સ્થાનિક સ્વરાજ્ય ચૂંટણી માટે ગુજરાત સજ્જ, 4.19 કરોડ મતદારો કરશે મતાધિકારનો ઉપયોગ

Local Body Elections: આવતીકાલે 26 એપ્રિલે ગુજરાતમાં સ્થાનિક સ્વરાજ્યની ચૂંટણીઓ માટે વહીવટી તંત્ર અને પોલીસ વિભાગે તમામ તૈયારીઓને આખરી ઓપ આપી દીધો છે. રાજ્યભરમાં 4.19 કરોડ મતદારો 15 મહાનગરપાલિકા, 84 નગરપાલિકા, 34 જિલ્લા પંચાયત અને 260 તાલુકા પંચાયતની કુલ આશરે 9,992 બેઠકો માટે મતદાન કરશે. મતદાન સવારે 7 વાગ્યાથી સાંજે 6 વાગ્યા સુધી ચાલશે, જ્યારે મતગણતરી 28 એપ્રિલે કરવામાં આવશે.

મજબૂત સુરક્ષા વ્યવસ્થા

રાજ્યમાં સુરક્ષા માટે વિશાળ બંદોબસ્ત ગોઠવવામાં આવ્યો છે. ગુજરાત પોલીસના ડીજીપી ડો. કે.એલ.એન. રાવે તમામ જિલ્લા પોલીસ અધિકારીઓ સાથે વીડિયો કોન્ફરન્સ દ્વારા સુરક્ષા વ્યવસ્થાની સમીક્ષા કરી છે. રાજ્યભરમાં કુલ 1 લાખથી વધુ સુરક્ષા જવાનો તૈનાત કરવામાં આવ્યા છે, જેમાં 59,525 હોમગાર્ડ અને જીઆરડી જવાનો તેમજ 41,383 વધારાના પોલીસ કર્મચારીઓનો સમાવેશ થાય છે. તમામ પોલીસ કર્મચારીઓની રજાઓ રદ કરવામાં આવી છે. સંવેદનશીલ મતદાન મથકો પર વિશેષ સુરક્ષા, સરહદી વિસ્તારોમાં ચેકિંગ અને હિસ્ટ્રીશીટરો પર કડક નજર રાખવામાં આવી રહી છે.

કર્મચારીઓની તૈનાતી

રાજ્યભરમાં 4.49 લાખથી વધુ મતદાન કર્મચારીઓને તેમના મથકો પર રવાના કરવામાં આવ્યા છે. પ્રિસાઇડિંગ અધિકારીઓ, પોલિંગ અધિકારીઓ અને અન્ય ચૂંટણી સ્ટાફને EVM સાથે તેમના નિર્ધારિત કેન્દ્રો પર મોકલવામાં આવ્યા છે. અમરેલી, સુરત, દાહોદ અને બનાસકાંઠા જેવા જિલ્લાઓમાં પણ મોટી સંખ્યામાં કર્મચારીઓ પહેલેથી જ તૈનાત છે.

આરોગ્ય સુવિધાઓ

ગરમીને ધ્યાનમાં રાખીને દરેક મતદાન મથક પર આરોગ્ય સંબંધિત ખાસ વ્યવસ્થા કરવામાં આવી છે. છાંયડો, કુલર, ORS, પીવાનું પાણી, મેડિકલ કિટ, એમ્બ્યુલન્સ અને ડોક્ટર્સની સુવિધા ઉપલબ્ધ રહેશે. વડીલ અને દિવ્યાંગ મતદારો માટે ખાસ સુવિધાઓ પણ ઉભી કરવામાં આવી છે.

ગુજરાત સ્ટેટ ઇલેક્શન કમિશને જણાવ્યું છે કે તમામ તૈયારીઓ પૂર્ણ થઈ ગઈ છે અને મતદાન શાંતિપૂર્ણ, સરળ અને પારદર્શક રીતે યોજાશે. નાગરિકોને મોટી સંખ્યામાં મતદાન કરવા અને લોકશાહી પ્રક્રિયામાં ભાગ લેવા અપીલ કરવામાં આવી છે.

આ પણ વાંચો: અમદાવાદ મ્યુનિસિપલ કોર્પોરેશન દ્વારા વાડજ સ્મશાનના આધુનિક પુનર્વિકાસ માટે વ્યાપક કામગીરી હાથ ધરાઈ