દેશમાં અંગ્રેજી બોલનારા લોકોને શરમ આવશે; ગૃહમંત્રી અમિત શાહે કેમ આપ્યું આ નિવેદન

નવી દિલ્હી, 19 જૂન 2025:  ગૃહમંત્રી અમિત શાહે આજે કહ્યું કે ભારતીય ભાષાઓ દેશની આત્મા અને સાંસ્કૃતિક ઓળખનું પ્રતીક છે, અને હવે સમય આવી ગયો છે કે આપણે આપણા ભાષાકીય વારસાને ફરીથી અપનાવીએ અને વિશ્વ સમક્ષ ગર્વથી આગળ વધીએ.

નવી દિલ્હીમાં ભૂતપૂર્વ IAS અધિકારી આશુતોષ અગ્નિહોત્રીના પુસ્તક ‘મૈં બૂંદ સ્વયં, ખુદ સાગર હૂં’ ના વિમોચન પ્રસંગે બોલતા અમિત શાહે કહ્યું, “હવે એ દિવસ દૂર નથી જ્યારે અંગ્રેજી બોલનારાઓ શરમ અનુભવશે. આપણે એવો સમાજ બનાવવો પડશે. પરિવર્તન ફક્ત તે લોકો લાવી શકે છે જેઓ દૃઢ નિશ્ચયી છે. મારું માનવું છે કે આપણા દેશની ભાષાઓ આપણી સંસ્કૃતિના રત્નો છે. જો આપણી ભાષાઓ નહીં હોય, તો આપણી ભારતીય ઓળખ પણ અધૂરી રહેશે.”

શાહે વધુમાં કહ્યું, “આપણા દેશ, સંસ્કૃતિ, ઇતિહાસ અને ધર્મને સમજવા માટે કોઈ વિદેશી ભાષા પૂરતી નથી. આપણે એક અધૂરી વિદેશી ભાષા પર આધાર રાખીને સંપૂર્ણ ભારતની કલ્પના કરી શકતા નથી. હું જાણું છું કે આ લડાઈ સરળ નથી, પરંતુ મને વિશ્વાસ છે કે ભારતીય સમાજ તેમાં વિજયી થશે. ફરી એકવાર આપણે આપણી ભાષાઓમાં દેશને આત્મસન્માન સાથે ચલાવીશું અને વિશ્વનું નેતૃત્વ કરીશું.

આ પણ વાંચો : ED ઓફિસ પહોંચ્યો ડિનો મોરિયા, 65 કરોડના મની લોન્ડ્રિંગ કેસમાં ફરી પૂછપરછ