વરસાદમાં કાર બંધ થઈ જાય તો ગભરાશો નહીં! આ સ્માર્ટ ટીપ્સ બચાવશે એન્જિન અને હજારો રૂપિયાનો ખર્ચ

Utility News: ચોમાસામાં ધોધમાર વરસાદ બાદ રસ્તાઓ પર પાણી ભરાવાની સમસ્યા સામાન્ય બની જાય છે. આવા સમયે ઘણી વખત કાર પાણીમાં ફસાઈને અચાનક બંધ થઈ જાય છે. આવી સ્થિતિમાં મોટાભાગના લોકો ગભરાઈને કારને વારંવાર સ્ટાર્ટ કરવાનો પ્રયાસ કરે છે, પરંતુ આ એક મોટી ભૂલ સાબિત થઈ શકે છે. નિષ્ણાતોના જણાવ્યા અનુસાર થોડી ધીરજ રાખીને યોગ્ય પગલાં લેવામાં આવે તો એન્જિનને મોટા નુકસાનથી બચાવી શકાય છે અને મોંઘા રિપેરિંગ ખર્ચથી પણ રાહત મળી શકે છે.

વારંવાર કાર સ્ટાર્ટ કરવાની ભૂલ ન કરો

જો પાણીમાં જતા કાર અચાનક બંધ થઈ જાય તો તેને તરત જ ફરી સ્ટાર્ટ કરવાનો પ્રયાસ ન કરો. આવું કરવાથી એર ફિલ્ટર અથવા એક્ઝોસ્ટ દ્વારા પાણી એન્જિનમાં પહોંચી શકે છે. પરિણામે એન્જિન ‘હાઇડ્રોલોક’ થઈ શકે છે, જેમાં પિસ્ટન અને અન્ય આંતરિક ભાગોને ગંભીર નુકસાન પહોંચે છે. આવી સ્થિતિમાં એન્જિન રિપેર અથવા બદલવાનો ખર્ચ લાખો રૂપિયા સુધી પહોંચી શકે છે.

તાત્કાલિક ઇગ્નિશન બંધ કરો

કાર બંધ થતાં જ સૌથી પહેલાં ઇગ્નિશન સ્વિચ બંધ કરી ચાવી કાઢી લો. તેનાથી કારની ઇલેક્ટ્રિકલ સિસ્ટમ, સેન્સર અને અન્ય ઇલેક્ટ્રોનિક ભાગોને શોર્ટ સર્કિટથી બચાવી શકાય છે. જો પાણીનું સ્તર ઝડપથી વધી રહ્યું હોય તો સમયસર બારીઓ ખોલી દો, જેથી જરૂર પડે તો બહાર નીકળવું સરળ બને.

પાણી વધે તો કારમાંથી તરત બહાર નીકળી જાઓ

જો કારની આસપાસ પાણી સતત વધી રહ્યું હોય તો અંદર બેસી રહેવું જોખમી બની શકે છે. શક્ય તેટલી ઝડપથી કારમાંથી બહાર નીકળીને સુરક્ષિત અને ઊંચી જગ્યાએ પહોંચી જવું જોઈએ. ઘણી વખત પાણીના દબાણને કારણે કારના દરવાજા ખૂલતા નથી, તેથી આવી સ્થિતિમાં બારી દ્વારા બહાર નીકળવાનો પ્રયાસ કરવો જોઈએ.

સુરક્ષિત હોય તો કારને ઓછી પાણીવાળી જગ્યાએ ખસેડો

જો પાણીનો પ્રવાહ ઓછો હોય અને સ્થિતિ સુરક્ષિત લાગે તો કારને ન્યુટ્રલ ગિયરમાં મૂકી ધીમે ધીમે ધક્કો મારીને ઓછા પાણીવાળા વિસ્તારમાં લઈ જઈ શકાય છે. ત્યારબાદ કોઈ વિશ્વસનીય મિકેનિક દ્વારા કારની સંપૂર્ણ તપાસ કરાવવી જોઈએ.

ટોઇંગ સેવા અને ઇન્શ્યોરન્સની મદદ લો

જો કારને બહાર કાઢવી શક્ય ન હોય તો તેને ચલાવવાની જબરદસ્તી ન કરો. આવી સ્થિતિમાં ટો ટ્રક અથવા રોડસાઇડ આસિસ્ટન્સની મદદ લેવી વધુ યોગ્ય છે. સાથે જ તમારી ઇન્શ્યોરન્સ કંપનીને ઘટનાની જાણ કરો. મિકેનિકની તપાસ પહેલાં કાર ફરી સ્ટાર્ટ ન કરવી.

એન્જિનમાં પાણી ગયું છે કે નહીં, કેવી રીતે ઓળખશો?

જો ડિપસ્ટિક કાઢતાં એન્જિન ઓઇલમાં પાણીના ટીપાં અથવા સફેદ ફીણ (ફોમ) જોવા મળે તો તે એન્જિનમાં પાણી પ્રવેશ્યાનો સંકેત હોઈ શકે છે. આવી સ્થિતિમાં સ્પાર્ક પ્લગ અથવા ફ્યુઅલ ઇન્જેક્ટરની તપાસ કરાવવી જરૂરી છે. એન્જિનમાંથી સંપૂર્ણ પાણી બહાર નીકળ્યા પછી જ કાર સ્ટાર્ટ કરવી જોઈએ.

આટલી સાવધાની રાખશો તો ટળી જશે મોટું નુકસાન

• પાણી ભરાયેલા રસ્તામાં ઊંડાઈના અંદાજ વિના કાર ન ચલાવો.
• શક્ય હોય ત્યાં સુધી પાણી ભરાયેલા રસ્તાનો ઉપયોગ ટાળો.
• વરસાદ દરમિયાન રોડસાઇડ આસિસ્ટન્સ નંબર અને ઇન્શ્યોરન્સ વિગતો સાથે રાખો.
• કારની નિયમિત સર્વિસ અને એર ફિલ્ટરની તપાસ કરાવતા રહો.
• ભારે વરસાદ દરમિયાન વાહનની ગતિ ઓછી રાખો અને આગળના વાહનથી પૂરતું અંતર જાળવો.

થોડી સાવધાની અને યોગ્ય નિર્ણયથી વરસાદમાં કારને ગંભીર નુકસાનથી બચાવી શકાય છે. ખાસ કરીને પાણીમાં કાર બંધ થઈ જાય ત્યારે ગભરાવાને બદલે યોગ્ય પ્રક્રિયા અપનાવવાથી એન્જિન અને ખિસ્સા બંને સુરક્ષિત રહી શકે છે.

આ પણ વાંચોઃ પાલનપુરમાં કાટમાળમાંથી નીકળ્યા ચાંદીના સિક્કા, શહેરમાં બન્યો ચર્ચાનો વિષય