અમદાવાદ: બાપુનગર વિસ્તારમાં આવેલી જીવન સાધના સ્કૂલમાં ધોરણ 11માં અભ્યાસ કરતા એક સગીર વિદ્યાર્થી દ્વારા ત્રણ વિદ્યાર્થિનીઓ સાથે મારામારી કરવામાં આવી હોવાનો ગંભીર બનાવ સામે આવ્યો છે. ઘટનાને પગલે શાળા તંત્રએ વિદ્યાર્થીના માતા-પિતાને બોલાવી સમગ્ર મામલે ચર્ચા કરી હતી. ત્યારબાદ વિદ્યાર્થી પાસે લેખિત માફીપત્ર લેવાયા પછી તેને લિવિંગ સર્ટિફિકેટ આપી શાળામાંથી કાઢી મૂકવાનો નિર્ણય લેવામાં આવ્યો છે.

ગાળો બોલતા અટકાવતાં અદાવત રાખ્યાનો આક્ષેપ

મળતી માહિતી મુજબ વિદ્યાર્થી વર્ગખંડમાં અપશબ્દો બોલી રહ્યો હતો. આ દરમિયાન ત્રણ વિદ્યાર્થિનીઓએ તેને આવું ન કરવા જણાવ્યું હતું. આ બાબતને લઈને વિદ્યાર્થીએ અદાવત રાખી હોવાનો આક્ષેપ છે.

શાળા છૂટ્યા બાદ વિદ્યાર્થીએ ત્રણેય વિદ્યાર્થિનીઓ સાથે મારામારી કરી હતી. ઘટના સમયે આસપાસ હાજર લોકોએ વિદ્યાર્થીને પકડી લીધો હતો અને તેને શાળાના સંચાલકોને સોંપ્યો હતો.

માતા-પિતાને બોલાવી કરાયું કાઉન્સેલિંગ

ઘટનાની જાણ થતા શાળા તંત્રએ વિદ્યાર્થીના માતા-પિતાને બોલાવ્યા હતા. સમગ્ર મામલાની ગંભીરતાને ધ્યાનમાં રાખીને બાપુનગર પોલીસ દ્વારા પણ સગીર વિદ્યાર્થી અને તેના માતા-પિતાનું કાઉન્સેલિંગ કરવામાં આવ્યું હોવાનું સામે આવ્યું છે.

વિદ્યાર્થી સગીર હોવાથી સમગ્ર પ્રક્રિયામાં તેના ભવિષ્ય અને વર્તન સુધારણાને ધ્યાનમાં રાખીને સમજાવટ અને કાઉન્સેલિંગ કરવામાં આવ્યું હતું.

લેખિત માફી બાદ સ્કૂલમાંથી કાઢ્યો

શાળા મેનેજમેન્ટે વિદ્યાર્થી પાસેથી લેખિત માફીપત્ર લખાવ્યું હતું. ત્યારબાદ તેને લિવિંગ સર્ટિફિકેટ આપવામાં આવ્યું અને શાળામાંથી કાઢી મૂકવાનો નિર્ણય લેવાયો હતો.

શાળા તંત્રનું કહેવું છે કે વિદ્યાર્થીઓની સુરક્ષા અને શિસ્ત સાથે કોઈ સમાધાન કરવામાં આવશે નહીં અને આવી ઘટનાઓને ગંભીરતાથી લેવામાં આવશે.

DEOએ તપાસના આદેશ આપ્યા

આ સમગ્ર ઘટના શિક્ષણ વિભાગ સુધી પહોંચતા જિલ્લા શિક્ષણ અધિકારી (DEO) દ્વારા તપાસના આદેશ આપવામાં આવ્યા છે. ઘટનાના કારણો, શાળાની કાર્યવાહી અને સુરક્ષા વ્યવસ્થાને લઈને તપાસ કરવામાં આવશે.

ત્રણ વિદ્યાર્થિનીઓ સાથે થયેલી મારામારીના બનાવે સ્કૂલોમાં વિદ્યાર્થીઓની સુરક્ષા, શિસ્ત અને કાઉન્સેલિંગની વ્યવસ્થાને લઈને ફરી એકવાર સવાલો ઊભા કર્યા છે.

આ પણ વાંચો: મોરબીની ટાઈલ્સ થઈ મોંઘી: ગેસ-વીજળીના વધતા ખર્ચે ભાવમાં 12% સુધી વધારો