ભૂકંપ પીડિતો માટે અફઘાનિસ્તાનની ટીમ આગળ આવી, મેચ ફી ડોનેટ કરવાની જાહેરાત કરી

Afghanistan earthquake: અફઘાનિસ્તાન ક્રિકેટ ટીમના તમામ ખેલાડીઓ તેમના દેશમાં ભૂકંપથી થયેલા ભારે વિનાશથી પ્રભાવિત પરિવારોને મદદ કરવા આગળ આવ્યા છે. UAEમાં ચાલી રહેલી T20 ત્રિકોણીય સિરીઝની મેચ દરમિયાન, અફઘાનિસ્તાન ટીમે ભૂકંપ પીડિતોની સલામતી માટે પ્રાર્થના કરી હતી.

આ દરમિયાન, ખેલાડીઓએ જાહેરાત કરી છે કે તેઓ સંયુક્ત આરબ અમીરાત (UAE) સામેની મેચ માટે મેચ ફીનું દાન કરશે. સંપૂર્ણ મેચ ફીની સાથે, ખેલાડીઓએ તેમના લોકોને વ્યક્તિગત રીતે પણ મદદ કરી છે. આ દુર્ઘટનામાં જીવ ગુમાવનારાઓને શ્રદ્ધાંજલિ આપવા માટે અફઘાનિસ્તાન અને UAE ના ખેલાડીઓએ મેચ પહેલા મૌન પણ પાળ્યું હતું.

1 સપ્ટેમ્બરના રોજ મોડી રાત્રે આવેલા 6.0 ની તીવ્રતાના ભૂકંપે પૂર્વી અફઘાનિસ્તાનને હચમચાવી નાખ્યું હતું, જેમાં કુનાર અને આસપાસના પ્રાંતોમાં 800 થી વધુ લોકો માર્યા ગયા હતા. આ ઉપરાંત, આ દુર્ઘટનામાં 2,800 થી વધુ લોકો ઘાયલ પણ થયા છે. બચી ગયેલા લોકો તૂટેલા ઘરો અને રાહત સામગ્રીના અભાવ વચ્ચે સંઘર્ષ કરી રહ્યા છે. ભારત સહિત ઘણા દેશો અફઘાનિસ્તાનને મદદ કરવા આગળ આવ્યા છે. ખાદ્ય પદાર્થોની સાથે, અન્ય દેશોની સરકારો દ્વારા તબીબી સુવિધાઓ પણ પૂરી પાડવામાં આવી રહી છે.

અફઘાનિસ્તાન ક્રિકેટ બોર્ડે તેના નિવેદનમાં જણાવ્યું હતું કે, “અફઘાન અટલાન (અફઘાનિસ્તાન ક્રિકેટ ટીમ) કુનાર ભૂકંપના પીડિતો સાથે એકતા દર્શાવે છે! અફઘાનિસ્તાનની ટીમે મંગળવારે રાત્રે યુએઈ સામેની મેચ માટે તેની સંપૂર્ણ મેચ ફી અને કુનાર પ્રાંતમાં તાજેતરના ભૂકંપથી પ્રભાવિત પરિવારોને મદદ કરવા માટે વધારાનું દાન આપવાનું વચન આપ્યું છે. આ ઉપરાંત, ખોસ્ત પ્રાંતમાં ચાલી રહેલી પ્રાદેશિક લિસ્ટ એ ટુર્નામેન્ટમાં સામેલ ખેલાડીઓ પણ આવતીકાલે પોતાનું દાન એકત્રિત કરશે. આ મુશ્કેલ સમયમાં કુનારમાં અસરગ્રસ્ત પરિવારોને મદદ કરવા માટે આ યોગદાન તાત્કાલિક મોકલવામાં આવશે.”

આ પણ વાંચો: 8 બોલમાં 7 છગ્ગા: પોલાર્ડે બોલર્સને ધોઈ નાખ્યા, 29 બોલમાં 65 રન ફટકારી દીધા