અમદાવાદીઓ સાવધાન: 18 અને 19 તારીખે આ વિસ્તારમાં પાણીનો કાપ રહેશે, 7 વોર્ડમાં પાણી પુરવઠો ખોરવાશે

અમદાવાદ: પશ્ચિમ ઝોનના અનેક વિસ્તારોમાં પાણી પુરવઠાને લઈને મહત્વપૂર્ણ સૂચના સામે આવી છે. કોતરપુર વોટર વર્ક્સથી પાણી પહોંચાડતી 1,600 mm વ્યાસની વેસ્ટર્ન ટ્રંક મેઈન લાઈનમાં થયેલા લીકેજના સમારકામને કારણે 18 ઓગસ્ટની સાંજે અને 19 ઓગસ્ટે પાણી પુરવઠો પ્રભાવિત થશે. અમદાવાદ મ્યુનિસિપલ કોર્પોરેશન દ્વારા નાગરિકોને જરૂરી પાણીનો સંગ્રહ અગાઉથી કરી રાખવા અપીલ કરવામાં આવી છે.

1,600 mmની મુખ્ય લાઈનમાં લીકેજ

પશ્ચિમ અમદાવાદમાં પાણી પહોંચાડતી મહત્વપૂર્ણ વેસ્ટર્ન ટ્રંક મેઈન લાઈનમાં સાબરમતી ખાતે જે.પી.ની ચાલી નજીક લીકેજ સર્જાયું છે. આ લીકેજના સમારકામની કામગીરી 18 ઓગસ્ટે હાથ ધરવામાં આવશે.

આ લાઈન કોતરપુર વોટર વર્ક્સથી પશ્ચિમ ઝોનના વિવિધ વોટર ડિસ્ટ્રિબ્યુશન સ્ટેશનો સુધી પાણી પહોંચાડે છે. સમારકામ દરમિયાન લાઈન બંધ રાખવી જરૂરી બનતા પાણી વિતરણ વ્યવસ્થા પર સીધી અસર થશે.

18 ઓગસ્ટની સાંજે પાણી નહીં મળે

સમારકામની કામગીરીને કારણે 18 ઓગસ્ટે કોતરપુર વેસ્ટર્ન ટ્રંક મેઈન પર આધારિત વોટર ડિસ્ટ્રિબ્યુશન સ્ટેશનોમાંથી સાંજનો પાણી પુરવઠો આપી શકાશે નહીં.

જ્યારે 19 ઓગસ્ટે સવાર અને સાંજનો પાણી પુરવઠો ઉપલબ્ધ પાણીના જથ્થા અને સમારકામ બાદની સ્થિતિને આધારે આપવામાં આવશે. જેના કારણે કેટલાક વિસ્તારોમાં પાણી ઓછા દબાણથી અથવા મર્યાદિત પ્રમાણમાં મળવાની શક્યતા રહેશે.

અમદાવાદના આ 7 વોર્ડમાં થશે અસર

આ કામગીરીના કારણે પશ્ચિમ ઝોનના કુલ સાત વોર્ડના વિવિધ વિસ્તારોમાં પાણી પુરવઠો પ્રભાવિત થવાનો છે. તેમાં સાબરમતી, નવા વાડજ, નારણપુરા, સ્ટેડિયમ, નવરંગપુરા, પાલડી અને વાસણા વોર્ડનો સમાવેશ થાય છે.

આ વોર્ડમાં વેસ્ટર્ન ટ્રંક મેઈન પર આધારિત વિસ્તારોમાં 18 ઓગસ્ટની સાંજનો પાણી પુરવઠો બંધ રહેશે, જ્યારે 19 ઓગસ્ટના પુરવઠામાં પણ અસર જોવા મળી શકે છે.

AMCની નાગરિકોને પાણી સંગ્રહ કરવાની અપીલ

અમદાવાદ મ્યુનિસિપલ કોર્પોરેશને અસરગ્રસ્ત વિસ્તારોના નાગરિકોને પાણીકાપની નોંધ લેવા અને પોતાની જરૂરિયાત મુજબ પાણીનો સંગ્રહ અગાઉથી કરી રાખવા જણાવ્યું છે.

સમારકામની કામગીરી દરમિયાન પાણીનો બિનજરૂરી વપરાશ ટાળવા તેમજ તંત્રને સહકાર આપવા પણ અપીલ કરવામાં આવી છે.

વેસ્ટર્ન ટ્રંક મેઈન શહેરના પશ્ચિમ ભાગમાં પાણી વિતરણ માટે મહત્વપૂર્ણ લાઈન હોવાથી તેનું લીકેજ ઝડપથી દૂર કરવા કામગીરી હાથ ધરવામાં આવી રહી છે. સમારકામ પૂર્ણ થયા બાદ પાણી પુરવઠો તબક્કાવાર સામાન્ય કરવામાં આવશે.

આ પણ વાંચો: રાજકોટમાં ‘નંબર પ્લેટ નહીં તો ઈંધણ નહીં’: નંબર પ્લેટ વગરના વાહનોને પેટ્રોલ-ડીઝલ-CNG નહીં મળે