180 બાળકોને ભણાવશે રશ્મિકા-વિજય, કપલે લીધી ખાસ જવાબદારી

Vijay Deverakonda Rashmika Mandanna: સાઉથ સિનેમાના પાવર કપલ વિજય દેવરકોંડા અને રશ્મિકા મંદાના તેલંગાણામાં શિક્ષણ વ્યવસ્થાને વધુ બહેતર બનાવવા માટે આપેલું પોતાનું વચન પૂરું કરવામાં લાગી ગયા છે. બંનેએ તેજસ્વી અને મહેનતુ વિદ્યાર્થીઓને અભ્યાસમાં આર્થિક મદદ મળી રહે તે માટે એક ખાસ સ્કોલરશિપ (શિષ્યવૃત્તિ) પહેલની શરૂઆત કરી હતી.

રવિવારે વિજય દેવરકોંડા અને રશ્મિકા મંદાના તેલંગાણાના અચંપેટ મંડલના થુમ્મનપેટ ગામે પહોંચ્યા હતા. અહીં તેમણે જણાવ્યું કે, તેમનું સપનું છે કે હોનહાર વિદ્યાર્થીઓને સ્કોલરશિપ આપવામાં આવે અને સમાજના એવા લોકોને કંઈક પરત કરી શકાય જેમના તરફથી તેમને કરિયરમાં આટલો બધો પ્રેમ અને સપોર્ટ મળ્યો છે.

વિજય અને રશ્મિકાએ જાહેર કરી 180 વિદ્યાર્થીઓની યાદી

અભિનેતા વિજય દેવરકોંડાએ સોશિયલ મીડિયા પ્લેટફોર્મ ‘X’ પર સ્કોલરશિપ માટે પસંદ કરાયેલા તેજસ્વી વિદ્યાર્થીઓની સત્તાવાર યાદી શેર કરી હતી. તેમણે લખ્યું- “અમે થુમ્મનપેટ જઈ રહ્યા છીએ, જે એ નાનકડું ગામ છે જ્યાં મારા પિતાનો જન્મ થયો હતો. ફેબ્રુઆરી મહિનામાં મેં અને રશ્મિકાએ અમારા એક નાના સપનાની શરૂઆત કરી હતી. અમારો હેતુ તેલંગાણાના અચંપેટ મંડલના ૯મી અને ૧૦મી આઠમના મહેનતુ વિદ્યાર્થીઓને સન્માનિત કરવાનો હતો. અહીં એ 180 બાળકોની યાદી છે જેમણે પોતાના માતા-પિતાનું માથું ગર્વથી ઊંચું કર્યું છે.”

ગામમાં આયોજિત કાર્યક્રમ દરમિયાન વિજયે વિદ્યાર્થીઓ અને તેમના પરિવારોને સંબોધતા કહ્યું કે, “આ સ્કોલરશિપ એક નાનકડી ભેટ છે, પરંતુ મારા માટે તેનું ખૂબ મહત્વ છે. હું તમારા જીવનનો એક ભાગ બનવા માંગું છું. પોતાના ગામથી શરૂઆત કરીને હું ઈચ્છું છું કે આ પહેલ ધીમે-ધીમે આખા તેલંગાણા સુધી પહોંચે, આ જ મારું સપનું છે.”

રશ્મિકાએ પોતાને ‘રશ્મિકા મંદાના દેવરકોંડા’ તરીકે ઓળખાવી

વિદ્યાર્થીઓને અભિનંદન આપતા અભિનેત્રી રશ્મિકા મંદાનાએ આ પહેલને લઈને ભારે ઉત્સાહ વ્યક્ત કર્યો હતો. તેમણે ભાવુક થતા જણાવ્યું કે, “હું આજે બહુ વધારે નહીં બોલું, પરંતુ આજે અમે ‘ધ દેવરકોંડા ફાઉન્ડેશન’ (The Deverakonda Foundation) દ્વારા એક નવી અને સારી શરૂઆત કરી રહ્યા છીએ. અમે નક્કી કર્યું હતું કે આની શરૂઆત અચંપેટ અને થુમ્મનપેટથી કરીશું, જે મારા સસરાજીનું ગામ છે. આજે હું તમારી સામે ‘રશ્મિકા મંદાના દેવરકોંડા’ તરીકે ઊભી છું અને આપ સૌની સાથે વાત કરી રહી છું, હું ખૂબ જ ઉત્સાહિત છું.”

ઉલ્લેખનીય છે કે, આ વર્ષની શરૂઆતમાં વિજય અને રશ્મિકા જ્યારે પોતાના નવા ઘરના ગૃહપ્રવેશ અને સત્યનારાયણ વ્રતની પૂજા માટે થુમ્મનપેટ ગામ ગયા હતા ત્યારે તેમણે આ વચન આપ્યું હતું. આ પહેલનો મુખ્ય ઉદ્દેશ્ય આર્થિક તંગીના કારણે કોઈ બાળકે અધવચ્ચેથી ભણતર ન છોડવું પડે તે જોવાનો છે.

વર્કફ્રન્ટની વાત કરીએ તો, વિજય અને રશ્મિકા ટૂંક સમયમાં જ આગામી ફિલ્મ ‘રાણાબાલી’ (Ranabali) માં એકસાથે સ્ક્રીન શેર કરતા જોવા મળશે. લગ્ન પછી આ તેમની પ્રથમ એકસાથે ફિલ્મ હશે. આ અગાઉ આ હિટ જોડી ‘ગીતા ગોવિંદમ’ અને ‘ડિયર કૉમરેડ’ જેવી સુપરહિટ ફિલ્મોમાં સાથે કામ કરી ચૂકી છે. ડાયરેક્ટર રાહુલ સાંકૃત્યાયનની આ ફિલ્મ 11 સપ્ટેમ્બરના રોજ સિનેમાઘરોમાં રિલીઝ થવાની છે.

આ પણ વાંચોઃ World Cup 2026: યુએસએમાં એન્ટ્રી ન મળવા છતાં રેફરીને મળશે પૂરો પગાર

આ પણ વાંચોઃ દીદીના હાથમાંથી સરકી TMC? ભૂપેન્દ્ર યાદવના ઘરે બળવાખોર સાંસદોની મોટી બેઠક, અલગ ગઠબંધનની તૈયારી

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X