સાબરકાંઠા જિલ્લાના વિજયનગર તાલુકાના ગાડી વોકડા ગામમાં અંધશ્રદ્ધા અને ડાકણ પ્રથાના નામે બનેલી હૃદયદ્રાવક ઘટનાએ સમગ્ર રાજ્યને હચમચાવી નાખ્યું છે. ગામમાં એક મહિલાને ડાકણ હોવાની શંકાના આધારે તેના પરિવાર પર સામૂહિક હુમલો કરવામાં આવ્યો હતો. આ હુમલામાં મનુભાઈ ડામોરનું મોત થયું હતું, જ્યારે પરિવારના અન્ય બે સભ્યો ગંભીર રીતે ઘાયલ થયા હતા. ઘટનાને પગલે પોલીસે 12 આરોપીઓની ધરપકડ કરી કાયદેસરની કાર્યવાહી હાથ ધરી છે.
આ ઘટનાની ગંભીરતાને ધ્યાનમાં રાખીને ભારત જન વિજ્ઞાન જાથાની ટીમે ગામની મુલાકાત લીધી હતી. જાથાના ચેરમેન અને એડવોકેટ જયંત પંડયાના નેતૃત્વમાં ટીમે પીડિત પરિવારને સાંત્વના આપી હતી તેમજ બંને પરિવારો વચ્ચે સંવાદ સ્થાપિત કરી ભવિષ્યમાં વધુ વિવાદ ન વધે તે માટે પ્રયાસો હાથ ધર્યા હતા.
ડાકણની શંકાએ સર્જાયો લોહિયાળ વિવાદ
મળતી માહિતી અનુસાર ગામના એક પરિવારે મનુભાઈ ડામોરની પત્ની પર ડાકણ હોવાનો આરોપ મૂક્યો હતો. તેમના મતે પરિવારની બીમારીઓ, બેરોજગારી અને અન્ય દુર્ભાગ્યપૂર્ણ ઘટનાઓ પાછળ મહિલાનો હાથ હોવાનું માનવામાં આવતું હતું. આ શંકા ધીમે ધીમે ઉગ્ર બની અને આખરે સામૂહિક હુમલામાં ફેરવાઈ ગઈ.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
આરોપીઓ લાકડીઓ, ધોકા, પાઈપ, પથ્થરો અને કુહાડીઓ સાથે ડામોર પરિવારના ઘરે તૂટી પડ્યા હતા. પત્નીને બચાવવા વચ્ચે પડેલા મનુભાઈ ડામોર પર કુહાડીથી જીવલેણ હુમલો કરવામાં આવ્યો હતો. ગંભીર રીતે ઘાયલ થયેલા મનુભાઈને અમદાવાદ સિવિલ હોસ્પિટલમાં સારવાર માટે ખસેડવામાં આવ્યા હતા, જ્યાં સારવાર દરમિયાન તેમનું મોત થયું હતું.
12 આરોપીઓ સામે પોલીસની કાર્યવાહી
ઘટનાની જાણ થતાં જ ચિઠોડા પોલીસ સ્ટેશન અને પાલ પોલીસ દ્વારા તાત્કાલિક કાર્યવાહી હાથ ધરવામાં આવી હતી. પોલીસે 8 પુરુષ અને 4 મહિલાઓ સહિત કુલ 12 આરોપીઓની ધરપકડ કરી છે. સમગ્ર વિસ્તારમાં કાયદો અને વ્યવસ્થા જળવાઈ રહે તે માટે પોલીસ બંદોબસ્ત પણ ગોઠવવામાં આવ્યો છે.
વિજ્ઞાન જાથાએ સાબરકાંઠા જિલ્લા પોલીસ અને ખાસ કરીને ચિઠોડા પોલીસ સ્ટેશનના પી.આઈ. આર.ડી. તરાલની કામગીરીને પ્રશંસનીય ગણાવી હતી.
વિજ્ઞાન જાથાની ટીમે પીડિત પરિવારને આપી સાંત્વના
રાજકોટથી પહોંચેલી વિજ્ઞાન જાથાની ટીમે પીડિત પરિવારના ઘરે જઈ મનુભાઈ ડામોરને શ્રદ્ધાંજલિ અર્પણ કરી હતી. પરિવારજનો પાસેથી સમગ્ર ઘટનાની વિગત મેળવી તેમને કાયદાકીય અને સામાજિક સહાયની ખાતરી આપી હતી.
જયંત પંડયાએ જણાવ્યું હતું કે, “એકવીસમી સદીમાં પણ ડાકણ જેવી કુપ્રથાના કારણે નિર્દોષ લોકોના જીવ જાય છે તે અત્યંત શરમજનક બાબત છે. માનવજાત મંગળ અને ચંદ્ર પર વસવાટની તૈયારી કરી રહી છે ત્યારે સમાજનો એક વર્ગ હજુ અંધશ્રદ્ધાના અંધકારમાં જીવી રહ્યો છે.”
મહિલાઓને ડાકણ કહી નિશાન બનાવવાની માનસિકતા સામે સવાલ
વિજ્ઞાન જાથાએ સ્પષ્ટ કર્યું હતું કે મહિલાઓને ડાકણ કહી સામાજિક બહિષ્કાર, માનસિક ત્રાસ કે શારીરિક અત્યાચાર કરવો ગંભીર સામાજિક સમસ્યા છે. આવી માનસિકતા સમાજ માટે કલંક સમાન છે અને તેના વિરુદ્ધ સરકાર તેમજ સામાજિક સંસ્થાઓએ સંયુક્ત પ્રયાસો કરવાની જરૂર છે. જાથાએ રાજ્ય સરકાર સમક્ષ ડાકણ પ્રથા અને અંધશ્રદ્ધા સામે વધુ અસરકારક કાયદાકીય અને જાગૃતિ આધારિત પગલાં ભરવાની માંગણી કરવાની પણ જાહેરાત કરી છે.
અંધશ્રદ્ધા સામે જાગૃતિ જ એકમાત્ર ઉપાય
વિજ્ઞાન જાથાના સભ્યો દ્વારા ગામમાં અને આસપાસના વિસ્તારોમાં જાગૃતિ અભિયાન ચલાવવામાં આવ્યું હતું. ગ્રામજનોને વૈજ્ઞાનિક દૃષ્ટિકોણ અપનાવવા, અંધશ્રદ્ધાથી દૂર રહેવા અને કોઈપણ પ્રકારની અફવા કે શંકાના આધારે હિંસક પગલાં ન ભરવા અપીલ કરવામાં આવી હતી. જાથાના સભ્યો રવિ પરબતાણી અને રોમિત રાજદેવે ગ્રામજનોમાં માહિતી પત્રિકાઓનું વિતરણ કરી અંધશ્રદ્ધા વિરુદ્ધ જનજાગૃતિ ફેલાવવાનો પ્રયાસ કર્યો હતો.
સમાજ માટે ચેતવણીરૂપ ઘટના
ગાડી વોકડાની આ ઘટના માત્ર એક પરિવાર પર થયેલો હુમલો નથી, પરંતુ સમગ્ર સમાજ માટે ચેતવણી સમાન છે. શિક્ષણ, વૈજ્ઞાનિક વિચારસરણી અને જાગૃતિના અભાવે અંધશ્રદ્ધા જેવી કુપ્રથાઓ હજુ પણ જીવંત છે. સમાજના છેવાડાના વિસ્તારો સુધી શિક્ષણ અને વૈજ્ઞાનિક અભિગમ પહોંચે ત્યારે જ આવી દુર્ભાગ્યપૂર્ણ ઘટનાઓને અટકાવી શકાય તેમ છે. વિજ્ઞાન જાથાએ રાજ્યના ડીજીપી, ગાંધીનગર રેન્જ આઈજીપી, સાબરકાંઠા જિલ્લા પોલીસ, જિલ્લા કલેક્ટર અને અન્ય અધિકારીઓનો સહયોગ બદલ આભાર વ્યક્ત કર્યો હતો.
આ પણ વાંચો: 4 જૂને કેરળમાં પહોંચશે ચોમાસું, તમિલનાડુમાં ભારે વરસાદની ચેતવણી
