Nepal flash floods: નેપાળમાં આવેલા વિનાશક પૂરને પાંચ દિવસ વીતી ગયા હોવા છતાં સ્થિતિ હજુ સામાન્ય થઈ નથી. પૂરના કારણે મૃત્યુઆંક 788 સુધી પહોંચી ગયો હોવાનું અહેવાલોમાં જણાવાયું છે, જ્યારે 2,500થી વધુ લોકો હજુ પણ લાપતા છે. હજારો પરિવારો પોતાના સ્વજનોની શોધમાં છે અને અનેક અસરગ્રસ્ત વિસ્તારોમાં બચાવ તથા રાહત કામગીરી ચાલુ છે.

પૂરગ્રસ્ત વિસ્તારોમાંથી મોટી સંખ્યામાં મૃતદેહો મળી રહ્યા છે. કેટલાક મૃતદેહોની ઓળખ હજુ થઈ શકી નથી. આવી સ્થિતિમાં ઓળખ માટે જરૂરી પુરાવા અને માહિતી સુરક્ષિત રાખ્યા બાદ અંતિમવિધિની પ્રક્રિયા કરવામાં આવી રહી છે. બીજી તરફ કેટલાક વિસ્તારોમાં પાણીનું સ્તર ફરી વધતાં રેસ્ક્યૂ ટીમોની મુશ્કેલી વધી છે.

9,500 જેટલા લોકોને સુરક્ષિત બચાવાયા

રવિવારે પણ અનેક અસરગ્રસ્ત વિસ્તારોમાં બચાવ અભિયાન ચાલુ રહ્યું હતું. રાષ્ટ્રીય આપદા જોખમ ન્યૂનીકરણ અને વ્યવસ્થાપન પ્રાધિકરણના જણાવ્યા અનુસાર અત્યાર સુધીમાં આશરે 9,500 લોકોને સુરક્ષિત સ્થળે ખસેડવામાં આવ્યા છે.

જોકે, અનેક વિસ્તારોમાં પાણી, કાદવ અને કાટમાળને કારણે રસ્તાઓ બંધ થઈ ગયા હોવાથી બચાવ ટીમોને અસરગ્રસ્ત વિસ્તારો સુધી પહોંચવામાં ભારે મુશ્કેલી પડી રહી છે. ભોટેકોશી નદીનું જળસ્તર વધતાં આસપાસના વિસ્તારોમાં લોકોને સાવચેત રહેવાની ચેતવણી આપવામાં આવી છે.

ત્રિશૂલી નદીમાં ફરી પૂર, 130 મીટર લાંબો પુલ તણાયો

મધ્ય નેપાળમાં ત્રિશૂલી નદી ફરી ઉફાન પર આવી છે. નદીના ધસમસતા પ્રવાહમાં ઘ્યાલચોક-ચારૌદી પુલ તણાઈ ગયો હતો. આશરે 130 મીટર લાંબો આ પુલ ગોરખા જિલ્લાના ઘ્યાલચોક વિસ્તારને પૃથ્વી હાઈવે સાથે જોડતો મહત્વનો માર્ગ હતો.

પુલ તૂટી જવાના કારણે આસપાસ રહેતા આશરે 400 પરિવારોનો મુખ્ય સંપર્ક માર્ગ બંધ થઈ ગયો છે. સ્થાનિક લોકો માટે હવે અવરજવર ઉપરાંત જીવનજરૂરી વસ્તુઓ પહોંચાડવામાં પણ મુશ્કેલી ઊભી થઈ શકે છે.

ખેડૂતો માટે નવી મુશ્કેલી

ઘ્યાલચોક-ચારૌદી પુલ માત્ર લોકોની અવરજવર માટે જ મહત્વનો નહોતો, પરંતુ સ્થાનિક ખેડૂતો માટે પણ જીવનરેખા સમાન હતો. આસપાસના ખેડૂતો દૂધ અને શાકભાજી સહિતની કૃષિ પેદાશો આ જ માર્ગેથી ચારૌદીની કૃષિ સહકારી સંસ્થા સુધી પહોંચાડતા હતા.

હવે પુલ તણાઈ જતાં ખેડૂતોને પોતાની ઉપજ બજાર સુધી પહોંચાડવામાં ભારે મુશ્કેલી પડી શકે છે. આ પહેલાં 26 ઓગસ્ટના પૂરમાં ધવાદીઘાટનો પુલ પણ તણાઈ ગયો હતો. ત્યારબાદ સ્થાનિક લોકો વૈકલ્પિક માર્ગનો ઉપયોગ કરી રહ્યા હતા, પરંતુ હવે આ માર્ગ પણ બંધ થઈ ગયો છે.

ઓળખ ન થયેલા મૃતદેહોની સામૂહિક અંતિમવિધિ

વિનાશક પૂર બાદ મોટી સંખ્યામાં મૃતદેહો મળતાં નેપાળ સરકાર અને સ્થાનિક તંત્ર સામે નવી સમસ્યા ઊભી થઈ છે. કેટલાક મૃતદેહોની હાલત એવી છે કે તેમની ઓળખ તાત્કાલિક શક્ય બની રહી નથી.

આવા મૃતદેહોના કિસ્સામાં ઓળખ માટે જરૂરી તપાસ, પુરાવા અને વિગતો સુરક્ષિત રાખ્યા બાદ સામૂહિક રીતે અંતિમવિધિ કરવામાં આવી રહી છે. હજારો પરિવારો હજુ પણ પોતાના લાપતા સ્વજનોની શોધ કરી રહ્યા હોવાથી મૃતદેહોની ઓળખ બચાવ કામગીરીનો મહત્વનો ભાગ બની ગઈ છે.

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

પાણી, કાદવ અને કાટમાળ વચ્ચે રેસ્ક્યૂ ઓપરેશન

નેપાળના અનેક વિસ્તારોમાં હજુ પણ પાણી ભરાયેલું છે. રસ્તાઓ પર કાટમાળ અને મોટી શિલાઓ જમા થઈ ગઈ છે, જેના કારણે રાહત ટીમોને દૂરના વિસ્તારો સુધી પહોંચવામાં મુશ્કેલી પડી રહી છે.

788 લોકોનાં મોત અને 2,500થી વધુ લોકો લાપતા હોવાના અહેવાલ વચ્ચે નેપાળમાં સ્થિતિ હજુ પણ ગંભીર છે. બચાવ દળો હવે એવા વિસ્તારો સુધી પહોંચવાનો પ્રયાસ કરી રહ્યા છે જ્યાં પૂર અને ભૂસ્ખલનના કારણે સંપર્ક સંપૂર્ણપણે તૂટી ગયો છે.

આ પણ વાંચો: બિલાવલ ભુટ્ટો ઓસ્ટ્રિયાની રાજકુમારી સાથે નિકાહ કરશે? જાણો શું છે આ દાવાની સચ્ચાઈ