રામ મંદિરમાં દાન વ્યવસ્થામાં મોટા ફેરફારો! બેંક ખાતાથી લઈને દાનપેટી સુધી બદલાયા નિયમો
Ayodhya Ram temple: અયોધ્યાના શ્રીરામ જન્મભૂમિ મંદિરમાં દાન ચોરીના કેસની તપાસ વચ્ચે શ્રીરામ જન્મભૂમિ તીર્થ ક્ષેત્ર ટ્રસ્ટે દાન વ્યવસ્થા અને બેંકિંગ સિસ્ટમમાં મોટા ફેરફારો કર્યા છે. હવે મંદિરના બેંક ખાતાઓનું સંચાલન એક વ્યક્તિ નહીં પરંતુ ત્રણ અધિકૃત હસ્તાક્ષરકારોના સંયુક્ત હસ્તાક્ષરથી જ કરવામાં આવશે. સાથે જ દાનપેટીથી લઈને રોકડની ગણતરી સુધીની સમગ્ર પ્રક્રિયામાં સુરક્ષા વધુ મજબૂત કરવામાં આવી છે.
નવી વ્યવસ્થા મુજબ કાર્યકારી મહાસચિવ કૃષ્ણ મોહન સાથે જગદીશ અને ચંદન રાયને પણ બેંક ખાતાના અધિકૃત હસ્તાક્ષરકાર તરીકે નિયુક્ત કરવામાં આવ્યા છે. હવે મંદિરના કોઈપણ નાણાકીય વ્યવહાર માટે ત્રણેયના સંયુક્ત હસ્તાક્ષર ફરજિયાત રહેશે. અગાઉ બેંકિંગ સંબંધિત જવાબદારી ટ્રસ્ટી અનિલ મિશ્રા પાસે હતી.
દાન ગણતરી સ્થળ પર સુરક્ષા વધારાઈ
ટ્રસ્ટે દાનની ગણતરી પ્રક્રિયામાં પણ મોટા ફેરફારો કર્યા છે. હવે દાન ગણતરી સ્થળે કુલ 43 લોકોની હાજરી રહેશે જેથી સમગ્ર પ્રક્રિયા પર અનેક સ્તરે નજર રાખી શકાય. ઉપરાંત સુરક્ષા વધારવા માટે 13 નવા CCTV કેમેરા પણ લગાવવામાં આવ્યા છે. જ્યાં પહેલાં કેમેરા ન હતા ત્યાં પણ હવે નજર રાખવાની વ્યવસ્થા કરવામાં આવી છે.
દાનપેટીથી ગણતરી સ્થળ સુધી રહેશે કડક સુરક્ષા
ટ્રસ્ટના નવા નિયમો મુજબ દાનપેટીમાંથી રોકડને ગણતરી સ્થળ સુધી પહોંચાડવા માટે 27 SIS સુરક્ષા કર્મચારીઓની ફરજ મુકવામાં આવી છે. આ ઉપરાંત પોલીસ બંદોબસ્ત પણ વધારવામાં આવ્યો છે. દાનપેટી અને ગણતરી સ્થળ વચ્ચેના વિવિધ પિલરો પર પોલીસ જવાન તૈનાત રહેશે. ખાસ કરીને પિલર નંબર 34 પાસે વધારાના ત્રણ પોલીસકર્મીઓ મૂકવામાં આવશે કારણ કે ત્યાં ગુપ્ત દાનપેટી રાખવામાં આવી છે.
ચંપત રાય અને અનિલ મિશ્રાના રાજીનામા અંગે પણ ચર્ચા
અહેવાલો અનુસાર દાન ચોરીના કેસમાં ટ્રસ્ટના નિયમો હેઠળ કાર્યવાહી થવાની શક્યતા વચ્ચે ચંપત રાય અને અનિલ મિશ્રાએ પોતાના પદ પરથી રાજીનામું આપ્યું હોવાનું જાણવા મળ્યું છે. ટ્રસ્ટના નિયમો મુજબ જો કોઈ ટ્રસ્ટી અથવા પદાધિકારી ગેરરીતિમાં દોષી સાબિત થાય તો તેને બે-તૃતિયાંશ બહુમતીથી પદ પરથી દૂર કરી શકાય છે. જોકે ટ્રસ્ટના ખજાનચી ગોવિંદ ગિરીએ અગાઉ જણાવ્યું હતું કે બંનેએ નૈતિક જવાબદારી સ્વીકારીને રાજીનામું આપ્યું છે.
તપાસમાં નકલી રિસિપ્ટ કૌભાંડનો ખુલાસો
તપાસ દરમિયાન ધરપકડ કરાયેલા આરોપીઓ પાસેથી ચોંકાવનારી માહિતી સામે આવી છે. તપાસ એજન્સીઓના જણાવ્યા મુજબ આરોપીઓ માત્ર દાનપેટીમાંથી રોકડની ચોરી જ નહોતા કરતા, પરંતુ શ્રદ્ધાળુઓ પાસેથી સીધું દાન લઈને શ્રીરામ જન્મભૂમિ તીર્થ ક્ષેત્રના નામે છપાયેલી નકલી રસીદો પણ આપતા હતા.
આરોપીઓ પાસેથી ટ્રસ્ટના લોગો સાથેની જૂની નકલી રસીદ બુક પણ મળી આવી છે. ત્યારબાદ ટ્રસ્ટે ઓનલાઈન રસીદ વ્યવસ્થાને વધુ મજબૂત બનાવી છે જેથી શ્રદ્ધાળુઓ સીધા અધિકૃત બેંક ખાતામાં દાન કરી શકે અથવા સત્તાવાર કાઉન્ટર પરથી જ રસીદ મેળવી શકે.
