Rajkot: કુખ્યાત ‘ઇભલા ગેંગ’ પર ગુજસીટોક હેઠળ સકંજો, 89 ગુનાનો કાળો ઇતિહાસ
Rajkot Crime News: રાજકોટ શહેરમાંથી ગુંડારાજનો સફાયો કરવા અને સંગઠિત ગુનાખોરી આચરતા તત્વોને પાંજરે પૂરવા માટે શહેર પોલીસ દ્વારા એક મોટી કાર્યવાહી કરવામાં આવી છે. ગુજરાત સરકારના કડક કાયદા ‘ગુજસીટોક’ (GCTOC) હેઠળ રાજકોટ ક્રાઈમ બ્રાંચે શહેરના બી-ડિવિઝન વિસ્તારમાં વર્ષોથી આતંક મચાવતી કુખ્યાત ‘ઇભલા ગેંગ’ વિરુદ્ધ ગુનો દાખલ કરી ગેંગના સાગરીતોની ધરપકડ કરી છે. આ કાર્યવાહીથી ગુનાહિત જગતમાં ભારે ફફડાટ વ્યાપી ગયો છે.
કોણ છે ઇભલા ગેંગ?
રાજકોટના બી-ડિવિઝન વિસ્તારમાં સક્રિય એવી આ ગેંગનો મુખ્ય સૂત્રધાર ઇબ્રાહિમ ઉર્ફે ઇભલો કાથરોટિયા છે. આ ગેંગના સભ્યો પોતાની ધાક જમાવવા માટે લાંબા સમયથી ગંભીર ગુનાઓ આચરતા હતા. પોલીસ રેકોર્ડ મુજબ, આ ગેંગ વિરુદ્ધ અત્યાર સુધીમાં કુલ ૮૯ જેટલા ગુનાઓ નોંધાઈ ચૂક્યા છે. જેમાં ૪ હત્યાની કોશિશ, ૫ લૂંટ અને અપહરણ, ૧૧ રાયોટિંગ, તેમજ ૨૯ મારામારીના ગુનાઓ સામેલ છે. આ ઉપરાંત છેડતી, એટ્રોસીટી, પ્રોહિબિશન અને ગેરકાયદે હથિયાર રાખવા જેવા અનેક કેસોમાં પણ આ ગેંગ સંડોવાયેલી છે.
પોલીસની કડક કાર્યવાહી
ક્રાઈમ બ્રાંચના DCP જગદીશ બાંગરવાએ જણાવ્યું હતું કે, ગેંગના કુલ ૭ સાગરીતો વિરુદ્ધ ગુજસીટોક હેઠળ કાર્યવાહી હાથ ધરાઈ છે. જેમાંથી ગેંગ લીડર ઇભલો અને જાવલો હાલ જેલમાં છે, જેનો કબજો મેળવવાની તજવીજ ચાલુ છે. જ્યારે અન્ય ૪ મુખ્ય સાગરીતો – સલીમ, મહેબૂબ, અશરફ અને લખન – ને પોલીસે ઝડપી પાડ્યા છે. DCP એ સ્પષ્ટ શબ્દોમાં ચેતવણી આપી છે કે, “ગુનેગારોએ જનતા સાથે જેવો વ્યવહાર કર્યો હતો, પોલીસ હવે તેમની સાથે તેવો જ કડક વ્યવહાર કરશે.”
આગામી દિવસોમાં વધુ ૩ ગેંગ નિશાના પર
રાજકોટ પોલીસની આ ઝુંબેશ અહીં અટકવાની નથી. પોલીસના જણાવ્યા અનુસાર, આગામી દિવસોમાં શહેરની અન્ય ૩ સક્રિય ગેંગ વિરુદ્ધ પણ ગુજસીટોક હેઠળ કાર્યવાહી કરવાની તૈયારીઓ પૂર્ણ કરી લેવામાં આવી છે. ગુજસીટોક કાયદા હેઠળ જામીન મળવા અત્યંત મુશ્કેલ હોય છે, જેના કારણે આ ગેંગના સભ્યો લાંબો સમય જેલના સળિયા પાછળ રહેશે. પોલીસની આ આક્રમક કામગીરીથી રાજકોટના શહેરીજનોમાં સુરક્ષાની ભાવના પ્રબળ બની છે અને ગુંડાતત્વોમાં ડરનો માહોલ જોવા મળી રહ્યો છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
આ પણ વાંચો: એક ઈમેલ, હજારો સવાલો: “જો તમારી પાસે સમય નથી” – જાણો સીઈઓ અને એન્જિનિયર વચ્ચે શું થયું?
