એલન મસ્ક જઇ રહ્યા છે ઇતિહાસ રચવા, દુનિયાના પહેલા ટ્રિલીયોનેર બનવામાં થોડું જ રહ્યું છે અંતર

ન્યુયોર્ક, 7 નવેમ્બર, 2025: એલન મસ્ક દુનિયાના સૌથી શ્રીમંત વ્યક્તિઓની યાદીમાં પહેલા નંબરે છે અને હવે તે તેનાથી વધુ શ્રીમંત બનીને ઇતિહાસ રચવા જઇ રહ્યા છે. હકીકતમાં ટેસ્લાના શેરહોલ્ડર્સે ગુરુવારે એલન મસ્ક માટે અબજો ડોલરના સેલરી પેકેજને મંજૂરી આપી દીધી છે. ગુરુવારે થયેલી બેઠકમાં 75 ટકાથી વધુ શેરધારકોએ તેનું સમર્થન કર્યુ હતું. તે દરમિયાન મસ્કે કહ્યુ કે આપણે જે મંઝીલ પર પહોંચવાના છીએ તે ટેસ્લાનું ફક્ત આગામી પ્રકરણ જ નથી પરંતુ એક આખુ પુસ્તક છે.

1 ટ્રિલિયન ડોલર કમાવવાનો રસ્તો સ્પષ્ટ

જો મસ્ક તેની કંપનીના લાંબા ગાળાના પ્રદર્શન લક્ષ્યોને પૂર્ણ કરે છે, તો તે 1 ટ્રિલિયન ડોલર સુધી કમાઈ શકે છે. આ પેકેજ મસ્કને લાંબા ગાળા માટે ટેસ્લામાં રાખવા માટે રચાયેલ છે. મોટાભાગના સીઈઓથી વિપરીત, મસ્કને પગાર મળતો નથી. તેની સંપૂર્ણ આવક સ્ટોક ઓપ્શન્સમાંથી આવે છે. હવે, આ નવા પેકેજ હેઠળ, તે આગામી દાયકામાં 423.7 મિલિયન ટેસ્લાના શેર મેળવી શકે છે. જો આ દરમિયાન કંપનીનું બજાર મૂલ્ય 8.5 ટ્રિલિયન ડોલર સુધી પહોંચે છે, તો મસ્કને આશરે 1 ટ્રિલિયન ડોલર ચૂકવવામાં આવશે.

શું ટેસ્લા Nvidiaને વટાવી જશે?

આનો અર્થ એ છે કે ટેસ્લા બોર્ડ દ્વારા વિકસાવવામાં આવેલા પ્રદર્શન-આધારિત પ્રોત્સાહન માળખા અનુસાર, જો કંપની 8.5 ટ્રિલિયન ડોલરના બજાર મૂલ્યનો ટાર્ગેટ પ્રાપ્ત કરે છે, તો મસ્કને અબજો ડોલરનું શેર પેકેજ પ્રાપ્ત થશે. આનાથી કંપનીનો નફો જ નહીં પરંતુ મસ્કની નેટવર્થમાં પણ નોંધપાત્ર વધારો થશે.

આ ટાર્ગેટ પ્રાપ્ત કરવા માટે, ટેસ્લાને તેના શેરના ભાવમાં તેના વર્તમાન સ્તરથી 466% વધારો કરવાની જરૂર પડશે. જો આવું થાય, તો ટેસ્લા Nvidiaને પાછળ છોડીને વિશ્વની સૌથી મૂલ્યવાન કંપની બનશે. વધુમાં, જો મસ્કને આ પેકેજના તમામ 12 હપ્તા મળે, તો તેની કમાણી દરરોજ આશરે 275 મિલિયન ડોલર સુધી પહોંચી જશે. આ પેકેજ કોર્પોરેટ ઇતિહાસમાં સૌથી મોટું માનવામાં આવે છે.

આ પણ વાંચોઃ આ ભારતીય કંપની લાવશે કેમેરા વાળો AI સ્માર્ટ ગ્લાસ, વોઇસ કમાંડથી થશે પેમેન્ટ