Donald Trump stock trading: અમેરિકાના રાષ્ટ્રપ્રમુખ ડોનાલ્ડ ટ્રમ્પ ફરી એકવાર પોતાના વ્યક્તિગત શેરબજારના વ્યવહારોને લઈને મોટા વિવાદમાં ફસાયા છે. યુએસ મીડિયા રિપોર્ટ્સ અનુસાર, રાષ્ટ્રપ્રમુખ ટ્રમ્પે ચાલુ વર્ષના ફેબ્રુઆરી મહિનામાં અગ્રણી ટેક કંપનીઓ માઇક્રોસોફ્ટ અને એમેઝોનમાં પોતાના $5 મિલિયનથી $25 મિલિયન (આશરે ₹41 કરોડથી ₹207 કરોડ) ના શેર વેચી દીધા હતા અને ત્યારબાદ માર્ચ મહિનામાં જ આ કંપનીઓમાં લાખો ડોલરનું ફરીથી રોકાણ કર્યું હતું. જોકે, કાયદાકીય રીતે નિર્ધારિત સમયમર્યાદામાં આ હાઈ-પ્રોફાઈલ નાણાકીય વ્યવહારોની સત્તાવાર વિગતો જાહેર ન કરવા બદલ તેમની સામે દંડાત્મક કાર્યવાહી કરવામાં આવી છે.

નિયમોનું ઉલ્લંઘન અને ટ્રેડિંગ ટાઈમિંગ સામે સવાલો

યુએસ ઑફિસ ઑફ ગવર્નમેન્ટ એથિક્સ (OGE) માં દાખલ કરાયેલા સત્તાવાર દસ્તાવેજો અનુસાર, અમેરિકી કાયદા હેઠળ રાષ્ટ્રપ્રમુખ માટે $1,000 થી વધુ મૂલ્યના કોઈપણ સ્ટોક ટ્રેડિંગની માહિતી 45 દિવસની અંદર જાહેર કરવી ફરજિયાત છે. ટ્રમ્પ આ નિયત સમયમર્યાદાનું પાલન કરવામાં નિષ્ફળ રહેતા તેમને $200 નો દંડ ફટકારવામાં આવ્યો છે. આ અગાઉ ગયા વર્ષે માર્ચ અને ઓગસ્ટમાં પણ સમાન વિલંબ માટે તેમને આવો જ દંડ ભોગવવો પડ્યો હતો.

અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X

ટ્રેડિંગના ટાઈમિંગને લઈને પણ ગંભીર સવાલો

આ વિવાદ માત્ર દંડ પૂરતો સીમિત નથી, પરંતુ ટ્રેડિંગના ટાઈમિંગને લઈને પણ ગંભીર સવાલો ઉઠી રહ્યા છે. ટ્રમ્પે 10 ફેબ્રુઆરીએ સેમિકન્ડક્ટર જાયન્ટ Nvidia ના શેર ખરીદ્યા હતા, જેના થોડા જ દિવસો બાદ કંપનીએ મેટા પ્લેટફોર્મ્સ સાથે મોટા પ્રોજેક્ટની જાહેરાત કરી અને તેના શેર 2.5% વધી ગયા. તેવી જ રીતે, માઇક્રોસોફ્ટ અને એમેઝોનમાં તેમણે એવા સમયે રોકાણ કર્યું જેના થોડા સમય બાદ જ યુએસ ડિપાર્ટમેન્ટ ઓફ ડિફેન્સ (પેન્ટાગોન) દ્વારા મિલિટરી કમ્પ્યુટર નેટવર્ક માટે આ કંપનીઓ સાથે કરોડો ડોલરના ગુપ્ત કરારોની જાહેરાત કરવામાં આવી હતી.

‘બ્લાઇન્ડ ટ્રસ્ટ’ ના આડમાં હિતોનો સંઘર્ષ?

અમેરિકામાં વોટરગેટ કૌભાંડ બાદ રાષ્ટ્રપ્રમુખ અને ઉપરાષ્ટ્રપ્રમુખ પદ પર રહેલી વ્યક્તિઓ માટે હિતોના સંઘર્ષ (કોન્ફ્લિક્ટ ઓફ ઇન્ટરેસ્ટ) ને ટાળવા કડક એથિક્સ નિયમો બનાવાયા છે. જીમી કાર્ટરના સમયથી તમામ પ્રમુખો પદ સંભાળતા પહેલા પોતાના શેર વેચી દે છે અથવા અસ્કયામતોને ‘બ્લાઇન્ડ ટ્રસ્ટ’ માં મૂકે છે જેથી તેમને પોતાના રોકાણની ખબર ન રહે. ટ્રમ્પે 2017 માં પોતાના પ્રથમ કાર્યકાળ વખતે આ નિયમ પાળ્યો હતો, પરંતુ આ બીજા કાર્યકાળમાં તેમણે પોતાના શેરો જાળવી રાખ્યા છે. હાલ તેમની સંપત્તિ તેમના બાળકો દ્વારા સંચાલિત ટ્રસ્ટમાં છે, જે પરંપરાગત બ્લાઇન્ડ ટ્રસ્ટથી અલગ છે અને ટ્રમ્પને પોતાના રોકાણોથી વાકેફ રાખે છે.

ટ્રમ્પ ઓર્ગેનાઇઝેશનનો બચાવ અને અમેરિકી જનતાનો વિરોધ

આ મામલે વ્હાઇટ હાઉસે પ્રશ્નો ટ્રમ્પ ઓર્ગેનાઇઝેશન તરફ વાળ્યા હતા. સંસ્થાના પ્રવક્તા કિમ્બર્લી બેન્ઝાએ બચાવ કરતા જણાવ્યું કે, રાષ્ટ્રપ્રમુખના તમામ રોકાણોનું સંચાલન સંપૂર્ણપણે એક સ્વતંત્ર થર્ડ પાર્ટી દ્વારા થાય છે અને ટ્રમ્પ અથવા તેમનો પરિવાર રોકાણના કોઈ પણ નિર્ણયમાં સામેલ નથી. નોંધનીય છે કે 2024 માં ફરી ચૂંટાયા બાદ ટ્રમ્પે $600 મિલિયનથી વધુની વાર્ષિક આવક અને $૧.૬ બિલિયનની સંપત્તિ જાહેર કરી છે.

શેર વ્યાપારનો વ્યાપક વિરોધ

બીજી તરફ, અમેરિકામાં રાજકારણીઓ દ્વારા થતા શેર વ્યાપારનો વ્યાપક વિરોધ થઈ રહ્યો છે. 2022 ના એક સર્વે અનુસાર, 81 ટકા અમેરિકન મતદારો ઈચ્છે છે કે કાયદા ઘડનારાઓ પર પદ પર રહીને શેર ટ્રેડિંગ કરવા પર સંપૂર્ણ પ્રતિબંધ મૂકવો જોઈએ, પરંતુ ડેમોક્રેટિક અને રિપબ્લિકન બંને પક્ષોના પ્રયાસો છતાં આ અંગેનો કોઈ કડક કાયદો હજુ સુધી સંસદમાં પસાર થઈ શક્યો નથી.

આ પણ વાંચો: કોઈ સોદો નહીં, કોઈ નિવેદન નહીં… ટ્રમ્પની ચીન મુલાકાત નિષ્ફળતા’માં પરિણમી!