રાજુલા નગરપાલિકા સામે સફાઈ કામદારોની હડતાળથી શહેરમાં હોબાળો

અમરેલી, 4 સપ્ટેમ્બર 2025: અમરેલી જિલ્લાના રાજુલા શહેરમાં નગરપાલિકા દ્વારા સફાઈની કામગીરી અન્ય એજન્સીને સોંપવાના નિર્ણય સામે સ્થાનિક સફાઈ કામદારોની હડતાળથી સ્થિતિ ઉગ્ર બની છે. આ વિવાદે શહેરના મુખ્ય બજારમાં તણાવનું વાતાવરણ ઊભું કર્યું હતું, જેના કારણે પોલીસે ચુસ્ત બંદોબસ્ત ગોઠવવો પડ્યો હતો. હડતાળી સફાઈ કામદારોએ નવી એજન્સીના કર્મચારીઓ પાસેથી સાવણા આંચકી લઈને સફાઈની કામગીરીને અટકાવી હતી, જેના પગલે પોલીસે 30થી વધુ કામદારોને ડિટેઈન કર્યા છે.

રાજુલા નગરપાલિકાએ શહેરની સ્વચ્છતા જાળવવા માટે નવી એજન્સીને કોન્ટ્રાક્ટ આપ્યો હતો, પરંતુ આ નિર્ણય સ્થાનિક સફાઈ કામદારોને મંજૂર ન પડ્યો. તેમનો આક્ષેપ છે કે આ નિર્ણયથી તેમની રોજગારી પર આફત આવી છે. આથી, તેઓએ હડતાળ પાડી અને નવી એજન્સીની સફાઈની કામગીરીને રોકવાનો પ્રયાસ કર્યો. બુધવારે સવારે જ્યારે નવી એજન્સીએ મુખ્ય બજારમાં સફાઈ શરૂ કરી, ત્યારે હડતાળી કામદારોએ હોબાળો મચાવીને કામગીરીને અટકાવી. આ ઘટનાએ શહેરમાં અરાજકતાનું વાતાવરણ સર્જ્યું હતું.

સ્થિતિ નિયંત્રણમાં લેવા માટે એએસપી સહિતના વરિષ્ઠ પોલીસ અધિકારીઓ ઘટનાસ્થળે પહોંચ્યા હતા. પોલીસે હડતાળી કામદારોને શાંતિપૂર્ણ રીતે વિખેરવાનો પ્રયાસ કર્યો, પરંતુ વિરોધ ચાલુ રહેતાં 30થી વધુ કામદારોને ડિટેઈન કરવામાં આવ્યા હતા. પોલીસે શહેરમાં શાંતિ જાળવવા ચુસ્ત બંદોબસ્ત ગોઠવ્યો છે, જેથી આગળની અનિચ્છનીય ઘટનાઓ ટળે.

આ ઘટનાથી રાજુલા શહેરની સ્વચ્છતા પર પણ અસર પડી છે. મુખ્ય બજારમાં કચરાના ઢગલા થયા છે, જેના કારણે વેપારીઓ અને નાગરિકોમાં નારાજગી જોવા મળી રહી છે. નગરપાલિકા અને હડતાળી કામદારો વચ્ચે વાટાઘાટો ચાલુ છે, પરંતુ હજુ સુધી કોઈ સમાધાન થયું નથી. સ્થાનિક લોકોની માગ છે કે નગરપાલિકાએ સફાઈ કામદારોની ચિંતાઓને ધ્યાનમાં લઈને યોગ્ય નિર્ણય લેવો જોઈએ, જેથી શહેરની સ્વચ્છતા અને શાંતિ બંને જળવાઈ રહે.

આ પણ વાંચો: સૈયારાનું કલેક્શન કેટલા કરોડમાં સમેટાયું? શાહરૂખ-સલમાનની આ ફિલ્મનો તોડ્યો રેકોર્ડ