ખજુરાહોમાં ભગવાન વિષ્ણુની મૂર્તિ પર CJI ગવઇની ટિપ્પણીનો વિવાદઃ વકીલોએ પત્ર લખી રોષ વ્યક્ત કર્યો
નવી દિલ્હીઃ 17 સપ્ટેમ્બર, 2025: Khajuraho Temple Controversy: ખજુરાહોમાં ભગવાન વિષ્ણુની મૂર્તિ અંગે સુપ્રીમ કોર્ટના ચીફ જસ્ટિસ બી.આર. ગવઈની ટિપ્પણીઓ પર પ્રતિક્રિયાઓનો વરસાદ ચાલુ છે. વકીલ વિનીત જિંદાલ પછી, હવે વકીલ સત્યમ સિંહ રાજપૂતે પણ ખજુરાહોમાં ભગવાન વિષ્ણુની પ્રતિમા પર ચીફ જસ્ટિસ ગવઈને એક જાહેર પત્ર લખ્યો છે, જેમાં તેમની ટિપ્પણીઓનો વિરોધ કરવામાં આવ્યો છે.
પત્ર લખી કર્યો વિરોધ
એડવોકેટ સત્યમ સિંહે CJIને આ ટિપ્પણીઓ પર પુનર્વિચાર કરી પાછી ખેંચવા અને ‘બધા ધાર્મિક સમુદાયોનો વિશ્વાસ પુનઃસ્થાપિત કરવા’ માટે ‘યોગ્ય સ્પષ્ટતા’ કરવા વિનંતી કરી છે.
તેમણે લખ્યું કે, ‘ભગવાન વિષ્ણુના સમર્પિત ભક્ત તરીકે, હું આ ટિપ્પણીઓથી વ્યક્તિગત રીતે આશ્ચર્યચકિત છું. ભગવાન વિષ્ણુ પ્રત્યે લાખો હિન્દુઓની શ્રદ્ધા અને ભક્તિ ફક્ત વ્યક્તિગત માન્યતાનો વિષય નથી, પરંતુ તેમના આધ્યાત્મિક અસ્તિત્વ અને સાંસ્કૃતિક ઓળખનો પાયો છે.’
‘ધર્મની ગરિમા જાળવી રાખો…’
આ દરમિયાન, વિનીત જિંદાલે પોતાના પત્રમાં લખ્યું છે કે, ‘સનાતન ધર્મના અનુયાયી તરીકે, હું CJI ને આ પત્ર લખું છું. મારી માંગ કરી છે કે તેઓ ભગવાન વિષ્ણુ અને સનાતન આસ્થા વિરૂદ્ધના તેમના વાંધાજનક નિવેદનને તાત્કાલિક પરત ખેંચે. આ પત્રની એક નકલ ભારતના માનનીય રાષ્ટ્રપતિને પણ મોકલવામાં આવી છે, જેથી આ મામલો રાષ્ટ્રીય સ્તરે ઉઠાવી શકાય. મને આશા છે કે સુપ્રીમ કોર્ટ અને માનનીય રાષ્ટ્રપતિ આ મામલો ગંભીરતાથી લેશે અને ભારતમાં દરેક ધર્મની ગરિમા જાળવી રાખશે.’
શું છે આ મામલો?
ચીફ જસ્ટિસ બી.આર. ગવઈ અને જસ્ટિસ ઓગસ્ટિન જ્યોર્જ મસીહની ખંડપીઠે ખજુરાહોના પ્રખ્યાત જાવરી મંદિરમાં ભગવાન વિષ્ણુની ખંડિત મૂર્તિનું સમારકામ અને જાળવણી કરવાનો આદેશ માંગતી અરજી પર સુનાવણી કરવાનો ઇનકાર કર્યો હતો અને કહ્યું હતું કે આ મામલો કોર્ટના અધિકારક્ષેત્રમાં નથી પરંતુ ભારતીય પુરાતત્વ સર્વેક્ષણના અધિકારક્ષેત્રમાં આવે છે. સીજેઆઈ ગવઈએ કટાક્ષ કર્યો હતો કે, ‘હવે તમારે ખુદ ભગવાનને પ્રાર્થના કરવી જોઈએ. તમે કહો છો કે તમે ભગવાન વિષ્ણુના કટ્ટર ભક્ત છો, તેથી તેમની પ્રાર્થના કરો.’
આ પણ વાંચોઃ અમદાવાદ: સ્વચ્છ નવરાત્રિ મહોત્સવ સ્પર્ધા-2025નું આયોજન, વિજેતાને રૂ.1 લાખ સુધીના ઈનામ
આ પણ વાંચોઃ ભારતીય રેલવેની સુપર એપ RailOneથી કેવી રીતે બુક કરશો રિઝર્વ, પ્લેટફોર્મ અને જનરલ ટિકિટ, જાણો સરળ રીત
