Cambridge Dictionaryમાં પણ Gen Zનો દબદબો, skibidi સહિતના અનોખા શબ્દો જોવા મળ્યા

લંડન, 19 ઓગસ્ટ 2025: કેમ્બ્રિજ ડિક્શનરીએ તાજેતરમાં લગભગ 6,000 નવા શબ્દો અને વાક્યો ઉમેરીને સોશિયલ મીડિયા પર ખળભળાટ મચાવી દીધો છે. આ નવા શબ્દોમાંથી મોટાભાગના જનરેશન Z અને જનરેશન આલ્ફાની સોશિયલ મીડિયા કલ્ચરમાંથી ઉદ્ભવ્યા છે. ‘સ્કિબિડી’, ‘ડેલુલુ’, અને ‘ટ્રેડવાઇફ’ જેવા શબ્દોની ઘોષણાએ X (અગાઉ ટ્વિટર) પર મજેદાર મીમ્સ અને કોમેન્ટ્સનું ઘોડાપુર ઉમટ્યું છે.
સોશિયલ મીડિયા પર શું થઈ રહ્યું છે?
‘સ્કિબિડી’, ‘ડેલુલુ’, અને ‘ટ્રેડવાઇફ’ જેવા શબ્દો ડિક્શનરીમાં સામેલ થતાં જ X પર યુઝર્સે મજાકમાં લખ્યું, “અંગ્રેજી હવે ભાષા નથી રહી, ટિકટોકનું કોમેન્ટ સેક્શન બની ગયું છે!” એક યુઝરે તો ટીખળ કરતાં કહ્યું, “આ જ કારણે લોકો ‘ડેલુલુ’ (એટલે કે વાસ્તવિકતાથી દૂર) થઈ ગયા છે!” ખાસ વાત એ છે કે ડિક્શનરી ટીમે પોતે જ ‘સ્કિબિડી’નો અર્થ સમજાવવામાં મુશ્કેલી અનુભવી. તેમણે લખ્યું, “આ શબ્દનો કોઈ ચોક્કસ અર્થ નથી, પરંતુ તેના ઘણા અર્થ હોઈ શકે છે.” આના પર એક યુઝરે મજાકમાં લખ્યું, “લો ભાઈ, કેમ્બ્રિજવાળાઓએ પણ હાર માની લીધી!”
Cambridge lexicographers absolutely throwing in the towel when asked to define skibidi: “a word that can have different meanings or no meaning” pic.twitter.com/Qj5nJwFRxL
— Gary Dunion 🍉 (@garydunion) August 18, 2025
આ શબ્દો કેમ ઉમેરાયા?
કેમ્બ્રિજ યુનિવર્સિટી પ્રેસનું કહેવું છે કે દરેક નવા શબ્દને ડિક્શનરીમાં સામેલ કરતા પહેલાં તેની સંપૂર્ણ તપાસ કરવામાં આવે છે. લેક્સિકલ પ્રોગ્રામ મેનેજર કોલિન મેકિન્ટોશએ જણાવ્યું, “અમે ફક્ત એવા શબ્દોને જ ડિક્શનરીમાં સ્થાન આપીએ છીએ, જેની લાંબા સમય સુધી ટકી રહેવાની શક્યતા હોય. સોશિયલ મીડિયા ઇંગ્લિશ ભાષાને ઝડપથી બદલી રહ્યું છે, અને આ બદલાવને સાચવવો જરૂરી છે.”
બીજા કયા શબ્દો ઉમેરાયા?
‘સ્કિબિડી’ અને ‘ડેલુલુ’ ઉપરાંત નીચેના શબ્દોને પણ ડિક્શનરીમાં સ્થાન મળ્યું છે:
ઇન્સ્પો (Inspo): ‘ઇન્સ્પિરેશન’નું ટૂંકું સ્વરૂપ, જેનો ઉપયોગ પ્રેરણા દર્શાવવા માટે થાય છે.
લ્યૂક (Lewk): કોઈ ખાસ ફેશન સ્ટાઇલનું વર્ણન કરવા માટે.
માઉસ જિગ્લર (Mouse Jiggler): કમ્પ્યૂટર પર સક્રિય દેખાવા માટે વપરાતું ટૂલ.
ફોરએવર કેમિકલ (Forever Chemical): એવા ખતરનાક રસાયણો કે જે વર્ષો સુધી પર્યાવરણમાં રહે છે અને જળવાયુ પરિવર્તનનું જોખમ વધારે છે.
સોશિયલ મીડિયા પર પ્રતિક્રિયાઓ
X પર એક યુઝરે લખ્યું, “સ્કિબિડી ટોઇલેટનું નેકલેસ બનાવનારાઓ હવે ડિક્શનરીમાં પણ પહોંચી ગયા!” અન્ય એક યુઝરે ટિપ્પણી કરી, “જો ‘ડેલુલુ’ ડિક્શનરીમાં છે, તો હવે ‘ડેલુલુ ઇઝ ધ સોલુલુ’ પણ ઉમેરવું જોઈએ!” ટિકટોક અને ઇન્સ્ટાગ્રામ જેવા પ્લેટફોર્મ પર આ શબ્દોની લોકપ્રિયતા જનરેશન Z અને જનરેશન આલ્ફામાં વધુ જોવા મળે છે, પરંતુ હવે આ શબ્દો મુખ્યધારાનો ભાગ બની રહ્યા છે.
કેમ્બ્રિજ ડિક્શનરીના આ નવા શબ્દોએ ઇન્ટરનેટ સંસ્કૃતિની અંગ્રેજી ભાષા પરની અસરને સ્પષ્ટ કરી છે. ‘સ્કિબિડી’ જેવા રમૂજી શબ્દોથી લઈને ‘ફોરએવર કેમિકલ’ જેવા ગંભીર શબ્દો સુધી, આ ઉમેરણો ભાષાના વિકાસ અને સમાજના બદલાતા સ્વરૂપને દર્શાવે છે. સોશિયલ મીડિયા પર આ શબ્દોની ચર્ચા અને મીમ્સ દર્શાવે છે કે આ ફેરફારો લોકોનું ધ્યાન ખેંચી રહ્યા છે, અને ભાષા કેવી રીતે ડિજિટલ યુગમાં આગળ વધી રહી છે તેનું એક જીવંત ઉદાહરણ બની રહ્યા છે.
આ પણ વાંચો : પતિની હત્યા કરી ડ્રમમાં ભરી દેનારી પત્ની તેના બોયફ્રેન્ડ સાથે ઝડપાઈ ગઈ












