અરબ સાગરમાં ઈમરજન્સી લેન્ડિંગ દરમ્યાન US નેવી હેલિકોપ્ટર ક્રેશ, એક ક્રૂ મેમ્બર ગુમ
International News : અરબી સમુદ્રમાં ઇમરજન્સી વોટર લેન્ડિંગ દરમિયાન યુએસ નેવીનું MH-60S સી હોક હેલિકોપ્ટર ક્રેશ થયું હતું. જેમાં એક ક્રૂ મેમ્બર ગુમ છે અને ત્રણ અન્ય ઘાયલ થયા છે. યુએસ નેવીના નિવેદન મુજબ, હેલિકોપ્ટર 1 જુલાઈના રોજ સવારે 3:30 કલાકે EDT પર ક્રેશ થયું હતું. હેલિકોપ્ટર USS જ્યોર્જ H.W. બુશ (નિમિત્ઝ-ક્લાસ) એરક્રાફ્ટ કેરિયર પર તૈનાત હતું. નેવીએ તેના નિવેદનમાં જણાવ્યું હતું કે, આ ક્રેશ કોઈ હુમલાને કારણે થયો ન હતો.
હાલ બચાવ કામગીરી ચાલી રહી છે અને ગુમ થયેલા ક્રૂ મેમ્બરની શોધ ચાલી રહી છે. નેવીએ જણાવ્યું હતું કે, હેલિકોપ્ટરમાં ચાર ક્રૂ મેમ્બર સવાર હતા. તેમાંથી ત્રણને ઇજાઓ સાથે બચાવી લેવામાં આવ્યા હતા, જ્યારે એક હજુ પણ ગુમ છે. ગુમ થયેલા ક્રૂ મેમ્બર વિશે કોઈ માહિતી જાહેર કરવામાં આવી નથી. નેવીએ જણાવ્યું હતું કે, “યુએસ નેવી જહાજો અને વિસ્તારમાં અન્ય સંસાધનો હજુ પણ ગુમ થયેલા ક્રૂ મેમ્બરોને શોધી રહ્યા છે.” “ઘટનાનું કારણ તપાસ હેઠળ છે.”
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
અહીં બે એરક્રાફ્ટ કેરિયર તૈનાત કરાયા હતા
ઈરાન સાથે ચાલી રહેલા તણાવ વચ્ચે, USS જ્યોર્જ ડબલ્યુ. બુશ મધ્ય પૂર્વમાં યુએસ નેવીની તૈનાતીનો મુખ્ય ભાગ રહ્યો છે. તે એપ્રિલ 2026થી મધ્ય પૂર્વમાં છે અને આ પ્રદેશમાં તૈનાત બે યુએસ એરક્રાફ્ટ કેરિયર્સમાંથી એક છે.
મિડલ ઇસ્ટ ઇન્સ્ટિટ્યૂટ અનુસાર, મધ્ય પૂર્વમાં યુએસ નેવીનો કાફલો બહેરીનમાં નેવલ સપોર્ટ એક્ટિવિટીથી કાર્યરત છે. ફિફ્થ ફ્લીટ પર્સિયન ગલ્ફ, અરબી સમુદ્ર અને હિંદ મહાસાગરના ભાગોમાં કાર્યરત છે. આ કાફલો હોર્મુઝ સ્ટ્રેટ અને બાબ અલ-મંડેબ જેવા મુખ્ય સંઘર્ષ ઝોનમાં કામગીરી માટે જવાબદાર છે.
યુએસ સેના પણ હાઇ એલર્ટ પર
યુએસ સેન્ટ્રલ કમાન્ડે 24 જૂને જણાવ્યું હતું કે, યુએસએસ જ્યોર્જ એચ.ડબલ્યુ. બુશ મધ્ય પૂર્વમાં કાર્યરત બે એરક્રાફ્ટ કેરિયર્સમાંથી એક છે. પાણીમાં હેલિકોપ્ટર લેન્ડિંગ ખતરનાક બની શકે છે. અનુભવી પાઇલટ્સ માટે પણ, આવા વિમાનો તેમના ભારે ટોપસાઇડને કારણે ડૂબી જાય ત્યારે પલટી શકે છે.
યુએસ અને ઈરાન વચ્ચે યુદ્ધવિરામ દરમિયાન હિંસામાં છૂટાછવાયા વધારાને કારણે, પ્રદેશમાં યુએસ દળો પણ હાઇ એલર્ટ પર છે. સંઘર્ષનો અંત લાવવાના ઉદ્દેશ્યથી સમજૂતી પત્ર (MOU) પર હસ્તાક્ષર કર્યા પછી, અમેરિકા અને ઈરાન હુમલાઓ બંધ કરવા અને આ ક્ષેત્રમાં જહાજોને મુક્તપણે ફરવા દેવા સંમત થયા છે. આ વાટાઘાટોમાં હોર્મુઝ સ્ટ્રેટ સંબંધિત વ્યવસ્થા, ઈરાની બંદરો પર યુએસ નાકાબંધી અને ઈરાન પરના પ્રતિબંધો હટાવવા અને ઈરાનના અત્યંત સમૃદ્ધ યુરેનિયમના ભંડારના ભવિષ્યનો સમાવેશ થાય છે.
આ પણ વાંચો : ગુજરાતમાં મેઘમહેર: 107 તાલુકામાં ગઈ કાલે વરસાદ ખાબક્યો, આજે આટલા જિલ્લામાં વરસાદની આગાહી
