
Ahmedabad Breaking News: અમદાવાદમાં સ્ટેટ જીએસટી વિભાગે કરચોરી અને ગેરકાયદેસર માલ પરિવહન સામે અત્યાર સુધીની સૌથી મોટી કાર્યવાહી હાથ ધરી છે. ગુપ્ત બાતમીના આધારે કરવામાં આવેલી તપાસ દરમિયાન રાજસ્થાનથી અમદાવાદ આવેલી ખાનગી ટ્રાવેલ્સની બસમાંથી કરોડો રૂપિયાના સોના-ચાંદી અને કિંમતી પથ્થરોનો જથ્થો કબ્જે કરવામાં આવ્યો છે. આ કાર્યવાહીએ વેપારી વર્તુળોમાં ભારે ચર્ચા જગાવી છે અને માલના મૂળ સ્ત્રોત તેમજ તેના ગંતવ્યને લઈને અનેક સવાલો ઊભા કર્યા છે.
માહિતી અનુસાર સ્ટેટ જીએસટીની મોબાઇલ સ્કવોડ ટીમને અગાઉથી બાતમી મળી હતી કે અન્ય રાજ્યમાંથી મોટી માત્રામાં કિંમતી ધાતુઓ અને રત્નો અમદાવાદમાં લાવવામાં આવી રહ્યા છે. જેના આધારે અધિકારીઓએ અમદાવાદના નારોલ વિસ્તારમાં ખાસ વોચ ગોઠવી હતી. નારોલ નજીક વિવિધ ખાનગી લકઝરી બસોનું ચેકિંગ શરૂ કરવામાં આવ્યું હતું.
ચેકિંગ દરમિયાન રાજસ્થાનથી આવેલી એક ખાનગી ટ્રાવેલ્સની બસની ડેકીની તપાસ કરતા અધિકારીઓને શંકાસ્પદ સામાન મળ્યો હતો. વધુ તપાસ કરતાં બસમાં પ્લાસ્ટિકના થેલાઓમાં ભરેલો આશરે 120 કિલો ચાંદીનો જથ્થો, 700 ગ્રામ જેટલું સોનું અને લગભગ 3 કિલો કિંમતી પથ્થરો મળી આવ્યા હતા. આ જથ્થો જોઈને તપાસ ટીમ પણ આશ્ચર્યમાં પડી ગઈ હતી.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
અધિકારીઓએ માલસામાન અંગે જરૂરી દસ્તાવેજો, બિલ, ઇ-વે બિલ અને અન્ય કરવેરા સંબંધિત પુરાવા રજૂ કરવા જણાવ્યું હતું. પરંતુ પ્રાથમિક તપાસમાં માલના પરિવહન માટે જરૂરી કાનૂની દસ્તાવેજો ઉપલબ્ધ ન હોવાનું સામે આવ્યું હતું. જેના કારણે સમગ્ર જથ્થો કબ્જે કરીને વધુ તપાસ હાથ ધરવામાં આવી છે.
સ્ટેટ જીએસટીના અધિકારીઓના જણાવ્યા મુજબ કબ્જે કરાયેલા માલની અંદાજિત બજાર કિંમત લગભગ 4.25 કરોડ રૂપિયા જેટલી થાય છે. આટલી મોટી કિંમતનો માલ કોઈપણ દસ્તાવેજ વિના પરિવહન કરવામાં આવી રહ્યો હતો તે ગંભીર બાબત માનવામાં આવી રહી છે.
તપાસ દરમિયાન એવી પણ માહિતી સામે આવી છે કે આ કિંમતી માલસામાનને અમદાવાદ પહોંચાડ્યા બાદ નાના વાહનો મારફતે અલગ-અલગ સ્થળોએ મોકલવાની તૈયારી હતી. જોકે માલનો અંતિમ ગંતવ્ય ક્યાં હતો અને તેની પાછળ કોણ સંકળાયેલું છે તે અંગે હાલ ઝીણવટભરી તપાસ ચાલી રહી છે.
અધિકારીઓ કરચોરીના એંગલથી પણ સમગ્ર મામલાની તપાસ કરી રહ્યા છે. જો માલના વ્યવહારોમાં કરચોરી કે ગેરરીતિઓ સામે આવશે તો સંબંધિત વ્યક્તિઓ અને વેપારીઓ સામે કડક કાર્યવાહી કરવામાં આવી શકે છે. ઉલ્લેખનીય છે કે તાજેતરમાં પણ સ્ટેટ જીએસટી વિભાગે ગીતા મંદિર વિસ્તારમાંથી બસ મારફતે લઈ જવામાં આવતો આશરે 100 કિલો ચાંદીનો જથ્થો ઝડપી પાડ્યો હતો. તે કેસની તપાસ હજુ ચાલુ છે ત્યારે ફરી એકવાર 120 કિલો ચાંદી અને અન્ય કિંમતી માલસામાન મળી આવતાં વિભાગની કાર્યવાહી વધુ ચર્ચામાં આવી છે.
આ અગાઉ 17 મે, 2026ના રોજ ગુજરાત ATS અને અન્ય એજન્સીઓએ પણ મોટી કાર્યવાહી હાથ ધરી હતી. સેન્ટ્રલ ઇન્ટેલિજન્સ બ્યુરોના ઇનપુટના આધારે રાજકોટના હિરાસર ઇન્ટરનેશનલ એરપોર્ટ પર ગુપ્ત ઓપરેશન ચલાવવામાં આવ્યું હતું. જેમાં અંદાજે 5 કરોડ રૂપિયાની કિંમતની 180 કિલો ચાંદીનો જથ્થો ઝડપાયો હતો. આ જથ્થો વારાણસીથી મુંબઈ થઈને રાજકોટ પહોંચ્યો હોવાની માહિતી સામે આવી હતી. ત્યારબાદ માલ મંગાવનાર વેપારીઓની પૂછપરછ શરૂ કરવામાં આવી હતી.
તે જ સમયગાળા દરમિયાન અમદાવાદથી રાજકોટ લઈ જવામાં આવતી 100 કિલો ચાંદી પણ સ્ટેટ જીએસટીએ ઝડપી પાડી હતી. આમ માત્ર થોડા દિવસોમાં જ સેકડો કિલો ચાંદી વિવિધ એજન્સીઓ દ્વારા કબ્જે કરવામાં આવી છે, જે રાજ્યમાં કિંમતી ધાતુઓના ગેરકાયદેસર પરિવહન અને સંભવિત કરચોરીના મોટા નેટવર્ક તરફ ઈશારો કરે છે.
રાજ્ય વેરા ખાતાના અધિકારીઓએ જણાવ્યું છે કે કરચોરી અને ગેરકાયદેસર માલ પરિવહન સામે આગામી સમયમાં વધુ સઘન ઝુંબેશ ચલાવવામાં આવશે. વેપારીઓને નિયમોનું પાલન કરવા અને માલસામાન સાથે જરૂરી દસ્તાવેજો રાખવા સૂચના આપવામાં આવી છે. હાલ સમગ્ર મામલે તપાસ ચાલુ છે અને આગામી દિવસોમાં વધુ ચોંકાવનારા ખુલાસા થવાની શક્યતા વ્યક્ત કરવામાં આવી રહી છે.
આ પણ વાંચો: અમદાવાદમાં ધોળેદિવસે ખેલાયો ખૂની ખેલ, ગુલબર્ગ સોસાયટી પાસે યુવાનની ચાકુના ઘા ઝીંકી હત્યા












