Surat: ભાજપે ઉમેદવારોની પસંદગી માટે કમર કસી, 1લી એપ્રિલથી નિરીક્ષકો સેન્સ લેશે

Surat News: સુરત મહાનગરપાલિકાની આગામી ચૂંટણી જીતવા માટે ભારતીય જનતા પાર્ટીએ અત્યારથી જ આક્રમક રણનીતિ તૈયાર કરી લીધી છે. ઉમેદવારોની પસંદગી પ્રક્રિયાને વધુ સચોટ અને પારદર્શક બનાવવા માટે ભાજપ સંગઠન દ્વારા આગામી 1લી એપ્રિલથી નિરીક્ષકોની હાજરીમાં સેન્સ લેવાની પ્રક્રિયા શરૂ કરવામાં આવશે. સુરતના ઉધના સ્થિત ભાજપ કાર્યાલય ખાતે પ્રથમ તબક્કામાં વોર્ડ નંબર 1 થી 12 ના દાવેદારોને સાંભળવામાં આવશે.

વ્યવસ્થિત આયોજન

દાવેદારોની રજૂઆત સાંભળવા માટે ઉધના કાર્યાલય ખાતે ખાસ બેઠક વ્યવસ્થા કરવામાં આવી છે. સમગ્ર વોર્ડ માળખાને ચાર મુખ્ય જૂથોમાં વહેંચી દેવામાં આવ્યું છે જેથી પ્રક્રિયા ઝડપી અને સુવ્યવસ્થિત રીતે પૂર્ણ થઈ શકે. જહાંગીરપુરા, અમરોલી અને વરાછા જેવા વિસ્તારોના દાવેદારોને ગ્રાઉન્ડ ફ્લોર પર સાંભળવામાં આવશે, જ્યારે કાપોદ્રા અને કતારગામના દાવેદારો માટે અપર ગ્રાઉન્ડ વોર રૂમની વ્યવસ્થા કરવામાં આવી છે. આ પ્રક્રિયા સવારે 10 વાગ્યાથી શરૂ થઈ સાંજ સુધી ચાલશે.

ઉમેદવારી માટે કડક શરતો અને દસ્તાવેજો

આ વખતે ભાજપે ઉમેદવારી કરવા ઈચ્છતા કાર્યકરો માટે નિયમોમાં ઘણી કડકાઈ દાખવી છે. પક્ષનો હેતુ એવા ઉમેદવારોને મેદાનમાં ઉતારવાનો છે જેઓ શિસ્તબદ્ધ અને કાયદાકીય રીતે સક્ષમ હોય.

• વેરા પાવતી: ઉમેદવારે સાબિત કરવું પડશે કે તેણે તમામ સરકારી અને મનપાના વેરાઓની ચુકવણી કરી દીધી છે.

• મતદાર યાદીની નકલ: વર્ષ 2026ની સ્થાનિક સ્વરાજ્યની ચૂંટણીની મતદાર યાદીમાં નામ હોય તે પેજની નકલ રજૂ કરવી ફરજિયાત છે.

• જાતિ પ્રમાણપત્ર: અનામત બેઠકો (OBC, SC, ST) પરથી ચૂંટણી લડવા ઈચ્છતા ઉમેદવારોએ લેટેસ્ટ જાતિ પ્રમાણપત્ર સાથે રાખવું પડશે.

• સમયપાલન: જે-તે વોર્ડના નિયત સમયના એક કલાક પૂર્વે જ ફોર્મ મેળવી લેવાના રહેશે.

નિરીક્ષકોની ભૂમિકા અને આખરી નિર્ણય

નિરીક્ષકો તમામ દાવેદારોની વ્યક્તિગત રજૂઆત સાંભળશે અને તેમની પક્ષ પ્રત્યેની વફાદારી તથા વિસ્તારમાં તેમની લોકપ્રિયતાની તપાસ કરશે. આ રજૂઆતોના આધારે એક વિસ્તૃત રિપોર્ટ તૈયાર કરવામાં આવશે, જે પ્રદેશ ભાજપ કક્ષાએ મોકલવામાં આવશે. આ રિપોર્ટ અને સ્થાનિક સમીકરણોને ધ્યાનમાં રાખીને જ આખરી નામો પર મહોર મારવામાં આવશે.

સુરતમાં ટિકિટ વાંચ્છુઓની સંખ્યા મોટી હોવાથી નિરીક્ષકો માટે પણ યોગ્ય ઉમેદવારની પસંદગી પડકારજનક બની રહેશે. 1 થી 12 વોર્ડ બાદ બાકીના વોર્ડ માટે પણ ટૂંક સમયમાં શિડ્યુલ જાહેર કરવામાં આવશે. ભાજપની આ સંગઠનાત્મક કવાયતથી કાર્યકરોમાં ભારે ઉત્સાહ જોવા મળી રહ્યો છે

અમારી WhatsApp ચેનલમાં જોડાવા આ લિંક પર ક્લીક કરો

https://whatsapp.com/channel/0029VauCUMx6LwHmdrOBwa2X

આ પણ વાંચો: Surat: ભાજપ વિરોધી પોસ્ટરો લાગતા અલ્પેશ કથિરીયાનો ‘આપ’ પર આકરો પ્રહાર