કોંગ્રેસ નેતા સોનિયા ગાંધીની ફરી તબિયત લથડી, સર ગંગારામ હોસ્પિટલમાં દાખલ કર્યા

નવી દિલ્હી, 16 જૂન 2025: કોંગ્રેસ નેતા સોનિયા ગાંધીની તબિયત વધુ ખરાબ થઈ ગઈ છે. તેમને ગંગારામ હોસ્પિટલમાં દાખલ કરવામાં આવ્યા છે. અહીં ઉલ્લેખનિય છે કે, સોનિયા ગાંધીની તબિયત છેલ્લા કેટલાક દિવસોમાં ખરાબ થઈ ગઈ હતી અને તેમને શિમલાની ઈન્દિરા ગાંધી મેડિકલ કોલેજ અને હોસ્પિટલમાં લઈ જવામાં આવ્યા હતા. જોકે, બાદમાં તેમને હોસ્પિટલમાંથી રજા આપવામાં આવી હતી.

સર ગંગા રામ હોસ્પિટલે એક નિવેદન જારી કર્યું છે

સર ગંગા રામ હોસ્પિટલે એક નિવેદન જારી કરીને સોનિયાના સ્વાસ્થ્ય વિશે માહિતી આપી છે. હોસ્પિટલે કહ્યું, ‘કોંગ્રેસ સંસદીય પક્ષના અધ્યક્ષ સોનિયા ગાંધીને દિલ્હીની સર ગંગા રામ હોસ્પિટલમાં દાખલ કરવામાં આવ્યા છે. પેટ સંબંધિત સમસ્યાઓને કારણે તેમને ગેસ્ટ્રો વિભાગમાં દાખલ કરવામાં આવ્યા છે અને તેઓ નિરીક્ષણ હેઠળ છે.’

શિમલામાં આરોગ્ય તપાસ કેમ કરવામાં આવી?

7 જૂને પણ સોનિયા ગાંધીની તબિયત બગડી હતી, ત્યારબાદ તેમને શિમલાની ઇન્દિરા ગાંધી મેડિકલ કોલેજ અને હોસ્પિટલમાં લઈ જવામાં આવ્યા હતા. જોકે, બાદમાં તેમને હોસ્પિટલમાંથી રજા આપવામાં આવી હતી અને કહેવામાં આવ્યું હતું કે આ એક નિયમિત આરોગ્ય તપાસ હતી.

તે સમયે હિમાચલ પ્રદેશના આરોગ્ય પ્રધાન ધની રામ શાંડિલે કહ્યું હતું કે, ‘હાઈ બ્લડ પ્રેશરની ફરિયાદ બાદ સોનિયા ગાંધીને શિમલાની હોસ્પિટલમાં તપાસ કરાવવી પડી હતી. જોકે, સોનિયા ગાંધીનું સ્વાસ્થ્ય ખૂબ સારું છે. આ ફક્ત એક નિયમિત તપાસ હતી અને ચિંતા કરવાની કોઈ વાત નથી.’

અહીં ઉલ્લેખનિય છે કે, સોનિયા ગાંધી 78 વર્ષના છે અને કોંગ્રેસ સંસદીય પક્ષના પ્રમુખ છે. તેઓ લાંબા સમયથી કોંગ્રેસના અધ્યક્ષ રહ્યા છે. તેઓ રાહુલ અને પ્રિયંકા ગાંધીના માતા છે અને કોંગ્રેસને મજબૂત બનાવવા માટે કામ કર્યું છે. એવું કહેવાય છે કે 2004 માં, જ્યારે યુપીએએ સરકાર બનાવી, ત્યારે સોનિયા ગાંધીને વડા પ્રધાન પદની ઓફર કરવામાં આવી હતી, પરંતુ તેમણે આ પદનો ઇનકાર કરીને મનમોહન સિંહને વડા પ્રધાન બનાવ્યા. તેઓ સક્રિય રાજકારણમાં ઓછા દેખાય છે, પરંતુ પક્ષ માટે વ્યૂહાત્મક અને સલાહકાર ભૂમિકામાં રહે છે.

આ પણ વાંચો: જર્મનીથી હૈદરાબાદ આવી રહેલી ફ્લાઈટમાં બોમ્બ હોવાની સૂચના મળતા હડકંપ મચ્યો, ફ્લાઈટ રિટર્ન ગઈ