રાહુલ ગાંધીના ઘરની બહાર ભાજપનું જોરદાર વિરોધ પ્રદર્શન, પુતળાનું દહન કર્યું, CM રેખા ગુપ્તા સહિત ઘણા અગ્રણી નેતાઓ હાજર

Womens Reservation Bill: દિલ્હીમાં રાહુલ ગાંધીના ઘરે આજે (શનિવારે) ભાજપના નેતાઓ અને કાર્યકરો દ્વારા જોરદાર પ્રદર્શન કરવામાં આવ્યું. આ પ્રદર્શન કોંગ્રેસ પાર્ટી દ્વારા લોકસભામાં મહિલા આરક્ષણ બિલને સમર્થન ન આપવાના મુદ્દે કરવામાં આવ્યું હતું. આ પ્રદર્શનનું નેતૃત્વ દિલ્હીની મુખ્યમંત્રી રેખા ગુપ્તા અને ભાજપ નેતા વીરેન્દ્ર સચદેવાએ કર્યું હતું. તેમની સાથે મોટી સંખ્યામાં ભાજપના કાર્યકરો પણ હાજર રહ્યા હતા.

વિપક્ષે દેશની મહિલાઓ સાથે વિશ્વાસઘાત કર્યો – બાંસુરી સ્વરાજ

ભાજપ સાંસદ બાંસુરી સ્વરાજે કહ્યું, “ગઈકાલે સમગ્ર વિપક્ષે, ખાસ કરીને રાહુલ ગાંધીએ દેશની મહિલાઓ સાથે દગો કર્યો છે. તેમણે મહિલાઓની પીઠમાં છરો ભોંક્યો છે. તેઓ ઈચ્છે છે કે મહિલાઓની ભૂમિકા માત્ર મતદાન કેન્દ્ર સુધી જ સીમિત રહે. જ્યારે રાજકીય પ્રતિનિધિત્વની વાત આવી, ત્યારે તેમણે પોતાના સ્વાર્થને પ્રાથમિકતા આપી. આ મહિલાઓ સાથે વિશ્વાસઘાત છે.”

#WATCH | Delhi: BJP women workers burn an effigy of Lok Sabha LoP Rahul Gandhi during their protest march to his residence, a day after the Constitution (131st Amendment) Bill failed to pass in the Lok Sabha. pic.twitter.com/bkvylI74X2

— ANI (@ANI) April 18, 2026

બિલ પાસ ન થતાં મહિલાઓ નિરાશ – હેમા માલિની

આ દરમિયાન, ભાજપના સાંસદ હેમા માલિનીએ કહ્યું કે, “વિપક્ષે બિલ પાસ થવા દીધું નથી, તેથી અમે બધા અહીં વિરોધ પ્રદર્શન કરી રહ્યા છીએ. ભારતની મહિલાઓ મળીને આ અભિયાન ચલાવી રહી છે. ગઈકાલે અમારા તમામ પ્રયાસો છતાં બિલ પાસ થઈ શક્યું નથી, જેના કારણે અમે ખૂબ નિરાશ છીએ. દેશભરમાં મહિલાઓ આ મુદ્દે વિરોધ નોંધાવી રહી છે.”

વિપક્ષે મહિલાઓને પડકાર આપ્યો – મનોજ તિવારી

સાંસદ મનોજ તિવારીએ કહ્યું કે, “ગઈકાલે જ્યારે લોકસભામાં બિલ પસાર થયું નહીં, ત્યારે તમે પીએમ મોદીનો ચહેરો જોયો હશે. તેમણે પોતાના દુઃખ અને લાગણીઓને કેવી રીતે કાબૂમાં રાખી. તે સમયે તો મને ઉઠવાનું પણ મન નહોતું થયું. કોંગ્રેસ, AAP, TMC, SP અને DMKએ આ દેશની મહિલાઓને પડકાર ફેંક્યો છે. મહિલાઓ તેમને જવાબ આપશે. મને ખુશી છે કે આજે મહિલાઓ અહીં આવી છે અને અમે તેમનું સમર્થન કરી રહ્યા છીએ.”

લોકસભામાં સુધારા બિલ કેમ પાસ ન થઈ શક્યું?

ઉલ્લેખનીય છે કે ગયા શુક્રવારે સરકારે લોકસભામાં મહિલા આરક્ષણ બિલ સાથે જોડાયેલું 131મું સંશોધન બિલ રજૂ કર્યું હતું. પરંતુ આ બિલ પસાર થવા માટે જરૂરી બે-તૃતિયાંશ બહુમત મળ્યું નહોતું. બિલના સમર્થનમાં પૂરતા મત ન મળતાં, તેના વિરોધમાં 230 મત પડ્યા અને જરૂરી 352 મત મળી શક્યા નહોતાં, જેના કારણે બિલ પાસ થઈ શક્યું નહીં. આ મુદ્દે ગઈ સાંજે સંસદમાં પણ ભાજપની મહિલા સાંસદોએ વિરોધ પ્રદર્શન કર્યું હતું.

આ પણ વાંચો: રાહુલ ગાંધીને મોટી રાહત: બેવડી નાગરિકતા કેસમાં FIR ના આદેશ પર અલ્હાબાદ હાઈકોર્ટની રોક