આ દિવાળીએ જરૂરી ચીજવસ્તુઓ સસ્તી થશે, પીએમ મોદીની જીએસટી અંગે મોટી જાહેરાત

નવી દિલ્હી, 15 ઓગસ્ટ 2025:  વડાપ્રધાન નરેન્દ્ર મોદીએ આજે સ્વાતંત્ર્ય દિવસના અવસરે લાલ કિલ્લાની પ્રાચીર પરથી મોટી જાહેરાત કરી. તેમણે કહ્યું કે આ દિવાળીએ દેશને એક મોટી ભેટ આપવા જઈ રહ્યો છું. તેમણે જણાવ્યું કે લાંબા સમયથી દેશમાં જીએસટી સુધારણાની વાત ચાલી રહી છે. આ માટે અમે રાજ્યો સાથે પણ વાતચીત કરી છે. એક ઉચ્ચસ્તરીય સમિતિ આ મુદ્દે ચર્ચા કરી રહી છે. પીએમએ કહ્યું કે ટૂંક સમયમાં આ અંગે જાહેરાત થઈ શકે છે, જેથી રોજિંદા જીવનની જરૂરી ઘણી ચીજવસ્તુઓ સસ્તી થઈ જશે.

લાંબા સમયથી પેટ્રોલ-ડીઝલને જીએસટીના દાયરામાં લાવવાની માંગ થઈ રહી છે. આ મુદ્દે કેન્દ્ર અને રાજ્યો વચ્ચે મતભેદ ચાલી રહ્યા છે. સ્વાતંત્ર્ય દિવસના અવસરે વડાપ્રધાન મોદી દ્વારા જીએસટી સુધારણાની ચર્ચાથી એવા સંકેત મળી રહ્યા છે કે કેન્દ્ર સરકાર રાજ્યો સાથે વાતચીત કરીને પેટ્રોલ-ડીઝલને જીએસટીના દાયરામાં લાવવાની જાહેરાત કરી શકે છે. આનાથી ઈંધણના ભાવમાં નોંધપાત્ર ઘટાડો થઈ શકે છે અને લોકોને મોટી રાહત મળશે.

પીએમ મોદીએ 79મા સ્વાતંત્ર્ય દિવસ પર લાલ કિલ્લાની પ્રાચીર પરથી દેશને સંબોધતા જણાવ્યું કે દેશમાં વસ્તુ અને સેવા કર (જીએસટી) લાગુ થયે આઠ વર્ષ થઈ ગયા છે. તેના ફાયદા જોવા મળી રહ્યા છે. હવે આ વર્ષે દિવાળીએ એક ખાસ ભેટ મળવાની છે. તેમણે કહ્યું કે નવી પેઢીના જીએસટી સુધારણા થઈ રહ્યા છે. આ માટે સમીક્ષાનું કામ પૂર્ણ થઈ ગયું છે અને રાજ્યો સાથે પણ સલાહ-મસલત થઈ ચૂકી છે.

વડાપ્રધાને જણાવ્યું કે નવી પેઢીના સુધારાઓ હેઠળ જીએસટીમાં કરની દરો ઘટાડવામાં આવશે. આનો લાભ દેશના સામાન્ય લોકોને મળશે અને ચીજવસ્તુઓ સસ્તી થઈ જશે. આનો ફાયદો સૂક્ષ્મ, લઘુ અને મધ્યમ ઉદ્યોગો (એમએસએમઈ)ને પણ મળશે. નોંધપાત્ર છે કે દેશમાં જીએસટી વ્યવસ્થા 1 જુલાઈ, 2017થી લાગુ કરવામાં આવી હતી.

આ પણ વાંચો : ગોવિંદા સાથે લગ્ન કરવા માટે સુનિતાએ મન્નત માંગી હતી, માતાના મંદિરે જઈને ધ્રુસકેને ધ્રુસકે રડી