ખેડૂતોના હીરો હતા નાના પાટેકર, જાણો બોલિવૂડ અને રાજકારણમાંથી નાના વિશે કોણે શું કહ્યું?

Nana Patekar passed away: બોલિવૂડ અને મરાઠી સિનેમાના દિગ્ગજ અભિનેતા નાના પાટેકરના નિધનથી સમગ્ર ફિલ્મ જગત સહિત રાજકીય ક્ષેત્રમાં પણ શોકની લાગણી ફેલાઈ છે. 75 વર્ષીય નાના પાટેકરનું 8 ઓક્ટોબર, 2026ના રોજ ગોવામાં તેમના નિવાસસ્થાને ગંભીર કાર્ડિયાક અરેસ્ટ બાદ નિધન થયું. મણિપાલ હોસ્પિટલના ડૉ. શેખર સાલકરના જણાવ્યા અનુસાર, તેમને લગભગ 45 મિનિટ સુધી CPR આપવામાં આવ્યું હતું, પરંતુ તેમને બચાવી શકાયા નહોતા. આ મામલે MLC નોંધવામાં આવ્યો છે અને પોસ્ટમોર્ટમ કરવામાં આવશે.

નાના પાટેકરના નિધનના સમાચાર બાદ કેન્દ્રીય મંત્રી નિતિન ગડકરી સહિત અનેક રાજકીય નેતાઓએ શોક વ્યક્ત કર્યો છે.

નિતિન ગડકરીએ કહ્યું- ‘ભારતીય ફિલ્મ ઈન્ડસ્ટ્રી માટે મોટું નુકસાન’

કેન્દ્રીય મંત્રી નિતિન ગડકરીએ નાના પાટેકરના નિધનને હૃદયદ્રાવક ગણાવ્યું અને તેમને શ્રદ્ધાંજલિ આપી. તેમણે નાના પાટેકર સાથેના પોતાના નજીકના અને મિત્રતાભર્યા સંબંધોને યાદ કર્યા.

ગડકરીએ જણાવ્યું કે નાના પાટેકરે પાંચ દાયકાથી વધુ સમય સુધી મરાઠી અને હિન્દી સિનેમામાં પોતાના દમદાર અભિનય અને આગવી સંવાદશૈલીથી દર્શકોના દિલમાં સ્થાન બનાવ્યું. તેમણે નાના પાટેકરના નિધનને ભારતીય ફિલ્મ ઈન્ડસ્ટ્રી માટે મોટું નુકસાન ગણાવ્યું.

નાના પાટેકરના સામાજિક કાર્યનો ઉલ્લેખ કરતાં ગડકરીએ ‘નામ ફાઉન્ડેશન’ દ્વારા મહારાષ્ટ્રના ગ્રામીણ વિસ્તારોમાં જળસંરક્ષણ અને ખેડૂતો માટે કરવામાં આવેલા કામને પણ યાદ કર્યું. ‘નામ ફાઉન્ડેશન’ની શરૂઆત નાના પાટેકર અને મકરંદ અનાસપુરેએ સપ્ટેમ્બર 2015માં કરી હતી અને સંસ્થા દુષ્કાળગ્રસ્ત વિસ્તારો, ખેડૂતો અને પાણી સંબંધિત પ્રોજેક્ટ્સ પર કામ કરે છે.

પશ્ચિમ બંગાળના નેતા શુભેન્દુ અધિકારી પણ થયા ભાવુક

પશ્ચિમ બંગાળના નેતા શુભેન્દુ અધિકારીએ પણ નાના પાટેકરના અચાનક નિધન પર દુઃખ વ્યક્ત કર્યું. તેમણે નાના પાટેકરને ભારતીય સિનેમાના શક્તિશાળી અને આગવા કલાકારોમાંના એક ગણાવ્યા.

તેમણે ‘પરિંદા’, ‘ક્રાંતિવીર’, ‘પ્રહાર’ અને ‘અબ તક છપ્પન’ જેવી ફિલ્મોમાં નાના પાટેકરના અભિનયને યાદ કરતાં કહ્યું કે તેમની આગવી શૈલી અને અભિનયે સિનેમામાં એક અલગ માપદંડ ઊભો કર્યો હતો. તેમના જણાવ્યા અનુસાર, નાના પાટેકરની સાદગી અને સામાજિક કાર્યો પ્રત્યેનું સમર્પણ પણ તેમની વ્યક્તિગત ઓળખનો મહત્વનો ભાગ હતું.

CM યોગી આદિત્યનાથે કહ્યું- ‘કલા જગત માટે અપૂરણીય ક્ષતિ’

ઉત્તર પ્રદેશના મુખ્યમંત્રી યોગી આદિત્યનાથે નાના પાટેકરના નિધનને કલા જગત માટે અપૂરણીય ક્ષતિ ગણાવી. તેમણે નાના પાટેકરને પ્રખ્યાત અભિનેતા, શક્તિશાળી રંગમંચ કલાકાર અને સંવેદનશીલ સમાજસેવક તરીકે યાદ કર્યા.

યોગી આદિત્યનાથે કહ્યું કે નાના પાટેકરે પોતાના વિશિષ્ટ અભિનયથી ભારતીય સિનેમાને સમૃદ્ધ બનાવ્યું અને સામાજિક કાર્યો દ્વારા સમાજ પ્રત્યેની પોતાની પ્રતિબદ્ધતા દર્શાવી. તેમણે દિવંગત આત્માની શાંતિ અને પરિવાર તથા ચાહકોને આ દુઃખ સહન કરવાની શક્તિ માટે પ્રાર્થના કરી.

સુનેત્રા અજિત પવારે કહ્યું- ‘નાના પાટેકરના નિધનથી અંદરથી હચમચી ગઈ’

મહારાષ્ટ્રના ડેપ્યુટી સીએમ સુનેત્રા અજિત પવારે પણ નાના પાટેકરના નિધન પર ઊંડું દુઃખ વ્યક્ત કર્યું. તેમણે કહ્યું કે નાના પાટેકર અભિનયમાં સચ્ચાઈ અને સામાજિક સંવેદનશીલતાનું અનોખું સંયોજન હતા.

તેમણે ‘નટસમ્રાટ’, ‘ક્રાંતિવીર’ અને ‘પરિંદા’ જેવી ફિલ્મોમાં તેમના અભિનયને યાદ કર્યો અને ખેડૂતો તથા સમાજના વંચિત વર્ગો માટે નાના પાટેકરે કરેલા કામને પ્રેરણાદાયી ગણાવ્યું.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

ઉત્તરાખંડના મુખ્યમંત્રી પુષ્કર સિંહ ધામીએ નાના પાટેકરના નિધન પર શોક વ્યક્ત કરતાં કહ્યું કે તેમના શક્તિશાળી અભિનય અને પ્રભાવશાળી સંવાદોએ ભારતીય સિનેમામાં આગવી ઓળખ બનાવી હતી.

તેમણે નાના પાટેકરના વિવિધ પાત્રોમાં કરેલા જીવંત અભિનયને હિન્દી સિનેમાની મહત્વપૂર્ણ ધરોહર ગણાવી અને તેમના નિધનને ફિલ્મ તથા કલા જગત માટે અપૂરણીય નુકસાન ગણાવ્યું.

નાના પાટેકર માત્ર ફિલ્મોના દિગ્ગજ કલાકાર જ નહોતા, પરંતુ ખેડૂતો અને ગ્રામીણ વિસ્તારો માટેના સામાજિક કાર્યો સાથે પણ જોડાયેલા હતા. ‘નામ ફાઉન્ડેશન’ દ્વારા દુષ્કાળ, પાણીની અછત અને ખેડૂતોના પરિવારોને મદદ સહિતના મુદ્દાઓ પર કામ કરવામાં આવ્યું છે. સંસ્થાના સત્તાવાર જણાવ્યા અનુસાર, તેના કામમાં પાણીના સ્ત્રોતોને પુનર્જીવિત કરવા, જળસંચય અને ખેડૂતોના પરિવારોને સહાય જેવા પ્રયાસો સામેલ છે.

આ પણ વાંચો: ‘વિશ્વનાથ’માંથી કેવી રીતે બન્યા ‘નાના’? નામ પાછળ છુપાયેલી છે લાગણીસભર કહાની