વિપક્ષના આંદોલન પહેલાં જ BJPનો માસ્ટરપ્લાન અમલમાં, VB-G RAM G એક્ટ માટે રાષ્ટ્રવ્યાપી જનજાગૃતિ અભિયાન શરૂ

VB-G RAMG એક્ટ સામે વિપક્ષના આંદોલન પહેલાં જ ભારતીય જનતા પાર્ટીએ પોતાની રણનીતિ અમલમાં મૂકી દીધી છે. પાર્ટીએ આ માટે એક વિગતવાર યોજના તૈયાર કરી છે. વાંચો સંપૂર્ણ અહેવાલ.

સંસદના ગયા શિયાળુ સત્ર દરમિયાન, VB-G RAM G પર ભારે હોબાળો થયો હતો. વિપક્ષે વોકઆઉટ પણ કર્યું હતું. તે સમયે, આ બિલ પર ઘણું રાજકારણ રમાયું હતું. જો કે હોબાળા વચ્ચે પણ સંસદમાં બિલ પસાર થઈ ગયું હતું. હવે આ કાયદાને લઈને નવી રાજનીતિ શરૂ થઈ ગઈ છે. કોંગ્રેસે આ માટે આંદોલનની જાહેરાત કરી છે. દરમિયાન, BJPએ આંદોલન થાય એ પહેલા જ તેની રણનીતિ અમલમાં મૂકી દીધી છે.

કોંગ્રેસ અને વિપક્ષી દળો આ કાયદાને “મનરેગા ખતમ કરનાર” અને “ગરીબ-ખેડૂત વિરોધી” ગણાવીને એક વિશાળ જન આંદોલન કરવાનો પ્રયાસ કરશે. આ કારણે, ભાજપે રાષ્ટ્રવ્યાપી સંગઠિત આઉટરીચ અને જનજાગૃતિ અભિયાન શરૂ કરવાનો નિર્ણય લીધો છે.

ગ્રામીણ ભારતમાં જનજાગૃતિ કાર્યક્રમ

ભાજપ VB-G RAM G બિલ 2025, જેને પ્રધાનમંત્રી નરેન્દ્ર મોદીના નેતૃત્વમાં સંસદ દ્વારા પસાર કરવામાં આવ્યું છે, તેને ગ્રામીણ ભારતમાં એક મુખ્ય માળખાકીય સુધારા તરીકે રજૂ કરી રહ્યું છે. પાર્ટીનો દાવો છે કે આ કાયદો મનરેગાનું સ્થાન લેશે અને ગ્રામીણ રોજગાર મોડેલને ફરીથી આકાર આપશે, જેમાં રોજગાર દિવસોની સંખ્યા 100 થી વધારીને 125 કરવા, આજીવિકા સર્જન અને ટકાઉ સંપત્તિ નિર્માણ પર ખાસ ભાર મૂકવામાં આવશે. ભાજપની વ્યૂહરચના આ કાયદાને 2047 માં વિકસિત ભારતના તેના વિઝન સાથે સુસંગત રીતે રજૂ કરવાની છે.

પાર્ટી નેતૃત્વનું માનવુ છે કે વિરોધ પક્ષ આંદોલન શરૂ કરે તે પહેલાં જ તેને પાયાના સ્તરે ખતમ કરવુ જરૂરી છે. આ વિઝનને ધ્યાનમાં રાખીને, VB-G RAM G એક્ટ અંગે એક વ્યાપક રાષ્ટ્રીય જાગૃતિ અભિયાનની યોજના બનાવવામાં આવી છે. આ અભિયાન ફક્ત ભાષણો સુધી મર્યાદિત નહી રહે, પરંતુ હકીકત આધારિત સંવાદ દ્વારા ખેડૂતો અને કામદારો સુધી સીધા પહોંચવા પર ધ્યાન કેન્દ્રિત કરશે.

રણનીતિના ભાગ રૂપે ભાજપનો રોડમેપ

• રાજ્ય અને જિલ્લા સ્તરે ખાસ સમિતિઓની રચના
• 5-6 જાન્યુઆરીએ તમામ રાજ્ય ભાજપ મુખ્યાલયોમાં પ્રેસ કોન્ફરન્સ
• 7- જાન્યુઆરી દરમિયાન જિલ્લા મુખ્યાલયોમાં પ્રેઝન્ટેશન સાથે પ્રેસ કોન્ફરન્સ
• જિલ્લા પંચાયત, બ્લોક પંચાયત અને સરપંચ પરિષદો દ્વારા રાજકીય એક્ટિવેશન

આ સાથે, સાંસદો, ધારાસભ્યો, વિધાન પરિષદના સભ્યો અને સહકારી સંસ્થાઓને પણ સીધા મેદાનમાં ઉતારવામાં આવશે. ગ્રામ પંચાયત સ્તરે ખેડૂત-મજૂર ચોપલો દ્વારા ખેડુતોને કાયદા વિશે માહિતી આપવામાં આવશે.

ગ્રાસરૂટથી ડિજિટલ સુધી આક્રમક પહોંચ

ભાજપનું ધ્યાન સ્પષ્ટપણે ગ્રાસરૂટ એકત્રીકરણ પર છે. પાર્ટી ઘરે ઘરે જઈને પ્રચાર શરૂ કરશે અને ગામડાઓમાં ફેક્ટ આધારિત અભિયાન ચલાવશે. કિસાન પદયાત્રા, ટ્રેક્ટર રેલી અને બળદગાડા રેલી જેવા પરંપરાગત અને પ્રતીકાત્મક માધ્યમો દ્વારા ખેતરો સુધી સંદેશ પહોંચાડવાની યોજના છે. ડિજિટલ અને મીડિયા મોરચે આક્રમક રણનીતિ અપનાવવામાં આવી રહી છે. અખબારની જાહેરાતો અને સોશિયલ મીડિયા ઝુંબેશ સાથે ઓપ-એડ્સ, લેખો, બ્લોગ્સ, દિવાલ લેખન અને હોર્ડિંગ્સ પ્રકાશિત કરવામાં આવશે. Influencers અને ખેડૂત સંગઠનોને પણ સક્રિય કરવામાં આવશે, જેથી વિપક્ષના આરોપોનો તાત્કાલિક જવાબ આપી શકાય.

NDA સરકારોને મહત્વપૂર્ણ જવાબદારીઓ

NDA શાસિત રાજ્ય સરકારોને પણ આ અભિયાનમાં મુખ્ય ભૂમિકા સોંપવામાં આવી છે. કૃષિ અને ગ્રામીણ વિકાસ મંત્રીઓની જવાબદારીઓ નક્કી કરવામાં આવી છે, અને સંસદથી લઈને પંચાયત સ્તર સુધીના તમામ ચૂંટાયેલા પ્રતિનિધિઓને આ અભિયાનમાં સામેલ કરવામાં આવી રહ્યા છે.

રાષ્ટ્રીય ટીમની રચના

સંગઠન સ્તરે, આ સમગ્ર કવાયતનું નેતૃત્વ રાષ્ટ્રીય મહામંત્રી અરુણ સિંહ કરી રહ્યા છે, જેમને તમામ કાર્યક્રમોના સંયોજક તરીકે નિયુક્ત કરવામાં આવ્યા છે. તેમની સાથે રાષ્ટ્રીય કિસાન મોરચાના પ્રમુખ રાજકુમાર ચહર, રાષ્ટ્રીય ઉપાધ્યક્ષ રેખા વર્મા, રાષ્ટ્રીય મંત્રી ઓપી ધનખર અને કિસાન મોરચાના રાષ્ટ્રીય મહામંત્રી ડૉ. શંભુ કુમારને જવાબદારી સોંપવામાં આવી છે. તમામ પ્રવૃત્તિઓ પર દેખરેખ રાખવા માટે રાષ્ટ્રીય સ્તરે એક અલગ દેખરેખ ટીમની પણ રચના કરવામાં આવી છે.

આ પણ વાંચો: વડાપ્રધાન મોદીએ સીએમ મમતા બેનર્જીને આપી જન્મદિવસની શુભકામના, જાણો શું કહ્યું