શાકિબ અલ હસનનો યુ-ટર્ન: નિવૃત્તિનો નિર્ણય બદલ્યો, ત્રણેય ફોર્મેટમાં રમવા માંગે છે ફેરવેલ સિરીઝ

બાંગ્લાદેશના ખેલ સલાહકારે સ્પષ્ટપણે કહ્યું હતું કે શાકિબ અલ હસન ટીમમાં પાછો ફરી શકશે નહીં કારણ કે તેણે ભૂતપૂર્વ વડા પ્રધાન શેખ હસીનાને તેમના જન્મદિવસ પર શુભેચ્છા પાઠવી હતી. શાકિબ હવે તેની ફિટનેસ અને પ્રદર્શનના આધારે ટીમમાં પાછા ફરવા માંગે છે.
બાંગ્લાદેશના ભૂતપૂર્વ કેપ્ટન શાકિબ અલ હસન ઘણા સમયથી આંતરરાષ્ટ્રીય ક્રિકેટથી દૂર છે. શાકિબ છેલ્લે ગયા વર્ષે ઓક્ટોબરમાં કાનપુરમાં ભારત સામેની ટેસ્ટ મેચમાં બાંગ્લાદેશ માટે રમ્યો હતો. ભારતના પ્રવાસ બાદ, શાકિબે ટેસ્ટ અને ટી20 ફોર્મેટમાંથી નિવૃત્તિની જાહેરાત કરી હતી, પરંતુ વન-ડે આંતરરાષ્ટ્રીય મેચ રમવાનું ચાલુ રાખવાની ઇચ્છા વ્યક્ત કરી.
શાકિબે યુ-ટર્ન લીધો
આ દરમિયાન, શાકિબ અલ હસન વિવાદો અને કાનૂની મુદ્દાઓમાં ફસાઈ ગયો, જેના કારણે તે બાંગ્લાદેશ માટે રમી શક્યો ન હતો. હવે, શાકિબે યુ-ટર્ન લીધો છે અને ટી20 આંતરરાષ્ટ્રીય અને ટેસ્ટ ક્રિકેટ પણ રમવાની ઇચ્છા વ્યક્ત કરી છે. એટલે કે, તેણે નિવૃત્તિનો પોતાનો નિર્ણય બદલી નાખ્યો છે. શાકિબ બાંગ્લાદેશ માટે ત્રણેય ફોર્મેટ – વનડે, ટી20 આંતરરાષ્ટ્રીય અને ટેસ્ટ – માં તેની છેલ્લી ફેરવેલ સિરીઝ રમવા માંગે છે અને તેની કારકિર્દીનો શાનદાર રીતે અંત લાવવા માંગે છે. શાકિબે એમ પણ કહ્યું કે તે બાંગ્લાદેશમાં તેના ઘરઆંગણાના ચાહકોની સામે તેની કારકિર્દીની છેલ્લી સિરીઝ રમવા માંગે છે.
શાકિબ પોતાને ફિટ રાખી રહ્યો છે
શાકિબ અલ હસને ખુલાસો કર્યો કે તેણે ત્રણેય ફોર્મેટમાંથી સત્તાવાર રીતે નિવૃત્તિ લીધી નથી. તે પોતાને ફિટ રાખી રહ્યો છે જેથી તે પસંદગી માટે ઉપલબ્ધ રહી શકે અને છેલ્લી સિરીઝ રમી શકે. શાકિબે કહ્યું, “મારી ઈચ્છા બાંગ્લાદેશ પરત ફરવાની છે અને ODI, ટેસ્ટ અને T20 આંતરરાષ્ટ્રીય મેચોની સંપૂર્ણ સિરીઝ રમવાની છે, અને પછી નિવૃત્તિ લેવાની છે. હું કોઈપણ ક્રમમાં રમી શકું છું, પરંતુ હું આખી સિરીઝ રમ્યા પછી જ નિવૃત્તિ લેવા માંગુ છું. આ જ મારી ઈચ્છા છે.”
શાકિબને બાંગ્લાદેશ પાછા ફરવાની આશા
શાકિબ અલ હસન કહે છે, “મને બાંગ્લાદેશ પાછા ફરવાની આશા છે. એટલા માટે હું રમી રહ્યો છું. હું મારા ઘરના દર્શકો સામે નિવૃત્તિ લેવા માંગુ છું, અને મને લાગે છે કે તે થશે. આ જ કારણ છે કે હું રમી રહ્યો છું. હું ફિટ રહેવા માંગુ છું જેથી હું આંતરરાષ્ટ્રીય ક્રિકેટ માટે ઉપલબ્ધ રહી શકું.”
બાંગ્લાદેશ ક્રિકેટ બોર્ડ (BCB) એ પહેલાથી જ સ્પષ્ટ કરી દીધું છે કે તે શાકિબ અલ હસનને કોઈ સુરક્ષાની ગેરંટી આપી શકે નહીં. આ જ કારણ છે કે શાકિબ લગભગ એક વર્ષથી પોતાના દેશમાં પરત ફરી શક્યો નથી. ગયા વર્ષે, શાકિબ તેના હોમ ગ્રાઉન્ડ પર દક્ષિણ આફ્રિકા સામે ફેરવેલ ટેસ્ટ રમવા માંગતો હતો, પરંતુ સુરક્ષા ચિંતાઓ અને ધરપકડના ડરને કારણે, તેણે બાંગ્લાદેશ પાછા ફરવાનું જોખમ લીધું ન હતું. વર્તમાન પરિસ્થિતિને જોતાં, તેના બાંગ્લાદેશ પરત ફરવાની શક્યતા ખૂબ જ ઓછી છે.
શાકિબની શાનદાર કારકિર્દી
38 વર્ષીય શાકિબ અલ હસન બાંગ્લાદેશ ટીમનો શાનદાર ઓલરાઉન્ડર રહ્યો છે. તેણે 71 ટેસ્ટ રમી છે, જેમાં 37.78 ની સરેરાશથી 4609 રન બનાવ્યા છે અને 246 વિકેટ લીધી છે. શાકિબનો એક મજબૂત વનડે રેકોર્ડ પણ છે, તેણે 247 મેચોમાં 7570 રન બનાવ્યા છે અને 317 વિકેટ લીધી છે. T20 આંતરરાષ્ટ્રીય મેચોમાં, શાકિબે 129 મેચ રમી છે, જેમાં 2551 રન બનાવ્યા છે અને 149 વિકેટ લીધી છે. શાકિબને ઈન્ડિયન પ્રીમિયર લીગ (IPL) માં પણ બહોળો અનુભવ છે. તેણે IPL માં 71 મેચ રમી છે, જેમાં 793 રન બનાવ્યા છે અને 63 વિકેટ લીધી છે.
આ પણ વાંચો: લગ્ન તૂટ્યા બાદ સ્મૃતિ મંધાના અને પલાશ મુચ્છલે મોટો નિર્ણય લીધો, બહેન સાથે પણ સંબંધ તોડ્યા












