મેડિકલ કોલેજમાં કડક પગલાં: રેગિંગમાં સંડોવાયેલા 13 વિદ્યાર્થીઓ સામે સસ્પેન્શનની કાર્યવાહી

ગાંધીનગરની GMERS મેડિકલ કોલેજમાં સિનિયર વિદ્યાર્થીઓ દ્વારા રેગિંગની ગંભીર ઘટના સામે આવતા રાજ્યના તબીબી શિક્ષણ વિભાગે તાત્કાલિક અને કડક કાર્યવાહી કરી છે. આ ઘટનામાં સંડોવાયેલા કુલ 14 જેટલા સિનિયર વિદ્યાર્થીઓ સામે સસ્પેન્શનનો કોરડો વીંઝવામાં આવ્યો છે.

રેગિંગની ઘટના અને તપાસ

પ્રથમ વર્ષના નવા પ્રવેશ મેળવનાર MBBS વિદ્યાર્થીઓએ કોલેજ સત્તાધીશોને લેખિતમાં ફરિયાદ કરી હતી કે બોયઝ હોસ્ટેલમાં સેકન્ડ અને થર્ડ યરના સિનિયર વિદ્યાર્થીઓ દ્વારા તેમને ‘ઇન્ટ્રોડક્શન’ ના નામે બિનસત્તાવાર રીતે બોલાવવામાં આવતા હતા. આ પરિચય દરમિયાન તેમની હસીમજાક કરીને તેમને અપમાનિત કરવામાં આવતા હતા, જે માનસિક ત્રાસની સમકક્ષ હતું.

હોસ્ટેલ ડીનને ફરિયાદ મળતા જ કોલેજ વહીવટીતંત્ર સક્રિય બન્યું હતું. તાત્કાલિક સીસીટીવી ફૂટેજની તપાસ કરવામાં આવી, જેમાં ત્રીજા અને બીજા વર્ષના વિદ્યાર્થીઓ આ કૃત્યમાં સામેલ હોવાનું સ્પષ્ટ થયું. આ ગંભીર અનૈતિક વર્તનને ધ્યાનમાં રાખીને એન્ટી-રેગિંગ કમિટીએ કડક પગલાં લેવાનો નિર્ણય કર્યો.

સસ્પેન્શનની કડક સજા

રેગિંગની ઘટનામાં સંડોવાયેલા વિદ્યાર્થીઓ સામે નીચે મુજબ કાર્યવાહી કરવામાં આવી છે:

• થર્ડ યરના 7 વિદ્યાર્થીઓ: આ મુખ્ય આરોપી વિદ્યાર્થીઓને 2 વર્ષ માટે કોલેજમાંથી રસ્ટિગેટ (સસ્પેન્ડ) કરવામાં આવ્યા છે.

• સેકન્ડ યરના અન્ય વિદ્યાર્થીઓ: આ વિદ્યાર્થીઓને 6 મહિના માટે કોલેજમાંથી સસ્પેન્ડ કરવામાં આવ્યા છે.

તમામ કસૂરવાર વિદ્યાર્થીઓને તેમના સસ્પેન્શનના સમયગાળા દરમિયાન હોસ્ટેલમાંથી પણ બરતરફ કરવામાં આવ્યા છે. શિક્ષણ મંત્રી પ્રફુલ પાનશેરિયાએ આ નિર્ણયની પુષ્ટિ કરી હતી.

મંત્રીની કોલેજોને ચેતવણી

તબીબી શિક્ષણ મંત્રીએ આ ગંભીર ઘટનાને વખોડી કાઢીને અન્ય મેડિકલ કોલેજોને પણ સ્પષ્ટ ચેતવણી આપી હતી. તેમણે જણાવ્યું કે, વિદ્યાર્થીઓ ડૉક્ટર બનીને માનવતાની સેવા કરવા જઈ રહ્યા છે, ત્યારે તેમનામાં માનવતા હોવી જરૂરી છે.

તેમણે ભારપૂર્વક જણાવ્યું કે, રાજ્ય સરકારને અન્ય કોઈ કોલેજોમાં પણ રેગિંગની નાની પણ ફરિયાદ મળશે, તો તાત્કાલિક અને કડક કાર્યવાહી કરવામાં આવશે, જે વિદ્યાર્થીઓની કારકિર્દી પર ગંભીર અસર કરી શકે છે. મંત્રીએ વિદ્યાર્થીઓના માનસિક સ્વાસ્થ્યનું ધ્યાન રાખવા પર ભાર મૂકતા જણાવ્યું કે રેગિંગને કારણે વિદ્યાર્થીઓ આત્મહત્યા જેવા પગલાં ભરી શકે છે, તેથી આ બાબતે જાગૃતિ ખૂબ જરૂરી છે.

આ કડક અને તાત્કાલિક પગલાં રાજ્યની શૈક્ષણિક સંસ્થાઓમાં રેગિંગની પ્રવૃત્તિઓ અટકાવવા માટે એક મજબૂત સંદેશો આપે છે.