અંબાલાલ પટેલની નવી આગાહી, આ તારીખથી ફરી ધોધમાર વરસાદની એન્ટ્રી

Ambalal Patel Rain Forecast: હાલમાં રાજ્યભરમાં પવનની તીવ્રતા વધારે હોવાને લીધે અને ચોમાસુ ટ્રફ ઉત્તર-પૂર્વ ભારત તરફ ખસી જવાના કારણે વરસાદનું જોર નોંધપાત્ર રીતે ઘટી ગયું છે. આ ઉપરાંત, અરબી સમુદ્ર કે બંગાળની ખાડીમાં પણ હાલ કોઈ મજબૂત વરસાદી સિસ્ટમ સક્રિય નથી. જો કે, વરસાદની આતુરતાપૂર્વક રાહ જોઈ રહેલા ગુજરાતના નાગરિકો અને જગતના તાત (ખેડૂતો) માટે જાણીતા હવામાન વિશ્લેષક અંબાલાલ પટેલે એક રાહતના સમાચાર આપ્યા છે.

તેમના નવા અનુમાન અનુસાર, આગામી 13 જુલાઈથી રાજ્યમાં ફરી એકવાર ચોમાસું જોર પકડશે અને વાતાવરણ પલટાશે. આ સાથે જ, જુલાઈના અંતિમ સપ્તાહથી લઈને સમગ્ર ઓગસ્ટ મહિના દરમિયાન ગુજરાતમાં સાર્વત્રિક અને સારો વરસાદ વરસવાની પ્રબળ શક્યતા છે.

હવામાન વિશ્લેષક અંબાલાલ પટેલના અનુમાન પ્રમાણે, આગામી 13 અને 14 જુલાઈ દરમિયાન બંગાળની ખાડીમાં એક નવી વરસાદી સિસ્ટમ આકાર લે તેવી પૂરેપૂરી સંભાવના છે. આ સિસ્ટમના પ્રભાવથી 13 થી 16 જુલાઈ વચ્ચે સ્થાનિક સ્તરે સર્જાનારા હવામાનના ફેરફારો (લોકલ સિસ્ટમ) ને કારણે ગુજરાતના જુદા-જુદા ભાગોમાં, ખાસ કરીને કચ્છ પંથકમાં વરસાદી ઝાપટાં પડી શકે છે.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

ત્યારપછી, 17 અને 18 જુલાઈના રોજ બંગાળની ખાડીમાં વધુ એક શક્તિશાળી અને મજબૂત સિસ્ટમ સક્રિય થશે. જો આ લો-પ્રેશર સિસ્ટમ મધ્યપ્રદેશ તરફ આગળ વધશે, તો તેની સીધી અને મોટી અસર ગુજરાતના વાતાવરણ પર જોવા મળશે. જેના લીધે 18 થી 20 જુલાઈ દરમિયાન મધ્ય ગુજરાત (અમદાવાદ, ગાંધીનગર, વડોદરા, પંચમહાલ) અને ઉત્તર ગુજરાત (સાબરકાંઠા, બનાસકાંઠા, અરવલ્લી) ના વિસ્તારોમાં સારો એવો વરસાદ ખાબકવાની શક્યતા છે. આ ઉપરાંત, દક્ષિણ ગુજરાતના ભાગોમાં પણ ૨૨ જુલાઈની આસપાસ મેઘરાજા મહેરબાન થાય તેવો માહોલ બંધાઈ રહ્યો છે.

સૌરાષ્ટ્રના જે પંથકોમાં હજુ સુધી મેઘરાજાએ હાથતાળી આપી છે અને જ્યાં વરસાદ ખેંચાવાના કારણે ચિંતાનો માહોલ છે, તેવા વિસ્તારો માટે 27 થી 30 જુલાઈનો સમયગાળો ખૂબ જ આશાસ્પદ સાબિત થઈ શકે છે. આ દિવસો દરમિયાન પશ્ચિમ સૌરાષ્ટ્રના દેવભૂમિ દ્વારકા, પોરબંદર અને જામનગર સહિત ગુજરાતના વિવિધ ભાગોમાં સારો વરસાદ પડવાની પૂરેપૂરી સંભાવના છે. બીજી તરફ, 24થી 26 જુલાઈ વચ્ચે મુંબઈ સહિત સમગ્ર મહારાષ્ટ્રમાં પણ ભારે વરસાદનું અનુમાન કરવામાં આવ્યું છે.

ઓગસ્ટ મહિનામાં કેવું રહેશે ચોમાસાનું જોર?

આગામી ઓગસ્ટ મહિનામાં વરસાદી માહોલ એકદમ અનુકૂળ રહેવાની ધારણા છે. હવામાન નિષ્ણાત અંબાલાલ પટેલના જણાવ્યા અનુસાર, ‘અલ નીનો’ ની અસર હોવા છતાં, ઇન્ડિયન ઓશન ડાયપોલ (IOD) અને હિંદ મહાસાગરના અન્ય સાનુકૂળ પરિબળો મજબૂત હોવાના કારણે ઓગસ્ટમાં વ્યાપક વરસાદ વરસી શકે છે.

દક્ષિણ ગુજરાતમાં એલર્ટ: ઓગસ્ટની શરૂઆતમાં જ (અંદાજે 1 ઓગસ્ટની આસપાસ) દક્ષિણ ગુજરાતના વિસ્તારોમાં મૂશળધારથી અતિભારે વરસાદ તૂટી પડી શકે છે.

નદીઓમાં પૂરની શક્યતા: આ ભારે વરસાદના કારણે તાપી નદીના પાણીના સ્તરમાં (જળસપાટીમાં) મોટો વધારો થવાની પ્રબળ આશંકા સેવાઈ રહી છે.

આ પણ વાંચો :લોર્ડ્સમાં હરમનપ્રીત કૌરનો જલવો, અનોખી સિદ્ધિથી રચ્યો નવો રેકોર્ડ

આ પણ વાંચો :પિતાના મોત બાદ મોજતબા ખામેનેઈનો આક્રમક સંદેશ: ‘પિતાના ખૂનનો બદલો લઈશું’