, સંપૂર્ણ ફિટનેસ હાંસલ કર્યા બાદ જ વોશિંગ્ટન સુંદર બીજી ટેસ્ટ મેચ માટે ઉપલબ્ધ થશે. નોંધનીય છે કે, આ મહિનાની શરૂઆતમાં ભારતના ઇંગ્લેન્ડ પ્રવાસ દરમિયાન સુંદરના પગમાં ઇજા થઈ હતી. બીજી તરફ, ટોપ ઓર્ડર બેટ્સમેન સાઈ સુદર્શનની ઉપલબ્ધતા પણ તેમની ફિટનેસ પર નિર્ભર કરે છે, પરંતુ આ ડાબોડી બેટ્સમેન ટૂંક સમયમાં જ સાજો થઈ જાય તેવી પૂરી શક્યતા છે. સૂત્રએ વધુમાં માહિતી આપતાં જણાવ્યું હતું કે, ભારતના મુખ્ય ફાસ્ટ બોલર જસપ્રીત બુમરાહ ૩૦ જુલાઈ સુધી આરામ કરશે. ત્યારબાદ તેઓ બેંગલુરુ સ્થિત BCCI ના ‘સેન્ટર ઓફ એક્સેલન્સ’ (Center of Excellence) ખાતે રિપોર્ટ કરશે.

રવિન્દ્ર જાડેજાને ટેસ્ટ શ્રેણીમાં તક મળી શકે છે

વોશિંગ્ટન સુંદર ઈજાને કારણે બહાર થઈ ગયા હોવાથી, રવિન્દ્ર જાડેજાનું નામ હવે લગભગ નિશ્ચિત માનવામાં આવે છે. વર્લ્ડ ટેસ્ટ ચેમ્પિયનશિપ (WTC) ફાઇનલમાં પહોંચવા માટે ભારતે શ્રીલંકા સામેની આ ટેસ્ટ શ્રેણી જીતવી જ જોઈએ. ટીમની બેટિંગની વાત કરીએ તો, યશસ્વી જયસ્વાલ અને કેએલ રાહુલ ઇનિંગની શરૂઆત કરે તે નિશ્ચિત છે. જો સાઈ સુદર્શન સંપૂર્ણપણે ફિટ થશે, તો તે ત્રીજા નંબર પર બેટિંગ કરશે. જો તે ફિટ નહીં થાય, તો તેના સ્થાને દેવદત્ત પડિકલને તક મળી શકે છે. કેપ્ટન શુભમન ગિલ ચોથા નંબર પર બેટિંગ કરશે અને વિકેટકીપર-બેટ્સમેન ઋષભ પંત પાંચમા નંબર પર બેટિંગ કરશે.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

ભારતીય ટીમ પોઈન્ટ્સ ટેબલમાં પાંચમા ક્રમે

વર્લ્ડ ટેસ્ટ ચેમ્પિયનશિપ (WTC) 2025-27 ના પોઈન્ટ્સ ટેબલની વાત કરીએ તો, ભારતીય ટીમ હાલમાં પાંચમા સ્થાને છે. ભારત આ વર્તમાન ચક્ર (સાઇકલ) માં અત્યાર સુધીમાં કુલ 9 ટેસ્ટ મેચ રમી ચૂક્યું છે, જેમાં તેને 4 મેચમાં જીત અને ૪ મેચમાં હારનો સામનો કરવો પડ્યો છે. ટીમ ઈન્ડિયા હાલમાં 48.15 ટકા વિનિંગ પર્સન્ટેજ (Win Percentage) સાથે પાંચમા ક્રમે છે.

આ પણ વાંચો :PM મોદી અને Gen-Z વચ્ચે સંવાદ, યુવાનોએ વ્યક્ત કર્યો વિશ્વાસ

આ પણ વાંચો :યુરોપ બાદ હવે અમેરિકામાં જળકટોકટી, આખું શહેર તરસની કગાર પર